'Egay', super bagyo na.. Signal no. 5 sa Luzon

ni Jeff Tumbado / Mai Ancheta @Weather News | July 26, 2023

Napanatili ng Super Bagyong Egay ang lakas nito habang patuloy na nananalasa sa ilang mga lugar sa Northern Luzon.

Ito ang inihayag ng Philippine Atmospheric Geophysical and astronomical Services Administration (PAGASA) sa inilabas na advisory sa bagyo.

May bitbit na malakas na hangin ang Bagyong Egay at itinaas sa Signal Number 5 ang ilang bahagi ng Babuyan Islands habang nakataas naman sa Signal No. 4 ang mga bayan ng Sta. Ana, Gonzaga, Claveria, Sanchez Mira, Pamplona, Abulug, Ballesteros, Aparri, Buguey, Sta. Teresita, at Calamaniugan sa Cagayan.

Inilagay naman sa Signal No. 3 ang Isabela, Apayao, Ilocos Norte, ilang bahagi ng Kalinga, Batanes at ilang bahagi ng Abra.

Signal No. 1 naman ang lalawigan ng Quezon kasama na ang Polillo Islands, ilang bahagi ng Nueva Vizcaya, ilang bahagi ng Benguet, La Union, Nueva Ecija, Pangasinan, Tarlac, Zambales, Bulacan, Pampanga, Bataan, Cavite, Metro Manila, Rizal, Laguna, Batangas, Camarines Norte, Camarines Sur, Catanduanes at Marinduque.

Nakararanas na ng kawalan ng supply ng kuryente sa lalawigan ng Cagayan dahil naapektuhan ng malakas na bagyo ang mga linya ng kuryente.

Batay sa pagtaya ng PAGASA, inaasahang lalabas ang Bagyong Egay sa Philippine Area of Responsibility sa Huwebes ng umaga.

'Egay', posibleng maging super bagyo

ni Jeff Tumbado @Weather News | July 22, 2023

Nagbabadyang maging “super bagyo” ang ganap na bagyong si 'Egay' na kasalukuyang nasa rehiyon ng Luzon.

Batay sa huling datos ng Philippine Atmospheric, Geophysical and Astronomical Services Administration (PAGASA), posibleng sa Lunes, Hulyo 24, maging super typhoon si 'Egay' kung saan nakatakda ang mismong State of the Nation Address (SONA) ni Pangulong Ferdinand Marcos, Jr.

“Pagdating sa intensity o lakas nitong bagyo, posible nga rin po itong lumakas into a Tropical Storm category within the next twelve hours at bukas posibleng nasa Severe Tropical Storm category, at pagdating ng Linggo, makikita po natin nasa Typhoon category na itong si Bagyong Egay, and by Monday posible po itong umabot sa Super Typhoon category,” paliwanag ni PAGASA weather specialist Ana Clauren-Jorda sa pulong balitaan kahapon.

“Kaya hindi po basta-basta o hindi dapat natin ipagwalang bahala itong mino-monitor nating si Bagyong Egay dahil malawak po ito at may malakas na hangin na dala,” wika pa nito.

Nabanggit din ng weather bureau na asahang magtataas sila ng wind signals sa ilang bahagi ng bansa simula ngayong araw ng Sabado, Hulyo 25.

“Inaasahan na magtataas po tayo ng Tropical Cyclone Wind Signal sa ilang bahagi ng Bicol Region at Eastern Visayas, partikular na sa Eastern portion simula po bukas ng gabi o early Sunday,” ani Jorda.

Huling namataan si 'Egay' sa Silangan-Timog Silangan ng Luzon na may taglay na lakas na hangin na 55 kilometro bawat oras at bugsong aabot sa 70 kilometro kada oras.

Wala pa umanong epekto sa bansa ang bagyo, ngunit asahan ang mga pag-ulan sa mga darating na araw na dulot din ng Southwest Monsoon o Hanging Habagat.

Sinabi ni Jorda na magsisimula ang mga pag-uulan na dala ni 'Egay' sa Linggo hanggang Lunes sa bahagi ng Luzon kabilang na ang NCR, Catanduanes at Northern Samar.

Bagyong Egay, next

ni Mai Ancheta @News | July 17, 2023

Isa na namang namumuong sama ng panahon ang namataan ng PAGASA sa silangang bahagi ng Mindanao na maaaring maging bagyo kapag pumasok sa Philippine Area of Responsibility (PAR).

Kapag lumakas at nakapasok sa PAR sa Martes, tatawagin itong Bagyong Egay.

Lalakas din ang habagat sa kalagitnaan ng susunod na linggo dahil sa masamang panahon na maaaring higupin ng low pressure area mula sa silangan patungo sa direksyon ng Luzon.

Bagama't nakalabas na ang Bagyong Dodong, sinabi ng PAGASA na makararanas ang bansa ng hindi kagandahang panahon dahil sa patuloy na pag-iral ng habagat at magdadala ito ng mga pagkulog at pagkidlat sa Metro Manila at ilang bahagi ng Luzon.

Makararanas naman ng mga manaka-nakang pag-ulan sa ilang bahagi ng Visayas dahil sa southwest moonsoon, habang ang Mindanao ay makararanas ng mga pag-ulan.

Nananatili namang lubog sa baha ang ilang lugar sa bansa pati na sa Metro Manila dahil sa iniwang buhos ng ulan ng Bagyong Dodong.