Malinaw na marriage line at tuwid na career line ng nursing student

ni Maestro Honorio Ong @Kapalaran Ayon sa Palad | March 10, 2023

KATANUNGAN

1. Nag-aaral ako ng Nursing ngayon. Gusto kong malaman kung makakatapos ba ako ng pag-aaral at makakapasa sa nursing board exam, kahit ngayon ay hirap na ang pamilya ko sa pagpapaaral sa akin, dahil malaki ang gastos at may iba pa akong mga kapatid na nagsisipag-aral din tulad ko.

2. May isa pa akong concern tungkol sa aking love life. May boyfriend ako ngayon at tatlong taon na ang relasyon namin. Naisipan kong sumangguni sa inyo upang malaman kung siya na ba ang makakatuluyan ko.

KASAGUTAN

1. Iisa lang ang namataang malinaw at makapal na Marriage Line (Drawing A. at B. 1-M arrow a.) sa kaliwa at kanan mong palad. Tanda na walang duda, kung sabi mo ay tatlong taon na kayong nagmamahalan ng boyfriend mo at nagkataong isinilang siya sa buwan ng Hunyo at ikaw naman ay isinilang sa buwan ng Disyembre, tiyak ang magaganap – kayo na ang magkakatuluyan.

2. Habang ang tuwid at maganda ring Fate Line na tinatawag ding Career Line (Drawing A. at B. F-F arrow b.) sa kaliwa at kanan mong palad ang nagsasabi na siguradong makakatapos ka ng pag-aaral, sapagkat ang nasabing Fate Line ay madali namang nakarating sa Bundok ng Tagumpay (arrow c.).

3. Tanda na sa kursong Nursing, tulad ng iyong inaasahan, magtatagumpay ka at magkakaroon ng maunlad na propesyon balang-araw. Ang pag-aanalisang makakapasa ka rin sa board exam ay madali namang kinumpirma ng Effort Line (Drawing A. at B. E-E arrow d.), na nakatuntong sa Bundok ng Katuparan (arrow e.) sa kaliwa at kanan mong palad. Ito naman ay tanda na isang kuha lang ng board exam, basta walang magiging problema sa aspetong pampinansyal, walang mintis dahil maluwalhati kang makakapasa.

MGA DAPAT GAWIN

1. Ayon sa iyong mga datos, Marianne, nakatakda na ang magaganap dahil siguradong makaka-gradweyt ka ng Nursing kahit medyo tag-hirap ang buhay n’yo sa kasalukuyan at nakatakda ring ikaw ay papasa sa Nursing board exam sa taong 2027 at sa edad mong 25 pataas.

2. Habang paglipas ng ilang taon, ang kasalukuyan mong boyfriend ang nakatakda mong makatuluyan at ang pag-aasawang ito ay inaasahang itatala sa taong 2029 at sa edad mong 27 pataas.

Dapat gawin kung feeling ‘di umaasenso kahit matagal na sa work

ni Maestro Honorio Ong @Kapalaran Ayon sa Palad | March 10, 2023

KATANUNGAN

1. Ako ay pangkaraniwang empleyado. Ang problema, matagal na ako sa pinaglilingkuran kong kumpanya, pero hanggang ngayon hindi tumataas ang aking suweldo at wala ring mga benepisyo rito, kaya balak ko nang mag-resign. Kaya lang, kung magre-resign ako ay tuluyan na akong mawawalan ng trabaho at hindi na makakita pa ng iba na katulad ng trabaho ko ngayon na related naman sa course ko.

2. Kung hindi ako aalis dito, kaawa-awa naman ako dahil napakakuripot ng may-ari ng kumpanyang ito. Feeling ko nga, kinakawawa kaming maliliit na empleyado dahil ‘yung mga demand namin ay hindi naman ibinibigay o napagbibigyan.

3. Maestro, ano ba ang dapat kong gawin? Sana, mapayuhan n’yo ako para sa ikagaganda ng aking career at para sa ikauunlad ng buhay ko.

KASAGUTAN

1. Huwag ka nang mamroblema, Jayson, sapagkat sinasabing makakahanap ka pa ng magandang trabaho sa sandaling nag-resign ka sa kasalukuyan mong trabaho. Ito ang nais sabihin ng hindi pumangit at hindi naputol na Fate Line (Drawing A. at B. F-F arrow a.) na tinatawag din nating Career Line (arrow a.) sa kaliwa at kanan mong palad.

2. Tanda na dahil may mabuti kang kalooban at palaging malinis ang inyong konsensya sa bawat gawain o trabaho na iyong ginagawa, gayundin, masipag at dedicated ka sa trabaho, gagantimpalaan ka rin ng langit ng mabuti, asensado at maganda ring trabaho. Ito naman ang maghahatid sa iyo sa tuloy-tuloy na pagsigla at pag-unlad ng iyong career. Kasabay nito, magkakaroon ka rin ng bagong trabaho na mas malaki ang suweldo at mas mabilis ang pag-asenso (arrow b.) kung ikukumpara sa kasalukuyan mong kumpanya.

3. Ang pag-aanalisa na sa sandaling umalis ka sa kasalukuyan mong trabaho ay lalong gaganda ang career mo at madali namang kinumpirma at pinatunayan ng okey at maganda mong lagda, na tuloy-tuloy na gumuhit nang straight line at nagtapos sa pataas na stroke.

4. Ibig sabihin, habang nakaka-edad ka, walang problema dahil kahit umalis ka sa kasalukuyan mong kumpanya at lumipat ng ibang trabaho, tulad ng naipaliwanag na, tuluy-tuloy kang aasenso. At sa larangan ng career at habang lumalaon sa pagtatrabaho, patuloy ka ring uunlad at magiging maligaya.

MGA DAPAT GAWIN

1. Jayson, kung nararamdaman mong argabyado ka sa kasalukuyan mong trabaho, gayung napapansin mong payaman nang payaman ang kumpanya, habang kayong manggagawa ay patuloy na naghihirap dahil sa mababang suweldo, tama ang iniisip mo na mag-resign at lumipat ng ibang kumpanya. Pero hindi pa ngayon, sa halip, gawin mo ang pagre-resign sa buwan ng Mayo 2023 nang sa gayun, paboran ka ng kapalaran, kung saan sa nasabing panahon, tiyak na sa lilipatan mong kumpanya ay susuwertehin ka.

2. Dagdag pa rito, ayon sa iyong mga datos, kapag umalis ka sa kasalukyan mong kumpanya, sa huling linggo ng Mayo 2023, muli kang magkakaroon ng bago, mas maganda at malaking suweldo na trabaho, na may kaugnayan din sa natapos mong kurso sa isang international company.a.

Babaeng chubby, dadating sa buhay ng lalaking naghahanap ng forever

ni Maestro Honorio Ong @Kapalaran Ayon sa Palad | March 8, 2023

KATANUNGAN

1. Bakit isang beses lang ako nagka-girlfriend at pagkatapos nu’n ay hindi na ulit ito nasundan hanggang sa umabot ako ng edad 38? Sa palagay mo, Maestro, sa edad kong ito ay magkaka-girlfriend pa ba ako kahit ako ay mahiyain sa babae?

2. Mahirap kasi ang kalagayan ko ngayon, ‘yung mga babaeng ka-level ko ay may mga asawa at pamilya na, kaya na-oobliga akong manligaw sa mas bata sa akin. Pero malayo ang interes at mundo namin sa isa’t isa, kaya parang hindi rin ako masaya kapag kasama ko sila.

3. Sa ngayon, may nililigawan akong 23 years old, pero pinanghihinaan na naman ako ng loob. Medyo malaki kasi ang agwat ng edad namin at hindi ako maka-relate sa mga gimmick niya.

4. Ano nakikita mo sa mga palad ko, Maestro? Sa edad kong ito, makakapag-asawa pa ba ako at magkakaroon ng masaya at simpleng pamilya na pangarap ko?

KASAGUTAN

1. Teroy, ‘wag ka nang malungkot o mamroblema dahil nakakatuwang makita na may kaisa-isang bagama’t napadulo, gumuhit pa rin nang malinaw na Marriage Line (Drawing A. at B. 1-M arrow a.) sa kaliwa at kanan mong palad.

2. Ito ay malinaw na tanda na sa matagal mong paghihintay, darating din ang panahong may isang babae na halos ka-edad at ka-level mo sa lipunan na iyong ginagalawan at lugar na iyong kinabibilangan ang tuluyang lulutang.

3. Sa takdang panahon na inilaan ng kapalaran, ang iyong paghahanap ay mapupunan ng babaeng naghahanap din ng makakasama sa buhay. At tulad ng nasabi na, sa panahong inilaan ng kapalaran, siguradong pagtatagpuin ang inyong landas upang bumuo ng wagas, matimyas at panghabambuhay na pagmamahalan.

MGA DAPAT GAWIN

1. Samantala, ayon sa iyong mga datos, hindi ang kasalukuyan mong nililigawan na mas bata sa iyo ang iyong mapapangasawa o makakasama habambuhay. Mas mainam pang itigil mo ang panliligaw sa kanya upang hindi masayang ang iyong effort, time at resources.

2. Sa halip, ayon sa iyong mga datos, sa mid-year ng taong ito at sa edad mong 38 pataas bago mag-40, isang babaeng nasa late 30s ang darating na nagtataglay ng zodiac sign na Scorpio. Ang babaeng ito na medyo chubby o mataba ang pangangatawan ang siya na nang nakatakda mong mapangasawa at makasama sa pagbuo ng simple pero maligaya at panghabambuhay na pamilya.