Tutol ang mister sa planong pagtatrabaho kahit baon na sa utang

ni Maestro Honorio Ong - @Kapalaran ayon sa Palad | October 13, 2021

KATANUNGAN

1. Madalas kaming mag-away ng mister ko dahil sa dami ng aming mga utang na hindi nababayaran. Maliit lang kasi ang suweldo niya sa security agency at kung minsan ay hindi pa siya nababayaran.

2. Ang problema, gusto ko siyang tulungan dahil nakatapos naman ako ng college sa kursong education, kaya nag-a-apply ako sa mga eskuwelahan, kaso hindi naman kailangan ngayon ang mga teacher sa private school, at sa public naman ay hindi ako makapasok dahil hindi pa ako board passer. Kaya ngayon, sabi ng mister ko ay sa bahay na lang ako at alagaan ang mga bata. Nakipagtalo ako sa kanya at sabi nya, kung magtatrabaho ako, siya na lang daw ang maiiwan sa bahay at lalo kaming nag-away.

3. Maestro, sa inyong palagay, ano ba talaga ang dapat naming gawin para makaraos kami sa mga utang at gumanda ang aming kabuhayan kahit kaunti? Gulong-gulo na kasi ang isip ko ngayon.

KASAGUTAN

1. Tama ang nasa isip mo, Annalie. Upang makaraos sa mga pagkakautang at lalo pang gumanda ang kabuhayan ng iyong pamilya, dapat kang magtrabaho, sapagkat napakaganda at napakalinaw ng Fate Line (Drawing A. at B. F-F arrow a.) sa kaliwa at kanan mong palad. Ibig sabihin, kung noon ka pa nagtrabaho o noon mo pa ginamit ang iyong pinag-aralan, hindi sana kayo namomroblema ngayon sa aspetong pampinansiyal.

2. Ang problema mo na lang ngayon ay kung paano kukumbinsihin ang iyong mister sa binabalak mong pagtatrabaho. Gayunman, tumanggi man o hindi ang iyong mister kung muli mo siyang paliliwanagan, ang nasabing magandang Fate Line (F-F arrow a.) at nagtataglay ka rin ng magandang signature, na bukod sa umangat ay lumaki pa ang mga letra ang siyang kumumpirma na sa malapit na hinaharap, muling mabubuhay ang iyong career. Pagkatapos nito, tuloy-tuloy ka nang makatutulong at hindi lang makakatulong kundi ikaw ang mag-aahon sa financial problem ng iyong pamilya (arrow a.) hanggang sa tuluyan na ring umunlad ang inyong kabuhayan.

MGA DAPAT GAWIN

1. Ibig sabihin lang, “vital” o mahalagang paraan sa buhay ninyong mag-anak ang iniisip mong magtrabaho dahil kung hindi ka kikilos, tulad ng iyong kinatatakutan, tuluyang mababaon sa utang ang inyong pamilya.

2. Habang, ayon sa inyong mga datos, Annalie, kaunting paliwanag pa kay mister, darating din ang panahong papayagan ka niyang magtrabaho. Ito ay inaasahang magaganap sa taon ding kasalukuyan sa buwan ng Nobyembre o Disyembre kung saan makapagtatrabaho ka na at ito ang magiging susi o simula upang tuloy-tuloy nang makaahon ang iyong pamilya sa mga problemang pampinansiyal hanggang sa tuluyang umunlad ang inyong kabuhayan.

Problemado dahil iniwanan ng ka-live-in, iba ang mapapangasawa kaya ‘di dapat maghabol

ni Maestro Honorio Ong - @Kapalaran ayon sa Palad | October 10, 2021

KATANUNGAN

1. May live-in partner ako, pero iniwanan niya ako kasi nahuli niyang may textmate ako, pero ang totoo ay kaibigan ko lang ‘yun. Lahat ng paliwanag ay ginawa ko na para hindi niya ako iwanan, pero talagang makitid ang isip niya, kaya tuluyan din kaming naghiwalay. Sa ngayon, hindi ko na alam kung nasaan siya mula nang mag-empake siya ng kanyang mga damit at hindi na rin siya sumasagot sa text at tawag ko.

2. Maestro, gusto kong malaman kung magkakabalikan pa ba kami? Sa totoo lang, mahal na mahal ko pa rin siya hanggang ngayon. Kung hindi na kami magkakabalikan, magiging boyfriend ko ba ang textmate ko ngayon? Siya kasi ang umaalalay sa akin kapag may mabigat akong problema. Gayundin, siya ang umuunawa at nakakausap ko kapag wala akong makausap. Sino ang susunod na lalaking darating sa buhay ko at magiging maligaya na ba ako sa piling niya?

3. Alam mo, Maestro, pangarap ko ring maikasal at magkaroon ng legal at tunay na pamilya, hindi tulad ng nakaraang relasyon ko na hindi ako pinakasalan, matutupad ba ang simpleng pangarap kong ito at kailan?

KASAGUTAN

1. Dalawa ang malinaw na Marriage Line (Drawing A. at B. 1-M arrow a. at 2-M arrow b.) sa kaliwa at kanan mong palad. Tanda na dalawang beses kang makapag-aasawa, kasal man o hindi. Dagdag pa rito, pansinin mong nabiyak at sadyang pumangit ang unang Marriage Line (arrow a.) na tulad ng nangyari na ngayon, ang nasabing pag-aasawa ay nakatakdang mauwi sa pagkawasak at paghihiwalay.

2. Ngunit sa ikalawang pag-aasawa, malaki ang pag-asa na ito na ang mas malinaw at mahabang Marriage Line (arrow b.) na iginuhit sa kaliwa at kanan mong palad, kung saan may pangako ng isang tapat at panghabambuhay nang relasyon.

3. Ang pag-aanalisang sa ikalawang pag-asawa o pakikipagrelasyon ka susuwertehin ay madali namang kinumpirma ng birth date at destiny number mong two (2). Ibig sabihin, sa mga bagay na ikalawa at pangyayaring ikalawa sa iyong buhay, malaki ang posibilidad na suwertehin ka na, uunlad at habambuhay na magiging maligaya.

DAPAT GAWIN

Habang, ayon sa iyong mga datos, Marife, wala nang pag-asa na magkabalikan pa kayo ng dati mong live-in partner, (1-M arrow a.). Ngunit sa ikalawang pakikipagrelasyon na hahantong sa kasalan o tunay na pag-aasawa (2-M arrow b.), tiyak ang magaganap. Sa pagkakataong ito, may pangako na habambuhay ka nang liligaya at magkakaroon ng legal at lehitimong pamilya, na nakatakdang mangyari sa susunod na taong 2022, sa buwan ng Nobyembre hanggang Disyembre, sa edad mong 33 pataas.

Magandang marriage line, indikasyon na ‘di mahihiwalay sa asawa kahit may ibang babae ngayon

ni Maestro Honorio Ong - @Kapalaran ayon sa Palad | October 05, 2021

KATANUNGAN

1. Ang problema ko ay may babae ako, pero hindi ito alam ng misis ko. Gayunman, napapansin ko na parang naghihinala na siya na may ginagawa akong kalokohan. Ang totoo nito, mahal ko naman ang aking pamilya, natukso lang akong mambabae tulad ng tipikal na kalalakihan na naghahanap ng panandaliang romansa. Kumbaga, nagdedebersiyon lang sa ibang kandungan na mas bata at maganda at pandagdag ng sigla para lalong sipagin sa pagtatrabaho.

2. Naisipan kong sumangguni sa inyo upang malaman kung tama ba ang aking kutob na dahil malakas ang intuition ng kababaihan tulad ng misis ko ay nakakahalata na kaya talaga siya?

3. Ang ikinatatakot ko ay baka hulihin niya kami sa akto o iniisip ko na baka pinasusundan na niya ako sa ibang tao at mabulaga pa kami. Hanggang kailan ko mapapanatili ang lihim kong ito o mas dapat na tigilan ko na bago tuluyang malaman ng misis ko ang ginagawa ko at baka ito pa ang maging dahilan upang mawasak ang aming pamilya at baka makulong ako?

4. Sa palagay n’yo, Maestro at ano ang nakikita ninyo sa guhit ng aking palad, mapananatili ko bang buo at masaya ang aking pamilya kahit ngayon ay may illicit love affair akong iniingatan?

KASAGUTAN

1. Anuman ang dahilan kung bakit ka nambabae, wala na tayong pakialam, sa halip, ang malinaw na nangyayari sa kasalukuyan ay ang tinatawag na “fling na relasyon” kung saan malinaw na nakikita ang Guhit ng Pambabae o Guhit ng Panandaliang Pakikipagrelasyon (Drawing A. at B. f-f arrow a.) sa kaliwa at kanan mong palad.

2. Ibig sabihin, anuman ang mangyari, mabisto ka man ni misis o hindi, walang problema dahil ang nasabing pambababae na kinababaliwan mo sa kasalukuyan, sigurado namang hindi magtatagal at tunay ngang hindi ito makakaapekto sa inyong pamilya at sa relasyon ninyong mag-asawa.

3. Subalit hindi ‘yun ang delikado, sa halip, ang mas nakakatakot ay dumating ang sandali na mawili ka sa pambababae, dahil hindi ito nabibisto ni misis, na siya namang ‘wag mong gagawin. Sapagkat bagama’t matino, maayos at maganda ang kaisa-isang Marriage Line (Drawing A. at B. 1-M arrow b.) sa kaliwa at kanan mong palad, hindi mo naman dapat panghawakan ‘yun na habambuhay na magiging matatag ang inyong pamilya.

4. Dapat mo ring bigyang-atensiyon ang medyo nagulo o nabiyak na Heart Line (Drawing A. at B. h-h arrow c.) sa kaliwa at kanan mong palad. Ito ay malinaw na tanda o indikasyon na bagama’t makakalusot ang pambabae mo ngayon, kapag ito ay inulit mo pa, para ring magnanakaw, sa una, ikalawa o ikatlong beses ay hindi ka mahuhuli, pero kapag nawili ka sa pagnanakaw, dahil paulit-ulit na, siguradong matitiklo ka rin. Ganundin sa pambababae, may tendency ding manganib ang relasyon ninyong mag-asawa hanggang sa tuluyang masira ang iyong pamilya, kaya hindi porke nakalusot ka sa una o ikalawa ay hindi ka nahuli ay uulit-ulitin mo pa.

5. Tulad ng nasabi na, sa pambababae, ‘wag mong tutularan ang pusakal na magnanakaw, na naging bahagi na ng pang-araw-araw na buhay niya ang pagnanakaw. Sa halip, hangga’t magagawa mo pa, dapat mong mairaos ang init ng iyong katawan, mas makabubuti sa iyong pamilya at para na rin sa ikabubuti ng relasyon ninyong mag-asawa. Kung nambabae ka ng isang beses, ‘wag mo nang uulitin pa nang sa gayun, ikaw ay makabalik sa pagiging isang matino, tapat at ulirang asawa.

MGA DAPAT GAWIN

1. Ika nga, once is enough, twice is too much, thrice is a poison that can kill a person. Tandaang ang anumang bagay na sobra ay masama, kaya kahit ano pa ang ginagawa mo, kailangang ‘wag na ‘wag kang sosobra.

2. Ayon sa iyong mga datos, Abner, sigurado na ang magaganap, mananatili ang illegal affair na ninanamnam mo ngayon nang hindi malalaman ng iyong misis, ngunit darating din ang eksaktong panahong magkakahiwalay kayo ng babae mo. Kapag tuluyan na kayong naghiwalay, back-to-normal na uli ang buhay mo – matapos mambabae, balik sa pagiging mabuting ama, tapat na aasawa at ulirang ama ng tahanan (Drawing A. at B. 1-M arrow b.).