Pagkamatay ng KOJC member, isinisisi sa mga pulis

ni Pablo Hernandez @Prangkahan | August 26, 2024

HARRY ROQUE NAKULONG LANG NG 24-ORAS IPINAYABANG NA, TINGNAN NATIN KUNG ‘DI SIYA UMIYAK SA KASONG NO BAIL -- Ibinida ni former presidential spokesman Harry Roque ang kanyang paglaya sa 24-oras na kulong sa piitan ng Kamara kaugnay sa contempt matapos na magsinungaling siya sa House of Representatives, na ayon sa kanya ngayong naranasan na niya ito ay hindi na raw siya matatakot makulong uli at itutuloy umano niya ang laban sa administrasyong Marcos.

Hay naku, 24-oras lang nakulong ipinagyabang na, tingnan natin kung hindi siya umatungal ng iyak kapag nakulong siya sa no bail na qualified trafficking in person na isasampa sa kanya ng Presidential Anti-Organized Crime Commission (PAOCC) tungkol sa pagkakasangkot niya sa sindikatong Philippine Offshore Gaming Operators (POGO) sa bansa, abangan!

XXX

CONG. ERWIN TULFO NAGLABAN-BAWI SA PAGTAKBONG SENADOR? -- Sa kabila na madalas siyang mag-rank number 2 sa mga senatorial survey para sa 2025 midterm election, ay sinabi noon ni ACT-CIS partylist Rep. Erwin Tulfo na never siyang kakandidatong senador dahil mas nais daw niyang maging representante ng kanilang partylist sa Kamara, pero nang maisama na ang kanyang pangalan bilang isa sa 12 senatorial candidate ng Marcos administration ay “no comment” na siya sa isyung pagkandidato niya for senator sa halalan next year.

Isa lang ang ibig sabihin niyan, naglaban-bawi siya sa isyung pagkandidato sa pagkasenador, na kung noong una ay ayaw niyang lumahok sa senatorial election, ngayon, sasabak na siya, period!

XXX

PARANG SINABI NI SEN. TOLENTINO NA PRO-CHINA SI EX-P-DUTERTE, AT MAKA-PILIPINO SIYA SA ISYU NG WPS -- Sabi ni re-electionist Sen. Francis Tolentino na kaya raw siya kumalas sa partido nilang PDP na pinamumunuan ni ex-P-Duterte ay dahil magkaiba raw ang pananaw nila ng dating presidente sa isyu ng West Philippine Sea (WPS).

Kumbaga, parang sinabi na rin ni Sen. Tolentino na siya ay maka-Pilipino at si ex-P-Duterte ay maka-China, boom!

XXX

WALANG SALA ANG MGA PULIS SA PAGKAMATAY NG ISANG KOJC MEMBER, KASI ATAKE SA PUSO ANG IKINAMATAY NITO -- Isa sa kasapi ng sektang Kingdom of Jesus Christ (KOJC) ang nasawi nang pasukin ng mga pulis ang KOJC church para isilbi ang warrant of arrest sa puganteng si Pastor Apollo Quiboloy na nahaharap sa mga kasong sexual abuse and human trafficking.

Ang nangyari sa kasaping ito ng KOJC ay hindi dapat isisisi sa mga pulis, kasi atake sa puso ang ikinamatay nito, at hindi sa kamay ng mga parak, period!

Ex-Gov. Chavit, medyo inis na kay caloy, P5M baka maging bula

ni Pablo Hernandez @Prangkahan | August 25, 2024

HARRY ROQUE LUMOBO ANG KAYAMANAN, BAKA MAKASUHAN NG PLUNDER KAPAG NALAMANG GALING ANG MGA ITO SA KATIWALIAN --Kinukuwestyon ng Kongreso ang biglang paglobo ng kayamanan ni former presidential spokesman Harry Roque, na umabot sa mahigit P120 million mula nang maging miyembro ito ng gabinete ni ex-P-Duterte.

Naku, kapag nalaman ng Kongreso na mula sa katiwalian nagmula ang kayamanan niya ay malamang bukod sa inihahandang kasong qualified trafficking in person, baka makasuhan din siya ng plunder, boom!

XXX

KUNG AYAW NI ROQUE MAKULONG, NEXT TIME HUWAG NA SIYANG MAGSINUNGALING -- Naghihimutok si Roque sa utos ng Kamara na ikulong siya ng 24-oras sa piitan ng House of Representatives matapos siyang i-contempt dahil sa pagsisinungaling.

Next time kasi huwag siyang magsisinungaling sa Kamara para hindi makulong, kasi kapag nagsinungaling uli siya ay baka isang buwan na siyang ipakulong ng mga congressmen, period!

XXX

PARANG NAIINIS  NA SI EX-GOV. CHAVIT SINGSON SA GINAGAWA NI CALOY YULO SA KANYANG PAMILYA -- Nang unang manawagan si ex-Ilocos Sur Gov. Chavit Singson kay Olympic gold medalist Carlos Yulo ay malumanay ang kanyang pananalita, na bibigyan niya ito ng P5 milyon makipag-ayos lang ito sa kanyang ina, ama at pamilya.

Pero sa ikalawang statement ng former governor ay parang medyo naiinis na ito sa golden boy sa pandededma sa kanyang panawagan, kasi ang sabi niya (Chavit) ay dapat daw nang mag-champion ay ipinakita ni Caloy sa publiko na role model siya, at ‘di iyong hindi maganda ang pagtrato nito sa kanyang pamilya, ang masaklap baka sa huli nito ang P5M ay mawala lang na parang bula, period!

XXX

MGA DAGDAG-DUSANG KAUTUSAN NG TRB -- Pinutakti ng batikos mula sa publiko ang Toll Regulatory Board (TRB) sa plano nitong patawan ng multa ang mga sasakyang walang RFID o kulang ang load.

Aba’y mababatikos talaga kasi mantakin n’yo, pulos pagdurusa na nga ang inaabot ng mga motorista sa panay pag-aprub ng TRB sa dagdag-bayarin sa mga expressway, tapos may ipapatupad na naman silang dagdag-dusa sa mga motorista, tsk! 

Roque, 24-oras kulong sa kamara, malamang next bilibid na

ni Pablo Hernandez @Prangkahan | August 24, 2024

KAPAG PATI SI JANET NAPOLES NAABSUWELTO, TAPOS NA ANG KASAYSAYAN NG PORK BARREL SCAM SA ‘PINAS -- Inabsuwelto na ng Sandiganbayan sa kasong plunder si Sen. Jinggoy Estrada kaugnay sa pagkakasangkot noon sa pork barrel scam ni Janet Napoles, at bago ang pagkakaabsuwelto niyang iyan ay nauna nang inabsuwelto si Sen. Bong Revilla na may kahalintulad din na kaso.

At kapag si Presidential Legal Counsel, former Sen. Juan Ponce Enrile ay naabsuwelto rin sa kasong plunder, asahan nang next na maabsuwelto ay si pork barrel queen Janet Napoles, at kapag nangyari ‘yan, diyan na matatapos ang kasaysayang pork barrel scam sa ‘Pinas, boom!

XXX

KULONG 24-ORAS, NAPALA NI HARRY ROQUE SA KANYANG PAGSISINUNGALING -- Kinontempt ng Kamara si former presidential spokesman Harry Roque dahil sa pagsisinungaling nang hindi siya dumalo sa House hearing noong Aug. 16, 2024 dahil may pagdinig daw siya sa isang kasong hawak niya nang araw na iyon, na nang alamin ng mga cong. sa korte kung totoong may hearing ito ay napag-alamang wala.

Ang palusot ni Roque na honest-mistake lang daw ang pagkakamali niya dahil inakala lang umano niya na may hearing siya sa korte nang araw na ‘yun ay hindi pinalusot ng mga cong. kaya ang desisyon ay ikulong siya ng 24-oras sa piitan ng Kamara.

‘Yan ang napala ni Roque sa kanyang pagsisinungaling, kulong ng 24-oras sa House of Representatives, period!

XXX 

HARRY ROQUE KULONG SA KAMARA, MALAMANG NEXT NA NIYA SA BILIBID NA -- Ang utos na 24-oras na kulong ng Kamara kay Harry Roque ay umpisa pa lang.

Kasi, kapag isinampa na ng Presidential Anti-Organized Crime Commission (PAOCC) ang kasong qualified trafficking in person laban kay Roque kaugnay sa pagkakasangkot niya sa sindikatong Philippine Offshore Gaming Operators (POGO) sa Porac, Pampanga at kapag napatunayang guilty siya sa kasong ito, matagal-tagal siyang makukulong at siguradong hindi na sa piitan ng Kamara, kundi sa Bilibid, boom!

XXX

BI NG ‘PINAS PINAKAWALANG KUWENTANG IMMIGRATION SA MUNDO -- Pinakawalang kuwentang Immigration sa mundo ay ang Bureau of Immigration (BI) ng Pilipinas.

Mantakin niyo noon ay malayang nakakapasok sa ‘Pinas ang mga illegal Chinese worker ng POGO, tapos ngayon ang mga opisyal ng POGO ay nakakalabas ng bansa nang hindi alam ng mga taga-Immigration, tsk!