Roque, 24-oras kulong sa kamara, malamang next bilibid na

ni Pablo Hernandez @Prangkahan | August 24, 2024

KAPAG PATI SI JANET NAPOLES NAABSUWELTO, TAPOS NA ANG KASAYSAYAN NG PORK BARREL SCAM SA ‘PINAS -- Inabsuwelto na ng Sandiganbayan sa kasong plunder si Sen. Jinggoy Estrada kaugnay sa pagkakasangkot noon sa pork barrel scam ni Janet Napoles, at bago ang pagkakaabsuwelto niyang iyan ay nauna nang inabsuwelto si Sen. Bong Revilla na may kahalintulad din na kaso.

At kapag si Presidential Legal Counsel, former Sen. Juan Ponce Enrile ay naabsuwelto rin sa kasong plunder, asahan nang next na maabsuwelto ay si pork barrel queen Janet Napoles, at kapag nangyari ‘yan, diyan na matatapos ang kasaysayang pork barrel scam sa ‘Pinas, boom!

XXX

KULONG 24-ORAS, NAPALA NI HARRY ROQUE SA KANYANG PAGSISINUNGALING -- Kinontempt ng Kamara si former presidential spokesman Harry Roque dahil sa pagsisinungaling nang hindi siya dumalo sa House hearing noong Aug. 16, 2024 dahil may pagdinig daw siya sa isang kasong hawak niya nang araw na iyon, na nang alamin ng mga cong. sa korte kung totoong may hearing ito ay napag-alamang wala.

Ang palusot ni Roque na honest-mistake lang daw ang pagkakamali niya dahil inakala lang umano niya na may hearing siya sa korte nang araw na ‘yun ay hindi pinalusot ng mga cong. kaya ang desisyon ay ikulong siya ng 24-oras sa piitan ng Kamara.

‘Yan ang napala ni Roque sa kanyang pagsisinungaling, kulong ng 24-oras sa House of Representatives, period!

XXX 

HARRY ROQUE KULONG SA KAMARA, MALAMANG NEXT NA NIYA SA BILIBID NA -- Ang utos na 24-oras na kulong ng Kamara kay Harry Roque ay umpisa pa lang.

Kasi, kapag isinampa na ng Presidential Anti-Organized Crime Commission (PAOCC) ang kasong qualified trafficking in person laban kay Roque kaugnay sa pagkakasangkot niya sa sindikatong Philippine Offshore Gaming Operators (POGO) sa Porac, Pampanga at kapag napatunayang guilty siya sa kasong ito, matagal-tagal siyang makukulong at siguradong hindi na sa piitan ng Kamara, kundi sa Bilibid, boom!

XXX

BI NG ‘PINAS PINAKAWALANG KUWENTANG IMMIGRATION SA MUNDO -- Pinakawalang kuwentang Immigration sa mundo ay ang Bureau of Immigration (BI) ng Pilipinas.

Mantakin niyo noon ay malayang nakakapasok sa ‘Pinas ang mga illegal Chinese worker ng POGO, tapos ngayon ang mga opisyal ng POGO ay nakakalabas ng bansa nang hindi alam ng mga taga-Immigration, tsk!

Ikalawang libro ni VP Sara, tiyak na sapul si PBBM

ni Pablo Hernandez @Prangkahan | August 23, 2024

BAWAL ANG EPAL NA PULITIKO SA PANAHON NI SEC. REX GATCHALIAN BILANG HEAD NG DSWD -- Inanunsyo ni Sec. Rex Gatchalian ng Dept. of Social Welfare and Development (DSWD) na lahat ng mamamayan na nangangailangan ng kalinga ng ahensya, basta kumpleto ng requirements ay tutulungan ng kagawaran kahit walang endorsement mula sa mga politician.

Ibig sabihin niyan, kung sa DSWD hihingi ng tulong ang sinumang mamamayan, hindi na kailangang magpagod pang pumunta sa mga pulitiko, dumiretso na sa mga tanggapan ng DSWD sa kanilang mga lugar, at sigurado maibibigay ang hinihinging tulong.

Sa mga naging kalihim ng DSWD, si Sec. Rex lang ang nag-statement ng ganyan, na kulang na lang sabihin niya na sa panahon niya bilang DSWD sec., bawal ang epal na pulitiko sa ahensya, palakpakan naman diyan!

XXX

SANA NOONG SI EX-P-DUTERTE PA ANG PRESIDENTE NG ‘PINAS NAGPAKITA NG TAPANG SI CONG. JANETTE GARIN LABAN SA POGO -- Buong tapang na binatikos ni Iloilo 1st District Rep. Janette Garin si ex-P-Duterte dahil sa pagpayag nito na makapasok at makapagnegosyo sa Pilipinas ang mga Philippine Offshore Gaming Operators (POGO) na pag-aari ng mga Chinese.

‘Yun naman pala, ayaw naman ni Garin sa POGO, kaya sana noon pa niya ito binatikos at nagpakita ng tapang laban sa POGO nang si ex-P-Duterte ang pangulo at hindi ngayon na wala na sa Malacañang ang ex-presidente saka siya nagpapabida sa publiko laban sa pagpapahintulot nito sa POGO na makapag-operate sa bansa, period!

XXX

SA IKALAWANG LIBRO NI VP SARA TATAMAAN SI PBBM -- Matapos isapubliko ni Vice Pres. Sara Duterte-Carpio ang unang libro na gawa niya na may titulong “Isang Kaibigan,” nanawagan siya sa publiko na abangan ang kanyang ikalawang libro na may titulong “Pagtataksil ng Isang Kaibigan.”

Walang duda, si Pres. Bongbong Marcos (PBBM) ang tatamaan sa ilalabas na ikalawang libro ni VP Sara, abangan!

XXX

KAHIT BAON NA SA UTANG ANG ‘PINAS, UUTANG NA NAMAN ANG MARCOS ADMIN -- Sinabi ng Bangko Sentral ng Pilipinas (BSP) na nanatili ang Pilipinas sa net creditor status ng International Monetary Fund (IMF).

Dahil diyan ay asahan nang kahit baon na sa utang ang ‘Pinas ay mangungutang na naman nang mangungutang ang Marcos administration sa iba’t ibang financial institutions sa mundo, nakupo!

Sigalot sa anak, habambuhay na 'di malilimutan ni Mrs. Yulo dahil yearly 'Carlos yulo Day'

ni Pablo Hernandez @Prangkahan | August 19, 2024

SANA I-VETO NI MAYOR HONEY LACUNA ANG ‘AUG. 24 MANILA CARLOS YULO DAY’ PARA MALIMUTAN NI MRS. YULO ANG NAGING SIGALOT SA ANAK -- Nais ni Angelica Yulo na dumating ang panahon na malimutan niya ang naging sigalot nila ng kanyang anak na si 2 gold medalist Carlos Yulo, kaya lang dahil sa ipinasang ordinansa ng Manila City Council na “August 24 Manila Carlos Yulo Day” ay hindi na niya ito malilimutan dahil sa tuwing sasapit ang araw na ito taun-taon ay lagi niyang maaalala ang ginawang TikTok sa kanya ng anak na nagpasama sa kanyang imahe sa publiko.

Sana naman i-veto ni Manila Mayor Honey Lacuna ang ordinansang “August 24 Manila Carlos Yulo Day” para makatulong ang Manila LGU na malimutan ni Mrs. Yulo ang sigalot na nangyari sa kanila ng kanyang anak na si Caloy, period!

XXX

MAGPASUGAL, DISKARTE NG MARCOS ADMIN PARA MADAGDAGAN ANG KITA NG GOBYERNO -- Iminungkahi ng mga pro-Marcos congressmen na gawing legal ang e-sabong upang mabawi ng gobyerno ang nawalang revenue sa pagpapa-stop ng Philippine Offshore Gaming Operators (POGO) sa bansa.

Hay naku, ito ‘yung uri ng gobyerno na ang naiisip na diskarte para kumita ang pamahalaan ay magpasugal, pwe!

XXX

POGO OUT, ONLINE SABONG IN, KAYA TULOY PA RIN ANG RAKET SA SOCMED NG MGA GAMBLING LORD -- Tulad ng POGO, ang sistema rin ng sugal na online sabong ay ipinu-post sa social media, na kahit mga bata ay nakapagsusugal dito sa pamamagitan ng pagtaya ng pera na ang gamit ay GCash.

Ang dami na ngang parents ang natuwa nang ipa-stop ni PBBM ang POGO, tapos may mga congressmen na ang gusto ay magpa-online sabong naman ang Marcos admin.

Kakabuwisit, tinanggal na nga ang POGO, tapos papalitan naman ng online sabong, at dahil diyan tuloy pa rin ang raket ng mga gambling lord sa socmed, tsk!

XXX

MGA CUSTOMS OFFICIAL NA MAY PUWESTO SA ADWANA SA PANAHON NG DUTERTE ADMIN, DAPAT PAIMBESTIGAHAN NI PBBM TUNGKOL SA SHABU SHIPMENTS -- Bukod sa pagbulgar ni detenidong former Customs operative Jimmy Guban na sangkot umano sa shabu shipment sina Davao City Rep. Paolo Duterte, Atty. Mans Carpio na mister ni Vice President Sara Duterte-Carpio at friend ni ex-P-Duterte na si Chinese national Michael Yang, ay ibinulgar din nito na may mga Customs official daw ang sangkot naman sa puslitan ng shabu sa Adwana.

Aba’y kung totoo iyan ay dapat paimbestigahan ni Pres. Bongbong Marcos (PBBM) ang mga Customs official na nagkaroon ng mga puwesto sa Adwana sa panahon ng Duterte administration, period!