PBBM, ayaw ng magarbong X-Mas party sa gobyerno pero pa-concert sobrang bongga

ni Pablo Hernandez @Prangkahan | Nov. 22, 2024

PINEPERSONAL NA BA NG MARCOS ADMIN ANG PAMILYA DUTERTE? -- Sa rekomendasyon ni Kabataan Partylist Rep. Raoul Manuel ay inaprubahan ng House Committee on Good Government and Public Accountability ang pagkuha ng mga dokumento na may kaugnayan sa confidential fund ni dating DepEd secretary, Vice Pres. Sara Duterte-Carpio upang imbestigahan din ng Kamara kung nagamit ito sa tama.

Kapag pati ang confidential fund ni Davao City Mayor Baste Duterte ay kuwestiyunin na rin ng Kamara, isa lang iisipin ng publiko at ito ay pinepersonal na ng Marcos administration ang pamilya Duterte, kasi si ex-P-Duterte ay iniimbestigahan sa extrajudicial killings (EJK), si Davao City Rep. Paolo Duterte at bayaw nito na si Atty. Mans Carpio na mister ni VP Sara ay iniuugnay sa drug shipment at si VP Sara sa confidential fund, period!

XXX

AYAW NI PBBM MAGING MAGARBO ANG X-MAS PARTY NG MGA TAONG-GOBYERNO, PERO KAPAG SIYA NAGPA-CONCERT SA MALACANANG SOBRANG BONGGA -- Na-bash na naman sa social media si Pres. Bongbong Marcos (PBBM) kaugnay sa panawagan niya sa mga departamento ng gobyerno na iwasang maging magarbo ang pagdaraos nila ng Christmas party.

Maba-bash talaga ang Presidente, kasi kapag nagpapa-concert siya sa Malacanang ay sobrang bongga, tapos ang mga empleyado ng gobyerno ay pagsasabihan niyang huwag gawing magarbo ang x-mas party, boom!

XXX

SANA ANG BAGONG PILIPINAS SERBISYO FAIR NI SPEAKER ROMUALDEZ AY WALANG BAHID-PULITIKA PARA SA KANDIDATURA NG MGA SENATORIAL CANDIDATE NI PBBM -- Inanunsyo ni Speaker Martin Romualdez na sa unang quarter daw ng year 2025 ay 13 probinsya ang pupuntahan ng “Bagong Pilipinas Serbisyo Fair” (BPSF) para magdala ng ayuda sa mga residente sa mga lalawigang ito.

Sana walang bahid-pulitika ang gagawing ‘yan ni Romualdez dahil kung mayroon man para ikampanya ang mga kandidato sa pagka-senador ng Marcos administration ay bad iyan, kasi pera ng bayan ang ginagamit na pondo ng BPSF at hindi ‘yan pera ng mga pulitiko, period!

XXX

KAHIT BAWAL ANG ‘UKAY-UKAY’ SA ‘PINAS, PARAMI NANG PARAMI PA RIN ANG NAGTITINDA NITO -- Habang nalalapit ang Pasko ay parami rin nang parami ang mga “ukay-ukay” na ibinebenta sa merkado.

Ang “ukay-ukay” o second hand clothes ay ipinagbabawal na ibenta sa ‘Pinas, base sa RA 4653, at ang sinumang lalabag sa batas na ito ay may parusang 2 taon hanggang 5 taon na pagkabilanggo at multang P20,000.

Hanggang walang ginagawang aksyon si Customs Commissioner Bienvenido Rubio laban sa mga “ukay-ukay” smugglers na sina alyas "Gerry," "Joel," "John Paul," "Janjan," "Ringgo," "Jimpol," "Egay," "Tina U.," "Bebang," "Big Mama" at "Kimberly" ay asahan nang lalo pang dadami ang mga panindang “ukay-ukay” sa bansa, boom!

‘Pinas, top 5 palautang na bansa sa buong mundo, grabe!

ni Pablo Hernandez @Prangkahan | Nov. 21, 2024

SA RATING NI SPEAKER ROMUALDEZ, NAGBU-BOOMERANG ANG ATAKE NG QUADCOMM KAY VP SARA -- Ang laki ng lamang ni Vice Pres. Sara Duterte-Carpio kay Speaker Martin Romualdez sa rating na inilabas ng WR Numero Research Firm patungkol sa 2028 presidential election.

Ang rating ni VP Sara ay 24% at ang rating naman ni Speaker Romualdez ay 1% lang.

Tila hindi kay VP Sara tumatama ang mga imbestigasyon ng Quad Committee ng Kamara, kasi kung pagbabasehan ang 1% lang na rating ni Speaker Romualdez ay lumalabas na sa kanya nagbu-boomerang ang mga atake ng QuadComm members sa bise presidente, boom!

XXX

SANA MAG-AMBAGAN DIN ANG QUADCOMM MEMBERS SA PAGBIBIGAY NG TULONG SA MGA BINAGYO AT BINAHA -- Pinag-ambag-ambagan pala ng mga kongresistang miyembro ng QuadComm ang P1 million na pabuya sa sinumang makapagtuturo sa kinaroroonan ng isang “Mary Grace Piattos” na kabilang daw sa nakatanggap ng reward mula sa confidential fund ni VP Sara.

Kung nagawa ng mga QuadComm member na mag-ambagan para sa pagkakakilanlan ng isang “Mary Grace Piattos,” sana naman mag-ambagan din sila sa pagbibigay ng tulong sa mga kababayang nabiktima ng bagyo at baha, period!

XXX

NEXT YEAR PA NAMAN GAGAMITIN ANG 2025 PAMBANSANG BADYET PERO MALACANANG ATAT NA ATAT NA SA P6.352T NATIONAL BUDGET -- Habang binubusisi ng mga senador ang mga tanggapan ng pamahalaan na magpaparte-parte sa pambansang badyet next year na P6.352 trillion, ay inatasan ng Malacanang ang Senado na madaliin ang pagsasabatas ng 2025 national budget.

Pambihira naman, eh next year pa naman gagastahin ang pambansang badyet na iyan, tapos napaghahalata ang Malacanang na atat na atat, gusto na agad “mapasakamay” ang P6.352 trillion national budget na iyan, tsk!

XXX

KAKAHIYA KASI SA MGA BANSA SA MUNDO, ‘PINAS PASOK SA TOP 5 PALAUTANG SA IBRD -- Sa data na inilabas ng World Bank, sa mga bansa sa mundo, pasok ang Pilipinas sa top 5 borrowers sa International Bank for Reconstruction and Development (IBRD).

Kakahiya, kasi mantakin n’yo, pasok ang Pinas sa top 5 na mga bansang palautang sa IBRD.

Hangga’t hindi natututo ang majority Pinoy voters sa tamang pagboto sa magiging lider ng bansa, ay baka dumating ang panahon na ang ‘Pinas na ang mag-top sa mundo na palautang na bansa, boom!

Atake ng QuadComm kay VP Sara, wa’ epek dahil front-runner pa rin sa 2028 Election

ni Pablo Hernandez @Prangkahan | Nov. 20, 2024

WALANG EPEKTO KAY VP SARA ANG MGA ATAKE NG QUADCOMM DAHIL SA SURVEY FRONT-RUNNER PA RIN SIYA SA 2028 PRESIDENTIAL ELECTION -- Sa inilabas na survey ng WR Numero Research Firm ay nagtabla sina Vice President Sara Duterte-Carpio at Sen. Raffy Tulfo sa iskor na 24% para sa 2028 presidential election.

Ibig sabihin niyan, walang epekto sa popularidad ni VP Sara ang mga atake sa kanya ng mga Quad Committee member kasi kung susuriin kahit nag-tie sila ni Sen. Tulfo sa iskor ay mataas pa rin ang nakuha niyang rating na nangangahulugan na front-runner pa rin siya sa 2028 election, period!

XXX

RATING NI SPEAKER ROMUALDEZ 1% LANG, KAYA ‘SUNTOK SA BUWAN’ NA MAGING PRESIDENTE SIYA SA 2028 ELECTION -- Ito ang kabuuan ng mga pangalan na nasa 2028 presidential survey ng WR Numero Research Firm, tabla sa 24% sina VP Sara at Sen. Tulfo, 9% si former VP Leni Robredo, 5% si Sen. Grace Poe, 5% si Sen. Imee Marcos, 4% si Sen. Risa Hontiveros, 4% si former Sen. Manny Pacquiao, 3% si Sen. Robin Padilla at 1% si Speaker Martin Romualdez.

Sa mga pangalang ito, si Speaker Romualdez ang posibleng “manukin” ni Pres. Bongbong Marcos (PBBM) sa 2028 presidential election, at kung ang magiging resulta ng survey bago sumapit ang pampanguluhang halalan ay laging ganito ang iskor na makukuha niya (Speaker Romualdez), ay “suntok sa buwan” na maging presidente ang ‘manok’ ni PBBM, boom!

XXX

OA ANG ALOK NA P1M NG QUADCOMM SA MAKAPAGTUTURO KAY ‘MARY GRACE PIATTOS’ -- Nag-alok ang mga miyembro ng QuadComm ng Kamara ng reward na P1 million sa sinumang makapagbibigay ng impormasyon sa kinaroroonan ng nagngangalang “Mary Grace Piattos” na ayon daw sa isinumiteng resibo ng Office of the Vice President (OVP) sa Commission on Audit (COA), ay kabilang daw ito (Mary Grace Piattos) sa nakatanggap ng confidential fund ni VP Sara.

Napaka-OA (overacting)  naman ng QuadComm kasi may kapangyarihan naman silang alamin sa Philippine Statistics Authority (PSA) kung may ganyang pangalang nakarehistro sa kanilang tanggapan at hindi na kailangan umepal pa at mag-alok ng P1 milyong pabuya patungkol sa impormasyon ng kinaroroonan ng hinahanap nilang “Mary Grace Piattos,” period!

XXX

EX-P-DUTERTE, TUTULUYAN NG MARCOS ADMIN SA MGA KASONG MAY KINALAMAN SA EJK -- Matapos irekomenda ni QuadComm member, Batangas 2nd Dist. Rep. Jinky Luistro na sampahan ng mga kasong kriminal si ex-P-Duterte, ay kinumpirma na ni Sec. Boying Remulla ng Dept. of Justice (DOJ) na iniimbestigahan na ng DOJ-Task Force ang mga tila naging paglabag ni ex-P-Duterte sa International

Humanitarian Law na may kaugnayan sa extrajudicial killings (EJK) sa panahon ng Duterte administration.

Ibig sabihin niyan, talagang tutuluyan ng Marcos admin si ex-P-Duterte na masampahan ng kasong may kinalaman sa EJK, tsk!