US at 'Pinas, joint forces para mahanap ang dinukot na American vlogger

ni Angela Fernando @Overseas News | Oct. 20, 2024

Photo: PNP via AP

Mahigpit na nakikipagtulungan ang pamahalaan ng United States (US) sa mga lokal na otoridad sa 'Pinas para hanapin si Elliot Eastman, isang Amerikanong vlogger na dinukot sa Zamboanga del Norte, ayon sa pahayag ng US Embassy.

“When a U.S. citizen is missing, we work closely with local authorities as they carry out their search efforts, and we make every effort to keep lines of communication open with families,” pahayag ng US embassy.

“The Department of State has no higher priority than the welfare and safety of U.S. citizens abroad,” dagdag pa nito.

Gayunman, hindi nagbigay ng karagdagang detalye ang nasabing embassy hinggil sa ginagawang paghahanap sa vlogger dahil sa mga pribadong impormasyong kadikit nito.

“We are monitoring the situation. However, due to privacy and other considerations we have no further comment at this time,” paglilinaw nila.

Magugunitang kinumpirma ng Police Regional Office 9 (PRO-9) kamakailan na dinukot ng apat na lalaking nagpanggap bilang mga alagad ng batas ang 26-anyos na Amerikanong si Elliot Eastman nu'ng Oktubre 17.

Si Eastman ay kinuha mula sa bahay ng kaniyang mga biyenan sa isang sitio sa bayan ng Sibuco. Sa nakaraang livestream ng nawawalang vlogger, nabanggit nitong hindi siya gusto sa kanilang lugar at may mga posibleng banta laban sa kanya.

FB at IG, may dagdag-security vs. sextortion

ni Angela Fernando @Technology | Oct. 18, 2024

Feature: Mas mahigpit, sa mga maaaring mag-follow o makipag-message sa mga account ng mga kabataan, pati na rin ang mga safety notice sa Instagram direct messages at Facebook Messenger. Logo: FB / IG

Inanunsyo ng Meta, ang kumpanyang may hawak sa Facebook at Instagram, kamakailan ang mga bagong hakbang upang labanan ang sextortion, isang uri ng online blackmail kung saan pinipilit ng mga kriminal ang mga biktima, kadalasan mga kabataan, na magpadala ng mga malaswang larawan ng kanilang sarili.

Kabilang sa mga hakbang ang mas mahigpit na kontrol sa mga maaaring mag-follow o makipag-message sa mga account ng mga kabataan, pati na rin ang mga safety notice sa Instagram direct messages at Facebook Messenger kadikit ng mga kahina-hinalang pag-uusap mula sa ibang bansa.

Pinalakas din ng mga bagong hakbanging ito ang "Teen Accounts" ng Instagram, na unang ipinakilala nu'ng nakaraang buwan na layuning protektahan ang mga menor-de-edad mula sa mga panganib na kaugnay ng photo-sharing application.

Microsoft, kinasuhan ng video gamers

ni Angela Fernando @Technology | Oct. 16, 2024

Nai-close ng tech giant company na Microsoft ang $69 Billion Activision-Blizzard deal nitong taong 2023. Photo: Esports gaming image - Patrick T. Fallon / Bloomberg / Circulated - NYT

Nagsampa ng kaso ang ilang mga video gamers laban sa $69-bilyong pagbili ng Microsoft sa "Call of Duty" developer na Activision Blizzard dahil makakasama raw ito sa kompetisyon ng industriya at magtataas ng mga presyo.

Sa magkakasamang pahayag na isinampa sa federal court sa San Francisco kamakailan, iniulat ng mga gamer at Microsoft na isinasara na nila ang kaso "with prejudice," ibig sabihin, hindi na ito maaaring ihain ulit. Hindi naman idinetalye sa dokumento kung paano nalutas ang kaso, at hindi pa nagbibigay ng komento ang mga abogado ng mga nagsampa ng reklamo.

Nagpahayag naman ang Microsoft na nagkaroon ng kasunduan ang dalawang panig, ngunit tumangging magbigay ng karagdagang detalye. Sa nasabing demanda, ang kasunduan ng Microsoft sa pagbili ng Activision ay lumabag sa batas ng antitrust ng United States at dapat agad wakasan.

Matatandaang ang pribadong kaso ay isinampa nu'ng huling bahagi ng 2022, bago pa magsampa ng kaso ang Federal Trade Commission (FTC) na hindi nagtagumpay sa pagpigil sa kasunduan na matuturing na pinakamalaking acquisition sa kasaysayan ng industriya ng gaming.