61 Pinoy hotel workers, lumipad na patungong Israel

ni Lolet Abania | June 2, 2022

Nasa 61 Filipino hotel workers ang unang batch, na nakatakda sanang i-deploy ng gobyerno noong 2020 nang tumama ang COVID-19 pandemic sa bansa, ay inaasahang darating sa Israel ngayong Huwebes, ayon sa Department of Migrant Workers (DMW).

Batay sa DMW, ang pagdating ng 61 OFWs sa Holy Land ngayong Hunyo 2 ay bahagi ng inisyal na 500 Pinoy workers na dapat umanong ipadala sa Israel noong 2020.

“As Israel reopens its tourism industry, the Department of Migrant Workers is looking forward to sending more qualified workers to supplement its growing demand in the hospitality sector, while making sure that the best terms and condition for our OFWs are being met,” ani DMW Secretary Abdullah Mama-o sa isang statement.

Binanggit ng opisyal na ang naturang deployment ay bahagi ng umiiral na bilateral labor agreement sa pagitan ng Pilipinas at Israel na nilagdaan noong 2018 kung saan nakasaad, “which allows strengthened protection and employment opportunities to Filipino hotel workers.”

Pinoprotektahan din nito, ang mga OFWs mula sa pagbabayad ng mga excessive fees sa mga pribadong ahensiya dahil ang pag-hire at deployment ng mga ito ay sa ilalim ng tinatawag na government-to-government scheme.

Sinabi rin ng DMW na ang mga na-deploy na OFWs para magtrabaho sa Israel ay maaaring kumita ng minimum salary na 5300 NIS o humigit-kumulang sa P75,000 kada buwan, habang may benefits kabilang dito ang medical insurance at foreign workers deposit funds mula sa kanilang sariling employers.

Ayon pa sa ahensiya, layon nilang mag-recruit ng mas maraming Pinoy hotel workers habang ang Population and Immigration Authority ng Israel ay naghahanap ng ire-recruit naman ng higit pang mga manggagawa na pupuno sa kanilang lumalaking hospitality industry.

Una na ring inanunsiyo ng Israel na kaya nilang mag-accommodate ng 2,000 home-based caregivers, kung saan maaaring kumita ang mga ito ng humigit-kumulang sa P77,000 kada buwan.

Ayon naman kay Israel Ambassador Ilan Fluss, mas gusto ng gobyerno ng Israel ang mga Filipino workers dahil sa anila, ang mga ito ay matitiyaga at masisipag.

“There is a lot of appreciation for the Filipino workers in Israel and hardworking, very loyal, and as you know caregiver is a very sensitive area in taking care of people,” sabi niya.

Para sa OFWs at gov't employees... Housing program, alok ng NHA

ni Zel Fernandez | May 14, 2022

Hinikayat ng National Housing Authority (NHA)-Region 11 na mag-apply sa Government Employees Housing Program ang mga overseas Filipino workers (OFWs) at government employees sa bansa.

Makapagbigay ng disente at murang bahay, ito ang layunin ng nasabing programa para sa mga uniformed personnel ng gobyerno na kinabibilangan ng Armed Forces of the Philippines (AFP), Philippine National Police (PNP), Bureau of Jail Management and Penology (BJMP), Bureau of Fire Protection (BFP), Bureau of Corrections (BOC), at iba pang mga empleyado ng pamahalaan.

Ayon sa pahayag ng NHA, kabilang umano sa mga bahay na iniaalok sa naturang housing program ay mga two-storey duplex units na mayroon anilang sukat na 60 square meters ang floor area at 80 square meters ang lot size.

Pagbabahagi pa ng asosasyon, para sa mga kuwalipikadong aplikante ng kanilang programa ay nasa ₱5,000 ang pinakamababang monthly amortization at wala na umanong down payment.

Habang nasa ₱20,000 naman ang reservation fee kung saan ang unit ay handa na rin anilang tirahan.

Samantala, maaaring bisitahin ang NHA Facebook page upang malaman ang iba pang mga detalye ukol sa Government Employees Housing Program.

Ilang OFWs, 'di pinalabas ng amo... Comelec sa Kamara: Internet voting sa susunod na eleksiyon

ni Zel Fernandez | May 7, 2022

Inaasahan ni Commission on Elections (Comelec) Commissioner George Garcia na maikokonsidera ng Kamara ang pag-apruba sa panukalang magkaroon ng online o internet voting sa mga susunod na eleksiyon.

Kasunod ng isinagawang overseas voting para sa mga botanteng OFWs, layunin ng panukala na mapadali ang paraan ng pagboto ng mga Pinoy na nasa abroad.

Paliwanag ni Garcia, kasalukuyang suliranin sa eleksiyon kapag ang isang OFW ay hindi pinayagan ng employer nito na lumabas para makaboto.

Kaugnay din umano ito sa isang phone-in question mula sa isang overseas Filipino worker sa Saudi Arabia na hindi aniya makaboto dahil hindi pumayag ang amo nito na lumabas siya ng bahay.

Ani Garcia, kung mapapabilang umano ang online o internet voting sa mga paraan kung paano makaboboto sa ibang bansa ang mga Pinoy overseas workers, makakatulong aniya ito upang hindi na maging mahirap ang pagboto ng mga OFWs.

Ito umano ang dahilan kung bakit umaasa si Garcia na maikonsidera ng Kongreso ang internet voting para sa mga overseas voters.

Samantala, tinatayang nasa mahigit 1.6 milyong rehistradong Pilipinong botante ang nasa ibang bansa ngayong 2022 elections.