Marcoleta, may laban sa pagka-senador ‘pag nasama sa lineup ni Duterte

ni Pablo Hernandez @Prangkahan | Oct. 2, 2024

KAPAG SI MARCOLETA NASAMA SA PDP LINEUP NI EX-P-DUTERTE, SA RAMI NG DDS MAY TSANSA SIYANG MAGING SENADOR -- Inanunsyo ni Sagip Partylist Rep. Rodante Marcoleta na kakandidato siya sa pagka-senador sa 2025 midterm election.

Si Marcoleta ang isa sa mga kongresistang nagtanggol sa higit P2 billion budget ng Office of the Vice President (OVP) ni VP Sara Duterte, na tinapyasan ng Kamara ng higit P1.3 bilyon.

Sa totoo lang, kapag si Marcoleta ay nasama sa Partido Demokratiko ng Pilipinas (PDP) senatorial lineup ni ex-P-Duterte ay malaki ang tsansa nitong manalong senador kasi tiyak milyun-milyong Duterte Diehard Supporters (DDS) ang boboto sa kanya, abangan!

XXX

PANAWAGAN NG KABATAAN PARTYLIST SA MGA KAPWA CONG. AT SA MGA SENADOR, IBALIK TINAPYAS NA BUDGET SA MGA SUCs, PERO ANG DUTERTE YOUTH ‘NGANGA’ -- Para mas marami pang kabataan na makapag-aral ng libre sa kolehiyo ay nanawagan si Kabataan Partylist Rep. Raoul Manuel sa mga kapwa niya kongresista at maging sa mga senador na ibalik ang P14.48 billion na tinapyas sa 39 State Universities and Colleges (SUCs) ng Marcos administration.

Buti pa ang Kabataan Partylist may boses mag-ingay sa Kamara para sa kapakanan ng mga kabataan na nais mag-aral sa kolehiyo, pero ang Duterte Youth partylist “nganga” lang, pwe!

XXX

AKALA NG PUBLIKO HINDI NA MAGKAKA-OIL PRICE HIKE SA BAGONG HEAD NG ERC HINDI PALA, KASI TAAS PA RIN NANG TAAS ANG PRESYO NG LANGIS -- Noong Sept. 21, 2024 ay itinalaga ni Pres. Bongbong Marcos (PBBM) si Jesse Andres bilang Officer-in-Charge (OIC) ng Energy Regulatory Board (ERB) at makalipas lang ang apat na araw ay nagkaroon ng oil price hike, P1.20 kada litro ang itinaas sa presyo ng gasolina at P0.20 ang itinaas sa presyo ng diesel, at makalipas na naman ang isang linggo, kahapon, October 1, 2024 ay nagkaroon na ng oil price hike, P0.45 sa kada litro ng gasolina, P0.90 sa litro ng diesel at P0.30 sa kada litro ng kerosene.

Akala ng publiko matapos suspendihin ng Ombudsman si dating ERC Chairperson Monalisa Dimalanta at italaga ni PBBM si Andres bilang bagong head ng naturang ahensya ay hindi na magkaka-oil price hike, mali pala, kasi tulad ng dati, taas pa rin nang taas ang presyo ng mga produktong petrolyo sa ‘Pinas, tsk!

XXX

KAILAN KAYA IPATIKLO NINA LA TRINIDAD MAYOR SALDA AT COL. MACLI-ING ANG MANGRARAKET NA SI ALYAS ‘PATRICK’ -- After manalasa ang Bagyong Julian sa Cordillera region, agad in-open ni alyas “Patrick” ang raket niyang "mini-casino" sa La Trinidad, Benguet.

Mantakin n’yo, hindi pa nga nakaahon ang mga taga-La Trinidad sa perhuwisyong idinulot sa kanila ng bagyo, eh gusto na agad silang raketin ni “Patrick.”

Kailan kaya ipapaaresto nina Mayor Romeo Salda at chief of police Lt. Col. Benson Macli-ing si "Patrick" para matigil na ang pangraraket nito sa mga taga-La Trinidad, Benguet? Abangan!

Magkakapamilyang pultiko na sabayang kakandidato ibasura

ni Pablo Hernandez @Prangkahan | Oct. 1, 2024

SINASAMANTALA NG POLITICAL DYNASTIES NA MAY SIKAT NA APELYIDO ANG KAMANGMANGAN SA PAGBOTO NG MAJORITY PINOY -- Nagkalat ngayon ang mga mukha sa mga billboard, tarpaulin at social media ng mga magkakapamilyang sabayang kakandidato sa 2025 midterm election. 

Bakit sila (political dynasty) sabayang kakandidato? Simple lang naman ang dahilan, ito ay upang samantalahin ang kamangmangan sa pagboto ng majority Pinoy, na alam nilang mananalo sila sa eleksyon dahil ang akala ng mga botante na ‘yung mga magkakapamilyang pulitiko na may mga sikat na apelyido ay ang mga ‘yun ang mag-aahon sa kanila sa kahirapan, tsk!

XXX

IBASURA ANG MGA TRAPO AT POLITICAL DYNASTIES -- Ngayong Oct. 1 ang simula hanggang Oct. 8 ng filing ng certificate of candidacy ng mga kakandidato sa May 2025 midterm election.

At dahil panahon na naman ng eleksyon ay magsasalimbayan na naman ang pangako ng mga pulitiko sa mga botante na nagbibigay ng tila maling pag-asa sa mamamayan, dahil kadalasan ang pangako ng mga pulitiko, lalo na ng mga trapo (traditional politicians) at magkakapamilyang pulitiko ay napapako, hindi natutupad kapag naluluklok na sa poder. 

Kaya ang dapat gawin ng publiko ay kilatisin ang pagkatao ng kandidato, at kapag ito ay trapo at mula sa political dynasty, dapat ibasura mga ‘yan sa eleksyon kasi kapag nanalo ang mga ‘yan ay tiyak mapapako lang ang mga pangako nila sa mamamayan, boom!

XXX

PANAHON NA NAMAN NG ELEKSYON, KAYA NAGLITAWAN NA NAMAN ANG MGA FAKE NEWS VLOGGER -- Dahil panahon na naman ng eleksyon, naglitawan na ulit sa social media ang mga bayarang fake news vloggers.

Gagawa na naman ng mga fake news ang mga iyan na ‘yung kurakot na pulitiko ay palalabasin nilang good politicians at ‘yung mga matitinong pulitiko ay palalabasin nilang bad politicians.

Kaya panawagan sa publiko, huwag maniwala sa post ng mga bayarang fake news vloggers, period!

XXX

KAILAN KAYA ULING MAGPAPAKABAYANI ANG MGA TAGA-COA? -- Nang pumutok ang pork barrel scam noong year 2013 ay kabilang ang Commission on Audit (COA) sa mga naging bayani sa mata ng publiko dahil talagang nagsipag sila noon sa pag-audit sa kaban ng bayan na nasa pork barrel funds ng mga senador at kongresista, at doon nila natuklasan na in-scam lang pala ng ilang sen. at cong. ang pera ng bayan na inilalaan nila sa kanilang mga pork barrel projects.

Kaya’t ang tanong: Kailan kaya uli magpapakabayani ang mga taga-COA sa pamamagitan ng pagbusisi o pag-audit sa pork barrel projects ng mga sen. at cong., abangan!

Sabi ni Romualdez ‘di i-impeach si VP Sara, kapag natuloy, lalabas na sinungaling siya

ni Pablo Hernandez @Prangkahan | Sep. 30, 2024

DAPAT IREKOMENDA RIN NG QUAD-COMMITTEE NA ANG MGA STL FRANCHISE NA INISYU NOON NI GARMA SA MGA JUETENG LORD, TANGGALIN -- Inirekomenda ng Quad-Committee ng Kamara na sampahan ng kasong murder sina dating Philippine Charity Sweepstakes Office (PCSO) General Manager, ret. Col. Royima Garma at Napolcom Commissioner, ret. Col. Edilberto Leonardo kaugnay sa pagpapapatay umano kay dating PCSO Board Member, ret. Gen. Wesley Barayuga noong year 2020, na ang dahilan kaya raw ito ipinapatay ay dahil kontra ito sa sindikato raw nila (Garma at Leonardo) sa loob ng PCSO sa isyu ng pamimigay ng franchise sa mga jueteng lord para magkaprangkisa ng Small-Town Lottery (STL).

Sana hindi lang rekomendasyong sampahan ng kasong murder sina Garma at Leonardo, kundi dapat irekomenda rin ng Quad-Committee na tanggalan ng prangkisa ang mga jueteng lord na nabigyan ng STL franchise, noong si Garma pa ang head ng PCSO, kasi nga, sindikato umanong Garma at Leonardo ang nagbigay sa kanila ng prangkisa, boom!

XXX

KAPAG IMPEACHMENT KAY VP SARA NATULOY, IBIG SABIHIN SINUNGALING SI SPEAKER ROMUALDEZ -- Sinabi ni House Speaker Martin Romualdez na wala raw plano ang Kamara na i-impeach si Vice President Sara Duterte-Carpio.

Iyan ah, sa bibig na mismo ni Romualdez nanggaling ang salitang iyan, na walang plano ang Kamara na i-impeach si VP Sara, kaya kapag dumating ang panahon na may nagsampa ng impeachment case sa bise presidente at tinanggap ito ng House of Representatives, isa lang ang ibig sabihin niyan, sinungaling ang House Speaker, period!

XXX

COMELEC CHAIRMAN GARCIA SA MGA BRGY. OFFICIAL CANDIDATE LANG ASTIG, PERO SA MGA SENATORIABLE, TIKLOP -- Last October 2023 barangay election ay nagpakita ng pagka-astig si Comelec Chairman George Garcia na talaga namang sangkaterbang barangay officials na kandidato ang sinampahan niya ng kasong disqualification dahil sa premature campaigning o pangangampanya kahit hindi pa nag-i-start ang campaign period. Pero sa premature campaigning ngayon ng mga kakandidato sa pagkasenador na halos araw-araw ay nakikita na ang mga mukha sa mga political ads nila sa telebisyon, eh, ang Comelec chairman, “nganga” lang.

Ibig sabihin, pasikat lang pala ang ginawang paghihigpit ni Garcia, noon kasi alam niyang kayan-kayanin lang niyang “i-bully” ang mga barangay official na kandidato, pero sa mga senatorial candidates ay tiklop siya, at ang nakikita nating dahilan kaya dedma lang ang Comelec chairman sa premature campaigning ng mga kakandidato sa pagkasenador, lalo na ‘yung mga re-electionist for senator, ay baka sa takot na bawasan ng mga senador ang budget ng Comelec next year, boom!

XXX

ANG TUMUTULONG SA MAGULANG, MABUTING TAO, PERO ANG HINDI TUMUTULONG, WALANG KUWENTANG TAO -- Isa sa mainit na paksa ngayon sa social media ay kung obligasyon ba ng anak na tulungan ang kanyang mga magulang kapag siya ay nagkatrabaho, nagkanegosyo o naging milyonaryo sa kanyang pinasok na career.

May mga nagsasabing hindi at may nagsasabing oo.

Du’n sa mga nagpapahayag na oo, obligasyon ng anak na tumulong sa mga magulang, sila iyong mga mabubuting tao, at ‘yun namang mga nagsasabing hindi obligasyon ng anak na tumulong sa mga magulang at dedma lang, sila naman ‘yung mga walang kuwentang tao, period!