Legal na STL sa Caloocan, lugi dahil sa raket na STL-bookies at lotteng nina ‘Carlo’ at ‘Oye’

ni Pablo Hernandez @Prangkahan | Oct. 14, 2024

LEGAL NA STL MAY AMBAG SA HEALTH CARE AT KITA SA CALOOCAN CITY, PERO ANG RAKET NA STL-BOOKIES AT LOTTENG SA BULSA NINA GAMBLING LORDS ‘CARLO’ AT ‘OYE’ NAPUPUNTA -- Mula nang mag-operate ang raket na STL-bookies, lotteng at EZ-2 nina alyas “Carlo” at “Oye” sa Caloocan City ay nakakaranas na raw ng pagkalugi ang legal na Small-Town Lottery (STL) sa lungsod na ito.

Ang legal na STL ay nagpapasok ng buwis sa pamahalaan para sa health care ng mga mahihirap na Pinoy na may sakit, samantalang ang kinikita ng mga gambling lords na sina “Carlo” at “Oye” sa kanilang raket na STL-con jueteng, lotteng at EZ-2 ay sa sariling bulsa nila napupunta.

Panawagan natin kina Maj. Gen. Sidney Hernia ng National Capital Regional Police Office (NCRPO) at Brig. Gen. Rizalito Gapas ng Northern Police District (NPD) na ipaaresto ang dalawang gambling lords na ito para hindi tuluyang malugi ang legal na STL na nagbibigay ng pondong pang-health care sa Caloocan City, period!

XXX

KASIRAAN SA MAG-AMANG CONG. OCA AT MAYOR ALONG MALAPITAN GINAGAWA NG 2 GAMBLING LORDS KAYA’T DAPAT IPAHULI KAY COL. DOLES ANG 2 ILEGALISTA -- May impormasyon na habang nagpapataya raw ng STL-con jueteng, lotteng at EZ-2 sa mga bahay-bahay ang mga kubrador nina "Carlo" at "Oye" ay sinasabayan daw ng mga ito ang pangangampanya pabor sa mag-amang Cong. Oca Malapitan at Mayor Along Malapitan.

Malamang, ang ginagawang ito nina "Carlo" at "Oye" ay para masira ang pangalan ng mag-amang Malapitan kasi sa totoo lang ay bad tingnan na may mga ilegalistang nangangampanya para sa mga pulitiko.

Kaya’t kapag nalaman ng mag-amang Malapitan ang ginagawa nina "Carlo" at "Oye" ay tiyak uutusan ng mga ito si Caloocan City chief of police, Col. Paul Doles na dakpin sina "Carlo" at "Oye" pati ang kanilang mga kubrador, abangan!

XXX

BAGO NA ANG RD NG CENTRAL LUZON, PERO JUETENG SA GAPO TULOY PA RIN ANG OPERASYON -- Bago na ang regional director ng Central Luzon sa katauhan ni PNP-Region 3 Director, Brig. Gen. Red Maranan, pero ang jueteng sa Olongapo City ay hindi pa rin natitigil, walang otoridad na nanghuhuli sa mga kubrador ng jueteng sa Gapo.

Kailan kaya ipag-uutos ni Gen. Maranan ang pagpapahuli sa mga maghu-jueteng sa Gapo? Abangan!

XXX

RAKET NA SAKLA SA MUNTINLUPA CITY AT LAS PINAS CITY, KASIRAAN KINA MAYOR RUFFY BIAZON AT MAYOR MEL AGUILAR -- Lantaran na naman daw ang raket na sakla ni "Walter" sa Muntinlupa City at nina "Rodel," "Jake" at "Joseph" sa Las Pinas City.

Sa totoo lang, ngayong panahon ng eleksyon ay malaking kasiraan kina Muntinlupa City Mayor Ruffy Biazon at Las Pinas City Mel Aguilar na may mga saklaang namamayagpag sa kanilang mga nasasakupan, kaya’t ang dapat nilang gawin ay hilingin kay Southern Police District (SPD) Director, Brig. Gen. Leon Rosete na hulihin ang mga magsasaklang ito sa kanilang mga jurisdiction, period!

Misis ni Roque, kapag ‘di pa dumalo sa hearing, malamang ideklara ng QuadComm na pugante

ni Pablo Hernandez @Prangkahan | Oct. 13, 2024

HINDI P100M, KUNDI P1M LANG ANG NAKAWIN SA KABAN NG BAYAN, DAPAT MA-DEATH PENALTY NA -- Sinabi ni CIVAC Partylist Rep. Eddie Villanueva na magsusulong siya ng panukalang batas na magpapataw ng parusang kamatayan sa mga politician at government official na mapapatunayang nagnakaw sa kaban ng bayan ng P100 million.

Pambihira, eh bakit naman kailangang P100M ang ninakaw sa kaban ng bayan para ma-death penalty? Sana kahit P1M lang ang ninakaw, ma-death penalty na kasi pera ng bayan ang kinulimbat nito, period!

XXX

PANG-UNGGOY LANG SA PUBLIKO PROMISE NG MGA REELECTIONIST NA PABABABAIN NILA ANG PRESYO NG BILIHIN -- May mga reelectionist sa pagka-senador ang nangangako na naman na magsusulong ng batas para maging mura raw ang presyo ng mga bilihin.

Malinaw na ang ganitong pangako ay pang-uunggoy lang sa publiko para sila ay iluklok uli sa Senado ng mga botante, kasi kung bukal sa kanilang kalooban ang hangaring mapababa ang presyo ng mga bilihin, eh bakit hindi sila nagsulong ng ganyang panukalang batas noong unang maupo sila sa pagka-senador?

Panawagan natin sa publiko na ang sinumang reeleksyunista sa pagka-senador ang mangangako na magsusulong ng batas para maging mura ang presyo ng mga bilihin, ang dapat sa mga ‘yan ay ibasura sa halalan dahil pang-uunggoy lang sa mga botante ang ganyang promise, boom!

XXX

PANUKALA NI SEN. KOKO PIMENTEL NA BAGUHIN ANG PARTYLIST SYSTEM SA BANSA DAPAT SUPORTAHAN NG MGA KAPWA SENADOR -- Nais ni Sen. Koko Pimentel na gumawa ng panukalang batas na mabago ang kalakaran sa partylist system sa bansa, kasi kapuna-puna raw na ang karamihan sa mga naluluklok na partylist sa Kamara ay hindi kumakatawan sa marginalized sector.

Dapat suportahan ng mga senador ang panukalang ito ni Sen. Pimentel para sa mga susunod na eleksyon ay bawal nang sumali ang mga partylist ng mga trapo (traditional politician), at ang papayagan na lang lumahok ay mga partylist na totoong may nire-represent na marginalized sector, period!

XXX

HINDI LANG SI HARRY ROQUE, BAKA PATI MISIS NIYA IDEKLARA NA RIN NG QUAD COMMITTEE NA PUGANTE -- Pinatawan ng contempt ng Quad Committee ng Kamara ang misis ni former presidential spokesman Harry Roque na si Mylah Roque at dahil diyan ay asahan nang ang kasunod nito ay arrest order laban kay Mrs. Roque.

Kaya kapag sa susunod na House hearing ay hindi pa rin sumipot si Mrs. Roque ay malamang tulad ng kanyang mister na si Harry Roque ay pareho na silang ideklara ng Quad Committee na mga pugante sa Kamara, boom! 

Good News: Presyo ng bigas mababa na, bad news: Iilang Kadiwa store lang mabibili ng mura

ni Pablo Hernandez @Prangkahan | Oct. 12, 2024

PANALO ANG MASANG PINOY KINA SEN. BONG GO, MANONG CHAVIT SINGSON AT TV HOST WILLIE REVILLAME -- Sa mga bagong kakandidato sa pagka-senador ay sina former Gov. Chavit Singson at TV host Willie Revillame ang may mga statement na masasabing mula sa puso talaga nila para sa ikabubuti ng mga mahihirap at masang Pilipino ang siyang naging dahilan kung kaya’t lalahok sila sa senatorial election next year.

Ayon kay Manong Chavit, manalo o matalo man, itutuloy niya ang e-jeep, e-tricycle at e-motorcycle modernization program para sa mga masang tsuper nang walang down payment at zero interest, na ang ipupuhunan niya rito ay magmumula sa sarili niyang Vigan Bank sa Amerika at Pilipinas, at sabi naman ni Revillame ay hindi na umano niya nagugustuhan ang bangayan sa gobyerno, ang pabida ng mga senador na kinalimutan na ang mga maralita, kaya’t gagawa raw siya ng batas para sa mga mahihirap sa mga laylayan ng lipunan.

Kapag naging senador sina Manong Chavit at Revillame, plus may Sen. Bong Go pa na reelectionist na siyang gumawa ng batas na Malasakit Center at Super Health Center, para sa mahihirap ay siguradong panalo rin ang masang Pinoy, period!

XXX

ANJO YLLANA, PARANG TURUMPONG KANDIDATO -- Sa mga artistang pulitiko, si Anjo Yllana ang parang turumpong kandidato na ikot nang ikot.

Unang sabak niya sa pulitika ay nanalo siyang city councilor ng Paranaque City noong year 1998, tapos naging vice mayor din ng lungsod noong year 2004. Pagkaraan niyan ay kumandidato siyang city councilor ng Quezon City noong year 2013 at pinalad na manalo, at noong 2022 election ay nag-file siya ng candidacy for congressman ng Camarines Sur pero nag-withdraw, at sa darating na 2025 midterm election ay pagka-vice mayor naman ng Calamba City ang kanyang tatakbuhan, he-he-he!

XXX

KAPAG MAY BIGTIME OIL PRICE HIKE, KABUNTOT NIYAN BIGTIME TAAS-PRESYO NG MGA BILIHIN AT BAYARIN -- May bigtime oil price hike na naman next week (Oct. 15), P2.21 kada litro ang itataas sa presyo ng gasolina, P2.37 sa kada litro ng diesel at P2.48 sa kada litro ng kerosene.

Kapag nagkaroon ng bigtime oil price hike, ang kabuntot niyan ay pagtaas din ng inflation rate at dahil diyan asahan na magkakaroon din ng bigtime taas-presyo sa mga bilihin at bayarin, nakupo!

XXX

GOOD NEWS: MABABA NA ANG BIGAS, BAD NEWS: SA IILANG KADIWA STORES LANG PALA MABIBILI ANG MURANG PRESYO NG BIGAS -- Good news! Ibinida ng Malacanang na mababa na raw ang presyo ng per kilo ng bigas sa bansa.

Bad news! Sa mangilan-ngilang Kadiwa stores lang makakabili ng murang bigas, hindi sa lahat ng pamilihan, hindi sa palengke, hindi sa mga grocery, boom!