Makabagbag-damdaming statement ni ex-P-Duterte sa itinuring na mga kaibigan

ni Pablo Hernandez @Prangkahan | Oct. 21, 2024

STATEMENT NI EX-P-DUTERTE, MAKABAGBAG-DAMDAMIN PATUNGKOL SA MGA ITINURING NIYANG MGA KAIBIGAN -- Mga dating kaalyado at kaibigan ng pamilya Duterte ang mga miyembro ng Quad Committee ng Kamara na sa ngayon ay umaatake sa mag-amang ex-P-Duterte (sa isyu ng EJK o extrajudicial killings) at Vice Pres. Sara Duterte (sa isyu ng confidential fund).

Dahil diyan ay nagbigay ng makabagbag-damdaming statement si ex-P-Duterte patungkol sa mga itinuring niyang mga kaibigan, na ayon sa kanya ay ang tunay na takbo ng buhay, may mga marupok na pagkakaibigan at pagkakaibigang walang matibay na pundasyon, tsk!

XXX

AYON KAY VP SARA, ‘MANGGAGAMIT’ SI PBBM AT KAPAG NAPAKINABANGAN NA ANG GINAMIT, ITSAPWERA NA -- Sa presscon ni VP Sara ay sinabi niyang ginamit lang siya ni Pres. Bongbong Marcos (PBBM) sa kanilang “UniTeam” para matiyak ang panalo sa pagka-presidente laban kay dating VP Leni Robredo.

Ang nais ipunto ni VP Sara sa sinabi niyang ito ay ‘manggagamit’ si PBBM, na kapag napakinabangan na ang ginamit ay iitsapwera na tulad nang ginawa sa kanya ngayon ng Marcos admin, period!

XXX

MGA ANTI-DYNASTY GROUP, DAPAT SA SC MAGSAMPA NG DISQUALIFICATION SA MGA ‘KAMAG-ANAK INC.’ AT HINDI SA COMELEC -- May iba’t ibang cause-oriented groups ang nagsampa sa Comelec ng disqualification case laban sa mga political dynasty o “Kamag-anak Inc.” na sabayang kakandidato sa darating na May 2025 midterm election.

Sana sa Supreme Court (SC) nagsampa ng kaso ang mga cause oriented groups na ito at baka sakaling maaksyunan at hindi sa Comelec, kasi sa totoo lang ang Comelec ang sanhi kaya sandamakmak ang political dynasty ngayon dahil lahat ng mga magkakapamilyang pulitiko na sabayang kumakandidato sa kada eleksyon, sa halip na i-reject ang kandidatura ng mga ito ay inaaprub, boom!

XXX

NASA KONSTITUSYON NA BAWAL ANG POLITICAL DYNASTY KAYA’T DAPAT MISMONG SC NA MAGPAIRAL NITO -- Sa 1987 Constitution, sa Artikulo II, Seksyon 26 ay may nakasaad dito na ganito... “Dapat siguruhin ng Estado ang pantay na pag-uukol ng mga pagkakataon para sa lungkurang pambayan, at ipagbawal ang mga dinastiyang politikal, ayon sa maaaring ipagkahulugan ng batas.”

Malinaw sa Konstitusyon na ipinagbabawal ang political dynasty sa ‘Pinas, ang problema ay ayaw lang gumawa ng batas ang mga senador at kongresista para ipairal ito, kasi nga karamihan sa mga sen. at cong. ay may mga “Kamag-anak Inc.” sa gobyerno.

Ang nais nating ipunto rito, dapat sa SC magsampa ang mga petitioner ng disqualification case laban sa political dynasty, at baka sakali na dahil ayaw sundin ng mga sen. at cong. ang nakasaad sa Konstitusyon ay mismong ang Korte Suprema na ang magdesisyong sundin ang nasa Saligang Batas na bawal na ang “Kamag-anak Inc.” sa pulitika sa ‘Pinas, period!

VP Sara, kung sinunod payo ng ama na tumakbong presidente, sana siya ang pangulo hindi si PBBM

ni Pablo Hernandez @Prangkahan | Oct. 19, 2024

MAAARING NGAYON NAPAGTANTO NI VP SARA NA MALI ANG DESISYONG MAG-VP, KUNG PRESIDENTE ANG TINAKBUHAN SANA SIYA ANG PANGULO HINDI SI PBBM -- Durog na durog na ang pagkatao ng mag-amang ex-P-Duterte at Vice President Sara Duterte-Carpio sa mga atake sa kanila ng Quad Committee ng Kamara kaugnay sa isyung extrajudicial killings (EJK) sa dating presidente at confidential fund sa bise presidente.

Marahil, ngayon ay napagtanto ni VP Sara na mali ang naging desisyon niyang makipag-unity at tumakbong VP ni Pres. Bongbong Marcos (PBBM) kasi kung sinunod lang niya (VP Sara) ang payo sa kanya ng amang si ex-P-Duterte na tumakbo siya sa pagka-presidente noong 2022 presidential election, siguradong siya ang pangulo ngayon at hindi si PBBM, period!

XXX

UNFAIR KAY VP SARA NA CONFI FUND LANG NIYA ANG INIIMBESTIGAHAN, DAPAT IMBESTIGAHAN DIN NG QUAD COMMITTEE ANG CONFI FUND NI PBBM, KUNG SAAN ITO GINASTA NG PRESIDENTE -- Talagang todo-pabida ang mga miyembro ng Quad Committee sa pag-iimbestiga kung saan ginasta ni VP Sara ang kanyang confidential fund.

Aba teka, hindi lang naman si VP Sara ang nagkaroon ng confidential fund last year (2023), kundi pati si PBBM.

Napaka-unfair naman iyan kay VP Sara, kasi dapat hindi lang ‘yung confi fund niya ang iniimbestigahan ng QuadComm, kundi pati confi fund ni PBBM kung saan ito ginasta ng presidente, boom!

XXX

TINABLA NI SP CHIZ ANG NAIS NI SEN. DELA ROSA NA MAG-IMBESTIGA SA EJK KASI MARCOS ADMIN NGAYON, PERO KUNG DUTERTE ADMIN, APRUB ITO SA SENATE PRESIDENT -- Tinabla ni Senate President Chiz Escudero ang nais ni Sen. Ronald “Bato” Dela Rosa, chairman ng Senate Committee on Public Order and Dangerous Drugs na tapatan ang imbestigasyon ng QuadComm tungkol sa isyung EJK noong panahon ng Duterte administration dahil ayon sa Senate president ay magiging bias lang daw ito, kasi sa panahon ni Sen. Dela Rosa bilang chief PNP pa noon nagsimula ang sinasabing EJK sa bansa.

Sa totoo lang tayo, na kaya tinabla ni SP Chiz si Sen. Dela Rosa ay dahil Marcos admin ngayon, pero kung nagkataon na si VP Sara Duterte ang naging presidente, malamang aprub sa Senate president ang request ni “Bato” na imbestigahan ang EJK sa bansa, period!

XXX

KAPAG ‘DI HINARAP NI HARRY ROQUE KASONG ISASAMPA SA KANYA NG PAOCC, MALAMANG IDEKLARA SIYANG MOST WANTED NG ‘PINAS -- Inanunsyo ng Presidential Anti-Organized Crime Commission (PAOCC) na sasampahan na nila ng kasong qualified trafficking in person si former presidential spokesman Harry Roque kaugnay sa pagkakasangkot nito sa ilegal na operasyon ng Philippine Offshore Gaming Operator (POGO) sa Porac, Pampanga.

Ang kasong qualified trafficking in person ay criminal case at ito ay walang piyansa, kaya kapag naisampa na ang kasong ito kay Roque at kapag ito ay hindi niya hinarap, hindi lang siya magiging pugante sa Kamara, kundi malamang maitatala pa siyang most wanted criminal ng ‘Pinas, boom!

Alin kaya ang aabangan ng publiko, ‘Bato’ Committee o QuadComm sa isyu ng EJK?

ni Pablo Hernandez @Prangkahan | Oct. 18, 2024

MAAARING TAMA SI PANELO, MAY NAG-UTOS LANG KAY GARMA NA IDIIN SI EX-P-DUTERTE SA EJK, KASI NOON TODO-DENY SIYA, PERO NGAYON TODO-DIIN NA SA EX-PRESIDENT -- Paniwala ni former presidential legal counsel Salvador Panelo, habang nakakulong sa Kamara si former Philippine Charity Sweepstakes Office (PCSO) General Manager, ret. P/Col. Royima Garma ay may nag-utos dito para idiin si ex-P-Duterte sa extrajudicial killings (EJK) sa bansa noong panahon ng Duterte administration.

Maaari nga, kasi noong unang pagharap ni Garma sa Kamara ay todo-deny siya sa isyu ng EJK na kinasasangkutan niya sa panahon ng Duterte admin, pero sa sumunod na pagharap nito sa imbestigasyon ng Quad Committee, aba’y iba na ang tono nito, idinidiin na si ex-P-Duterte sa reward system na EJK sa bansa, tsk!

XXX

QUAD COMMITTEE ‘IN AID OF ELECTION’ PARA SIRAIN SI EX-P-DUTERTE AT MGA KANDIDATO NITO SA PAGKA-SENADOR -- Noong una inakala ng publiko na ang isinasagawang imbestigasyon ng Quad Committee sa EJK sa panahon ng Duterte admin ay para ‘yung mga ebidensyang makakalap ay dadalhin sa International Criminal Court (ICC) bilang dagdag-ebidensya sa mga may kaso ng crime against humanity sa ICC, ‘yun pala ay hindi, kasi mismong si QuadComm chairperson Rep. Ace Barbers na ang nagsabi na hindi raw nila ibibigay sa ICC ang ilalabas nilang committee report dahil hindi naman na raw member ng ICC ang ‘Pinas.

Dahil diyan, sinabi ni former presidential spokesman Rigoberto Tiglao na itong imbestigasyon ng QuadComm ay maituturing na “in aid of elections” para siraan si ex-P-Duterte at mga kandidato nito sa pagka-senador na sina reelectionists Sen. Bong Go, Sen. Ronald Dela Rosa at iba pang kandidatong malapit sa dating presidente, period!

XXX

PANINIRA KAY SEN. BONG GO, WALANG TALAB KASI SA LATEST SURVEY, SA TOP 12 CANDIDATE, RANK 5 SIYA -- Kahit anong paninirang gawin kay Sen. Bong Go ay walang talab.

Sa latest survey kasi ng Tangere Research Firm ay pasok pa rin sa top 12 si Sen. Bong Go, rank 5 siya.

Ang dahilan kaya walang talab kay Sen. Bong Go ang mga paninira sa kanya ay dahil may nagmarka sa isipan ng publiko na kanyang nagawa, at ito ay ang Malasakit Center free hospitalization sa mga public hospital, na ayon sa data ng Dept. of Health (DOH) ay higit 15 milyong pamilyang Pinoy na ang naserbisyuhan, palakpakan naman diyan!

XXX

‘BATO’ COMMITTEE VS. QUAD COMMITTEE SA EJK -- Nagdesisyon na si Sen. Ronald “Bato”Dela Rosa, chairman ng Senate Committee on Public Order and Dangerous Drug na magsagawa ng imbestigasyon sa EJK sa bansa upang tapatan ang imbestigasyon ng QuadComm para raw mas malaman ng mamamayan ang katotohanan tungkol sa sinasabing EJK sa panahon ng Duterte admin.

Ayos iyan ah, tingnan nga natin kung alin ang mas magiging klik o “hit” na panonoorin ng publiko, ang “Bato” Committee o ang Quad Committee, abangan!