Bakunadong OFWs, oks na sa HK — Bello

ni Ronalyn Seminiano Reonico | August 23, 2021

Maaari nang makapasok sa Hong Kong ang mga Filipino workers na nabakunahan sa Pilipinas sa susunod na linggo, ayon kay Department of Labor and Employment (DOLE) Secretary Silvestre Bello III noong Linggo.

Matatandaang kamakailan, ang mga nabakunahan lamang na OFWs sa Hong Kong ang pinapapasok sa naturang bansa at hindi tinatanggap ng kanilang pamahalaan ang mga vaccination certificates mula sa mga local government units ng Pilipinas.

Ngunit ayon sa DOLE, sa pakikipag-ugnayan ng ahensiya sa Bureau of Quarantine (BOQ) at Philippine consulate sa HK, inaprubahan na ang pagpapapasok sa mga overseas Filipino workers (OFWs) na bakunado na laban sa COVID-19 ngunit nararapat na ipakita nila ang mga valid vaccine certificates mula sa BOQ.

Ayon kay Bello, 3,000 OFWs ang nakatakdang i-deploy sa Hong Kong.

Samantala, sasailalim umano ang mga OFWs sa quarantine sa mga specified hotels na sasagutin ng kanilang mga employers.

Ayon pa sa kanya, nakikipag-ugnayan na ang pamahalaan ng HK sa mga partner hotels para sa mga iku-quarantine na OFWs.

3,000 OFWs, oks nang lumipad pa-Israel

ni Ronalyn Seminiano Reonico | July 15, 2021

Inalis na ng Department of Labor and Employment (DOLE) ang suspension order sa deployment ng mga migrant workers sa Israel at inaasahang makabibiyahe na papunta sa nasabing bansa ang tinatayang nasa 3,000 overseas Filipino workers (OFWs), ayon kay Secretary Silvestre Bello III.

Noong Mayo, maaalalang sinuspinde ng DOLE ang deployment sa mga migrant workers sa Israel dahil sa alitan sa pagitan ng mga Israeli at Palestinians sa Gaza.

Ayon kay Bello, inalis na ang naturang suspensiyon dahil maayos na ang sitwasyon sa nasabing bansa.

Ani Bello sa teleradyo interview, "'Yung assessment ng Labor attaché namin sa Israel na medyo tumahimik na ang sitwasyon doon at ligtas na ‘yung ating mga OFWs.

"That and an advisory from our Department of Foreign Affairs (DFA) na OK na at lifted na ‘yung kanilang alert Level 3, so puwede nang magpadala. And therefore, on that basis, I issued a directive na i-allow na ang pagde-deploy ng ating mga kababayan sa Israel.

"Ang daming kailangan doon na caregivers, hotel workers at farm workers."

Saad pa ni Bello, “Siguro anytime now, mag-aalisan na ang mga… at the very least, mga 3,000. Nakatengga nga ‘yan dahil du’n sa temporary suspension. So anytime now, aalis na ‘yung ating mga kababayan na matagal nang naghihintay ng kanilang deployment.”

OFWs sa Oman, puwede na uli

ni Lolet Abania | June 22, 2021

Sumang-ayon na ang Pilipinas na bawiin ang deployment ban ng mga manggagawa patungo sa Oman, kapalit ng pagluluwag naman ng naturang bansa sa kanilang entry restrictions para sa mga biyaherong Filipino.

Ayon sa Philippine Overseas Employment Administration (POEA) Administrator Bernard Olalia, ang mga opisyal ng dalawang bansa ay nagpulong kahapon, June 21, upang talakayin ang pagpasok ng mga Filipino sa Oman.

Sinabi ni Olalia, ipinaliwanag ng gobyerno ng Oman na hindi nila intensiyon na i-ban ang pagpasok ng mga overseas Filipino workers (OFWs) sa kanilang bansa, kung saan unang ipinagbawal ang entry ng mga Filipino sa Oman.

Bilang kapalit nito, nakatakdang i-lift ang ibinabang order na pagbabawal sa deployment ng mga Pinoy sa Oman na inianunsiyo ng gobyerno noong nakaraang linggo.

Wala namang ibinigay na timeline si Olalia kung kailan ili-lift ang restriksiyon, subalit posibleng magresulta ito ng pag-aalis ng entry restrictions sa Oman.

“Sa madaling salita po, ‘pag nagkaroon na ng lifting sa Oman at tayo ay nag-lift na, ora mismo makakapagpadala na tayo ng OFWs sa Oman,” ani Olalia.

Ayon pa kay Olalia, mayroong 5,000 OFWs na patungong Oman na umalis na simula January hanggang May, katumbas ng 1,000 kada buwan.