Reeleksyunistang 3 yrs. ‘nganga’ sa puwesto, ‘wag nang iluklok uli

ni Pablo Hernandez @Prangkahan | Mar. 28, 2025

START NA NG KAMPANYAHAN SA LOCAL ELECTIONS KAYA’T MGA REELEKSYUNISTANG ‘NGANGA’ LANG SA PUWESTO, DAPAT IBASURA SA ELEKSYON -- Simula na ngayong araw ang kampanya ng mga kandidato sa local elections (governor, vice governor, district representatives, board member, mayor, vice mayor, at mga konsehal).

Kaya dapat suriin ng mga botante kung ano ang nagawa ng mga reeleksyunistang kandidato, at kapag nalaman nilang wala namang ginawa sa posisyon sa nakalipas na 3 taon, dapat ibasura na ng mamamayan ang mga ito, kasi kapag nanalo na naman, tiyak 3 taon na namang “nganga” lang ang mga ito sa puwesto, boom!

XXX

HINDI DAPAT IBINIBIDA NG DA ANG P45 PER KILO NG BIGAS DAHIL PARA SA MGA MAHIHIRAP, MAHAL PA RIN ANG GANITONG PRESYO -- Ibinida ng Dept. of Agriculture (DA) na simula raw sa March 31, 2025 ay oobligahin na ang mga rice trader na lagyan ng suggested retail price (SRP) na P45 per kilo ang mga itinitinda nilang bigas sa merkado.

Sa totoo lang, sa mahihirap na pamilya ay napakamahal pa rin ang P45 per kilo ng bigas, kaya hindi dapat ibinibida ‘yan ng DA, mga buset!

XXX

HINDI IA-ABOLISH NI PBBM ANG NTF-ELCAC, PONDO NITO PARANG CONFI FUNDS NA GINAGASTA NG WALANG KAAKIBAT NA RESIBO -- Sa kabila ng mga panawagan ng iba’t ibang sektor ng lipunan na i-abolish na ang red-tagger agency na National Task Force-End Local Communist Armed Conflict (NTF-ELCAC) ay wala raw plano si Pres. Bongbong Marcos (PBBM) na buwagin ang ahensyang ito ng gobyerno.

Hindi talaga ipapabuwag iyan ni PBBM kasi ang inilaang pondo riyan ay mala-confidential fund, ginagasta ng walang kaakibat na resibo sa katuwiran na para raw mapangalagaan ang seguridad ng mga rebeldeng nagbabalik-loob sa pamahalaan, boom!

XXX

SANA MAGPAKITANG-GILAS DIN SI COMMISSIONER VIADO SA PAGPAPAARESTO NG MGA BIGTIME FIXER SA BI -- Pitong opisyal ng Bureau of Immigration (BI) ang nasangkot sa mga katiwalian na sinibak daw ni BI Commissioner Joel Viado.

Sana hindi lang sa mga kurakot ng BI officials magpakitang-gilas si Comm. Viado, sana ganundin siya sa pamamagitan ng pag-aresto sa mga bigtime fixer na tulad nina alyas “Betty” at “Anna” na labas-masok sa imigrasyon, period!

EDSA rehabilitation, ginhawa o pahirap?

ni Ryan Sison @Boses | Mar. 28, 2025

EDSA, ito ang kalsada na araw-araw dinaraanan ng libu-libung Pilipino, pero tila walang araw na hindi ito puno ng trapik, sira-sirang kalsada, at mga abalang hindi na bago sa ating lahat. 

Sa loob ng maraming taon, paulit-ulit nating naririnig ang mga pangako ng pagbabago, pero sa kabila ng lahat ay hindi pa rin nasosolusyunan ang problemang palaging nagpapahirap sa mga motorista at mga driver. Pero ngayon, mukhang may panibagong pag-asang ihahatid sa atin ang gobyerno.

Inanunsyo ng Department of Public Works and Highways (DPWH) na sisimulan na ang pagsasaayos ng EDSA southbound lane sa kalagitnaan ng Abril. Target nilang tapusin ito bago mag-Pasko, para hindi na makadagdag sa holiday rush. Ang tanong, handa na ba tayo sa isa pang matinding sakripisyo sa kalsada?

Ayon kay DPWH Secretary Manny Bonoan, maaaring umpisahan ang proyekto sa Semana Santa, kung kailan mas kakaunti ang bumabiyahe. Pero kahit na isabay ito sa panahong hindi kasingbigat ng regular na araw, hindi maikakaila na malaki pa rin ang magiging epekto nito sa daloy ng trapiko sa Metro Manila.

Sinabi naman ni Department of Transportation (DOTr) Secretary Vince Dizon na habang wala pang eksaktong petsa ng pagsisimula, tiyak na sa loob ng Abril ito mangyayari.

Inamin niyang magiging mabigat ang epekto nito sa mga motorista at komyuter, kaya’t puspusan ang ginagawang plano upang mabawasan ang perhuwisyong dulot ng rehabilitasyon. Humihingi naman siya ng malaki at mahabang pagtitiis para sa mga maapektuhan nito.

Sa isang pagpupulong kasama ang Metro Manila Council (MMC), Metropolitan Manila Development Authority (MMDA) at DPWH, sinabi ni Dizon na hindi ito basta-bastang proyekto. Hindi lang ito konstruksyon, kinakailangan ding masiguro na may sapat na planong nakahanda para maiwasan ang malalang trapik.

Sinabi ni MMDA Chairman Romando Artes, hindi ito maituturing na delay kundi bahagi ng maingat na pagpaplano. Aniya, maraming moving parts na kailangang pagtama-tamain at ayaw nilang mangyari ang ‘carmageddon’.

Isa sa mga posibleng hakbang ay ang paghahanap ng alternatibong ruta para sa mga motorista upang maibsan ang bigat ng daloy ng sasakyan sa EDSA. Posible ring i-realign ang oras ng ilang proyekto o baguhin ang ilang schedule para hindi magdulot ng sabay-sabay na abala.

Pero ang pinakamatinding tanong, gaano katagal ang pagtitiis na ito? Ayon sa DOTr chief, maaaring umabot ng isa’t kalahating taon bago tuluyang matapos ang proyekto.

Kung ganu’n, handa ba tayo? Marami nang napagdaanang abala ang mga kababayan pagdating sa road projects. Maraming beses na ring ipinangako ang pag-aayos sa EDSA, pero tila hindi pa rin nawawala ang problema. Ang tanging magagawa ng publiko ngayon ay maghintay at umasa na sa pagkakataong ito, talagang magiging epektibo ang rehabilitasyon.

Maghintay kung talagang mas mapapadali ang biyahe at mas magiging maaliwalas ang EDSA pagkatapos ng isa’t kalahating taon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

SP Chiz, nag-iiba na ang tono sa bangayang Marcos at Duterte

ni Pablo Hernandez @Prangkahan | Mar. 27, 2025

SINABAYAN NG OIL PRICE HIKE ANG BANGAYANG MARCOS VS DUTERTE, KAYA ANG DULOT NITO SAKIT-ULO SA MAMAMAYAN -- Habang mainit ang bangayan ng Marcos administration at Duterte administration patungkol sa isyung pag-aresto at pagkulong kay ex-P-Duterte sa International Criminal Court (ICC) jail, biglang may bumulagang oil price hike sa publiko kamakalawa.

Iyan ang hindi kagandahan sa mga gov’t. official, ang bangayan nila ay sinasabayan ng dagdag-sakit ng ulo sa publiko tulad nitong panibagong oil price hike, tsk!

XXX

SA MARCOS VS DUTERTE, TILA MAY KINIKILINGAN NA SI SP ESCUDERO -- Sinabi ni Senate President Chiz Escudero na hindi naman daw nakompromiso ang soberanya ng Pilipinas nang dakpin si ex-P-Duterte at ikulong ito sa ICC jail sa The Netherlands kasi nga raw ay mga Pinoy naman ang mga complainant laban sa dating presidente.

Aba teka, dati ay nasa gitna lang si SP Chiz sa bangayang Marcos at Duterte, pero bakit iba na ang tono o tema ng mga statement niya ngayon, na tila mas nakakiling siya sa Marcos kaysa Duterte, boom!

XXX

HINDI LANG PHIL. GOV’T., PATI PAMILYA NG MGA OFW DAMAY KAPAG TINUTOO NILA ANG BANTANG 1 WEEK ‘ZERO REMITTANCE’ SA ‘PINAS -- Nagbabala ang overseas Filipino workers (OFWs) na magsasagawa sila ng isang linggong “zero remittance” sa Pilipinas bilang pagkondena nila sa Marcos administration na pumayag dakpin sa ‘Pinas si ex-P-Duterte at hinayaang makulong sa ICC jail sa The Netherlands.

Aba’y iyan ang hindi dapat gawin ng mga OFW, kasi kapag itinuloy nila iyang banta nila na ‘yan ay hindi lang ang Philippine gov’t. ang maaapektuhan kundi pati mismong mga kapamilya nila sa ‘Pinas, period!

XXX

MALAPIT NANG MATAPOS ANG HAPPY DAYS NG MGA FAKE NEWS VLOGGER NA NAKABASE SA IBANG BANSA -- Makikipag-ugnayan ang National Bureau of Investigation (NBI) sa International Police Commission (Interpol) para tugisin ang mga Pinoy fake news vloggers at sampahan ng kaso, na nakabase sa ibang bansa. 

Yari ang mga fake news vloggers na nasa ibang bansa kasi malapit nang tapusin ng NBI ang happy days nila sa paggawa ng mga fake news patungkol sa mga nangyayari sa ‘Pinas, boom!