Pamilyang Pinoy, nagsabing naghihirap sa Marcos admin, tapos sa SWS survey tumaas daw ang rating ni PBBM

ni Pablo Hernandez @Prangkahan | August 4, 2024

SA BANGAYANG PBBM AT EX-P-DUTERTE, RET. GEN. ALBAYALDE PANIG KAY MARCOS -- Sa interview ng ANC kay dating PNP Chief Gen. Oscar Albayalde ay sinabi nitong hindi raw sangkot sa droga si Pres. Bongbong Marcos (PBBM) dahil wala naman daw ito sa drug watchlist ng PNP noong siya pa ang pambansang hepe ng kapulisan sa ating bansa.

Ang statement na iyan ni ret. Gen. Albayalde ay malinaw na pagtatanggol kay PBBM. 

Sa tema ng salita ni Albayalde, kung iuugnay sa bangayang PBBM vs. ex-P-Duterte ay mas panig siya kay Marcos kaysa kay Duterte, period!

XXX

LAGOT SINA EX-P-DUTERTE AT SEN. DELA ROSA  KAPAG SI EX-PNP CHIEF ALBAYALDE ANG TUMESTIGO SA ICC -- Ayon kay ret. Gen. Albayalde ay handa raw siyang humarap sa imbestigasyon ng International Criminal Court (ICC) kung ipag-uutos ito sa kanya ng Dept. of Justice (DOJ).

Naku, kapag itong si Albayalde nag-state witness sa naganap na extrajudicial killings (EJK) sa ‘Pinas ay lagot sina ex-P-Duterte at former PNP chief Senator Ronald dela Rosa, kasi ang dating PNP chief na ang tetestigo laban sa kanila, boom!

XXX

MAGAWA KAYA NG BAGONG DTI SEC. NA PABABAIN ANG PRESYO NG MGA BILIHIN SA MERKADO? -- Itinalaga ni PBBM si businesswoman Cristina Aldeguer-Roque bilang bagong kalihim ng Dept. of Trade and Industry (DTI) kapalit ng nag-resign na si ex-Sec. Alfredo Pascual.

Sa panahon ni ex-Sec. Pascual ay nabigo siyang pababain ang presyo ng mga bilihin sa bansa, kaya tingnan nga natin kung kayang ibaba ni Roque ang presyo ng mga bilihin sa merkado, abangan!

XXX

MAHIRAP PANIWALAAN ANG SURVEY NG SWS NA TUMAAS ANG RATING NI PBBM -- Sa latest survey ng SWS ay inanunsiyo nito na tumaas daw ng plus 20 points ang rating ni PBBM.

Ganu’n?! Parang ang hirap namang paniwalaan ‘yan kasi may mga survey na halos kalahati ng pamilyang Pinoy ay nagsabing sila’y naghihirap sa panahon ng Marcos administration, tapos sa survey ng SWS tumaas daw ang rating ni PBBM, boom!

Imbes si Sen. Padilla, dapat si Sen. Bong Go, maging partner ni VP Sara

ni Pablo Hernandez @Prangkahan | August 3, 2024

MAY MGA TRACK RECORD SI SEN. BONG GO SA HUSAY SA SERBISYO-PUBLIKO KAYA DAPAT MAGING BISE NI VP SARA, HINDI SI SEN. PADILLA -- Sa social media ay isinusulong ng mga Duterte Diehard Supporters (DDS) na si Sen. Robin Padilla ang gawing ka-tandem o vice presidential candidate ni Vice Pres. Sara Duterte-Carpio sa pagkandidato nitong presidente sa 2028 election. 

Aba teka, bakit si Sen. Padilla ang gusto ng mga DDS na maging ka-tandem ni VP Sara? 

Sa totoo lang, ang dapat nilang iendorsong maging VP candidate ni VP Sara sa eleksyon ay si Sen. Bong Go kasi kung track record sa serbisyo-publiko ang pag-uusapan ay maraming nagawa ito (Sen. Go) tulad ng Malasakit Center na naging susi upang maging free hospitalization na ang mga public hospital at Super Health Center para naman sa free laboratory, kumpara kay Sen. Padilla na wala pang nabalitang nagmarka sa isipan ng mamamayan na nagawa niya sa Senado para sa kapakanan ng sambayanang Pinoy, period!

XXX

PATUTSADAHAN NG MGA MAKA-MARCOS AT MAKA-DUTERTE -- Matapos manawagan si Sen. Ronald Dela Rosa sa mga retiradong sundalo at pulis, at manawagan din si Sen. Robin Padilla sa mga dating rebelde na mag-volunteer bodyguards kay VP Sara Duterte-Carpio dahil inalis ni PNP Chief Gen. Rommel Marbil ang 75 pulis na kabilang sa security escorts ng bise presidente, inanunsyo naman nina Justice Sec. Boying Remulla at Presidential Adviser on Poverty Alleviation Sec. Larry Gadon na 75 pulis lang naman daw ang tinanggal at hindi ang kabuuang 433 security escorts, kaya may natira pa raw na 358 bodyguards si VP Sara.

Hindi na talaga mabubuo uli ang UniTeam kasi ultimo mga maka-Marcos at maka-Duterte, nagpapatutsadahan na, boom!

XXX

HIRIT NI MANILA CONG. JOEL CHUA, HINDI HONEST SI HARRY ROQUE --Pinatutsadahan ni Manila 3rd District Rep. Joel Chua si former Presidential spokesman Harry Roque na bilang dating gov’t. official daw ay dapat maging honest ito at sabihin ang mga totoong nalalaman nito sa operasyon ng Philippine Offshore Gaming Operators (POGO) sa ‘Pinas.

Kumbaga, parang sinabi na rin ni Cong. Chua na hindi honest, liar si Roque, na pulos kasinungalingan ang mga pinagsasabi nito sa Senado, boom!

Lalahok sa 2025 senatorial election tiyak marami, kasi ang 'pork' bilyunan na

ni Pablo Hernandez @Prangkahan | August 2, 2024

BAKA WALANG SEN. AT CONG. NA KUKONTRA SA P10.29-B CONFI FUND NI PBBM SA TAKOT MATANGGALAN NG PORK BARREL -- Nang pumutok ang pork barrel scam, nagpasya ang Supreme Court (SC) na ideklara itong unconstitutional noong year 2013 kaya ang ginawa ng noo’y Pres. Noynoy Aquino ay mula 2014, 2015 hanggang June 30, 2016, stop na ang pork barrel, natigil na ang pork barrel projects ng mga senador at kongresista. At nang maging pangulo si ex-P-Duterte, humingi ito ng P2.5 billion confidential fund, pondong ginagasta ng walang kaakibat na resibo, walang senador at congressman na kumontra, at ang dahilan pala ng hindi nila pagkontra, ibinalik ng Duterte administration ang pork barrel ng mga lawmaker.

Ang nais nating ipunto rito ay baka walang senador at congressman na kukontra sa hirit ni Pres. Bongbong Marcos (PBBM) na P10.29 billion confidential fund sa takot na resbakan sila ng presidente, na tanggalan sila ng pork barrel, boom!

XXX

KAYA MARAMING NAIS LUMAHOK SA 2025 SENATORIAL ELECTION KASI ANG PORK BARREL BILYUNAN NA -- Sa isang interview noon ay sinabi ni former Sen. Ping Lacson na bilyunan na raw ang pork barrel sa mga senador.

Marahil, ‘yang “bilyunang pork” ang dahilan kaya maraming dating senador at mga sikat na personalidad ang lalahok sa 2025 senatorial election, para ‘ika nga kapag sila ay nagwagi, meron na rin silang bilyones na pork barrel, he-he-he!

XXX

MATATAPOS ANG HAPPY DAYS NG MGA PORK BARREL POLITICIAN KAPAG NAGING PRESIDENTE SI MAYOR MAGALONG -- Isang taon na ang nakakalipas nang batikusin ni Baguio City Mayor Benjamin Magalong noong July 2023 ang “kickback-kan” sa pork barrel ng mga lawmaker, at kaya niya ito kinondena ay dahil kabilang daw ang pork barrel sa sanhi kaya nalulubog sa utang ang ‘Pinas na ang dulot ay paghihirap ng sambayanang Pinoy.

Sa totoo lang, maraming sen. at cong. na kabado kay Mayor Magalong, kasi kapag ito ay kumandidatong presidente sa 2028 at nagwagi, tiyak tapos na ang happy days ng mga pork barrel politician, boom!

XXX

HINDI LANG PERJURY, BAKA PATONG-PATONG NA KASO ANG KAHARAPIN NI HARRY ROQUE -- Sa post ni Sen. Risa Hontiveros sa social media ay ibinulgar nito na wanted pala sa Interpol (International Police) si Sun Liming, Chinese national na konektado sa POGO, na nahuli ng mga otoridad sa isang mansyon na pag-aari ng isang korporasyon kung saan ay kasosyo rito si former Presidential spokesman Harry Roque.

Kapag napatunayan na konektado si Roque sa POGO, malamang hindi lang perjury ang kakaharapin niya, kundi patong-patong pang kaso, period!