Mga kumpanyang nagbigay ng regalo Kay Caloy malamang nagsisisi na ngayon

ni Pablo Hernandez @Prangkahan | Sep. 23, 2024

MAGAWA KAYA NINA CONG. DAN FERNANDEZ AT MAYOR ARLENE ARCILLAS NA IPA-TOKHANG ANG MANGRARAKET NA SI ‘JUDITH’? -- Isang alyas “Judith” daw ang may “puesto-pijo” ng color games at drop balls sa Brgy. Balibago, Sta. Rosa City, Laguna.

Tingnan nga natin kung kaya nina Sta. Rosa Rep. Dan Fernandez at Mayor Arlene Arcillas na ipa-tokhang si “Judith” at ipa-raid sa kapulisan ang raket na color games at drop balls sa lungsod na ito, abangan!

XXX

HINDI BASTOS SI EX-VP LENI KAYA TINANGGAP NA BISITA SI VP SARA -- May nag-imbita kay Vice Pres. Sara Duterte-Carpio sa Penafrancia Festival sa Naga City, at habang nasa Naga City, iyong nag-invite kay VP Sara ay nag-arrange na bisitahin nito si former VP Leni Robredo, at nang i-inform sa dating bise presidente na bibisitahin siya ni VP Sara ay pinaunlakan naman ito ni ex-VP Leni.

After ng pag-uusap ay kapwa nagpalabas ng statement sina VP Sara at ex-VP Leni na walang isyung pulitika ang kanilang pinag-usapan.

Ang masaklap, ginawa pa itong isyu ng iilan, na kung bakit daw tinanggap pa ni ex-VP Leni si VP Sara bilang bisita dahil kalaban daw nila ito sa pulitika.

Para du’n sa mga kumukuwestiyon na bakit in-entertain pa ng dating bise presidente si VP Sara, ito lang ang pakisalpak sa kukute ninyo, hindi bastos si ex-VP Leni, period!

XXX

MAR ROXAS AT FRANKLIN DRILON, MUNTIK NANG MAKASAMA NI DE LIMA SA SELDA -- Kung totoo ang ibinulgar ni former Iloilo City Mayor Jed Mabilog na kaya siya inili-link sa droga ni ex-P-Duterte at ipinahuhuli sa noo’y PNP chief, Sen. Ronald Dela Rosa ay para pagawain daw siya ng iskrip at isangkot sa illegal drugs sina former DILG Sec. Mar Roxas at former Sen. Franklin Drilon.

Kung hindi pala naka-eskapo patungong Amerika si Mabilog at siya ay nahuli, aba’y malamang nakasama ni former Sen. Leila de Lima sa selda sina Roxas at Drilon, boom!

XXX

HINDI MAN AMININ, MALAMANG ANG MGA KUMPANYANG NAGBIGAY NG REGALO SA MAY BAD IMAGE NA SI CALOY, NAGSISISI NA NGAYON -- Matapos sibakin ng Milo Philippines si 2 gold medalist Carlos Yulo bilang endorser ng kanilang produkto dahil sa masamang ugaling ipinakita nito sa publiko ay maaaring du’n lang napagtanto ng ibang kumpanyang nagbigay ng regalo kay Caloy na mali ang desisyon nilang binigyan pa nila ito (Caloy) ng importansya.

‘Ika nga, hindi man aminin ay tiyak nagsisisi ang mga may-ari ng mga kumpanya kung bakit binigyan pa nila ng regalo ang atletang bad ang ugali, period!

Cardema, 'di na youth, kaya dapat lang sibakin sa NYC

ni Pablo Hernandez @Prangkahan |September 1, 2024

TAMA LANG SIBAKIN SI RONALD CARDEMA SA NATIONAL YOUTH COMMISSION KASI ANG EDAD NIYA HINDI NA PANG-YOUTH -- May mga nabasa tayong comment sa social media tungkol sa pagsibak ni Pres. Bongbong Marcos (PBBM) kay Duterte Youth Founder Ronald Cardema bilang chairman ng National Youth Commission (NYC), na ayon sa mga comment ay wala na raw sa kalendaryo ang edad nito dahil 39-anyos na kaya dapat lang daw palitan siya sa NYC ng mas bata sa kanya na si Joseph Francisco Ortega.

May punto naman pala talaga na sibakin siya sa NYC kasi hindi na pala youth si Cardema para pamunuan pa ang ahensyang pang-youth, period!

XXX

FAKE NEWS ‘YUNG 2K PULIS, NAGHAHAHAP KAY QUIBOLOY KASI KARAMIHAN SA KANILA IDINEPLOY PANG-SECURITY CONTINGENT SAKALING MANGGULO ANG MGA TAGASUPORTA NG PASTOR -- Sabi ni Sen. Ronald Dela Rosa na hindi naman daw most wanted terrorist si Pastor Apollo Quiboloy para gumamit ang Marcos administration ng 2,000 pulis sa paghahanap sa pastor.

Fake news ang sinabing ‘yan ni Dela Rosa kasi sa totoo lang, ang karamihan sa mga pulis na  idineploy sa area sa bisinidad at loob ng compound ng Kingdom of Jesus Christ (KOJC) sa Davao City ay mga security contingent na magpapairal ng maximum tolerance kapag gumawa ng gulo ang mga supporter ni Quiboloy, boom!

XXX

PAREHONG BAD SINA PASTOR QUIBOLOY AT MGA TERORISTA?! -- At ‘yung sinasabi ni Dela Rosa na hindi naman terorista si Quiboloy, korek siya riyan, hindi nga terorista ang pastor.

Pero tulad ng mga terorista ay bad din ang pagkatao ni Quiboloy kasi kung ang mga terorista ay nagsasagawa ng pambobomba at pagmasaker, si Quiboloy naman ay nambibiktima at gumagawa umano ng kahalayan kaya nga ang mga kaso niya ay sexual abuse at human trafficking, period!

XXX

KADA PAGPASOK NG BUWAN, LAGING NAGPAPAIRAL NG DAGDAG-PAHIRAP NA OIL PRICE HIKE ANG DOE -- Inanunsyo ng Dept. of Energy (DOE) na sa unang linggo ng September 2024 ay may oil price hike na naman silang ipaiiral.

Ganyan naman talaga ang DOE, sa kada unang linggo ng bawat buwan, laging nagpapairal ng dagdag-pahirap sa mamamayan na oil price hike, buset!

Cong. Goma, Imber i-bash, suportahan sa hirit na EDSA busway i-open sa mga motorista

ni Pablo Hernandez @Prangkahan | August 31, 2024

NANG MATUKLASAN NG PNP ANG LAGUSAN SA KOJC COMPOUND, NAGSISIPAGWALAAN NA ANG MGA KASAPI NG SEKTA NI QUIBOLOY, RAMDAM NA NILANG MALAPIT NANG MATIMBOG ANG ‘SON OF GOD’ -- Natuklasan na ng mga otoridad ang lagusan papasok sa nakatagong magarbong kuwarto ni Pastor Apollo Quiboloy sa loob ng Kingdom of Jesus Christ (KOJC) compound, at sa ilalim nito ay natagpuan din ang iba pang lagusan, at ito ngayon ang binabaybay ng pulisya.

Kaya naman pala nagsisipagwalaan na ang mga kasapi ng sekta ni Quiboloy sa loob at labas ng compound ng KOJC, kasi parang alam na nilang malapit-lapit nang matimbog ang kinikilala nilang “Son of God,” boom!

XXX

‘DI DAPAT I-BASH SI CONG. GOMA SA MUNGKAHING I-OPEN SA IBANG MOTORISTA ANG EDSA BUSWAY KASI SA TOTOO LANG KAUNTING BUS LANG NAMAN ANG DUMADAAN DITO -- Imbes i-bash, dapat suportahan ng publiko ang mungkahi ni Leyte Rep. Richard Gomez na i-open sa ibang motorista ang EDSA Busway kapag rush hour kasi kaunting pampasaherong bus lang naman ang dumadaan dito (busway) para kahit paano maibsan ang matinding trapik sa kahabaan ng EDSA.

May punto naman talaga si Cong. Goma sa iminungkahi niyang ito, at alam iyan ng mga motoristang bumabagtas sa EDSA na totoong mangilan-ngilang pampasaherong bus lang naman ang bumibiyahe sa busway. Kaya nga ang ibang motorista na nabubuwisit sa trapik sa EDSA ay naiisipang pumasok sa nasabing busway kahit alam nilang bawal dahil nga napakaluwag, at bibihirang bus lang ang dumadaan dito, period!

XXX

MATAPOS AMININ NI AR DELA SERNA NA HINDI SIYA NURSE, MARAMING NAPATAAS ANG KILAY SA ISYUNG LAGING KARAY ITO NI HARRY ROQUE ABROAD -- Nang mabulgar noon na laging kasa-kasama ni former presidential spokesman Harry Roque sa kanyang pag-a-abroad ang dati niyang staff na si 2016 Mr. Supranational Philippines AR Dela Serna, ang ginawa niyang palusot ay need daw niya ang travel companion dahil may mga sakit siya. Diabetic daw siya, with coronary stent at acute spinal stenosis.

Ito na siste, sa pagdinig sa Kamara noong Aug. 28, 2024 ay tinanong ni House-Quad Committee Chairperson Ace Barbers si Dela Serna kung may medical background o kung nag-aral man lang ng pagiging nurse, ang tugon nito ay, “Hindi po, no po.”

Dahil sa sinabing ‘yan ni Dela Serna ay marami sa loob ng Kamara at netizens ang nagtaasan ang kilay na kumbaga, alam na kung bakit laging karay-karay ni Roque sa abroad ang dating staff niyang naging Mr. Supranational Philippines, boom!

XXX

HINDI MAN AMININ, TIYAK MASAMA ANG LOOB NI CARDEMA KASI TODO-SUPORTA SIYA SA KANDIDATURA NI PBBM, TAPOS SINIBAK NGAYON SA NYC -- Sinibak ni Pres. Bongbong Marcos (PBBM) si Duterte Youth Founder Ronald Cardema bilang chairman ng National Youth Commission (NYC) at ang ipinalit sa puwesto nito ay si Tourism Regional Director Joseph Francisco Ortega.

Hindi man aminin ay tiyak masama ang loob ni Cardema sa pagsibak sa kanya sa NYC kasi todo-suporta siya sa kandidatura ni PBBM for president, tapos porke siya ang founder ng Duterte Youth ay tanggal sa puwesto ang inabot niya, tsk!