Anomalya sa SHS Voucher Program, dapat tapusin at may panagutin

ni Kuya Win Gatchalian @Win Tayong Lahat | Mar. 25, 2025

Inanunsyo kamakailan ng Department of Education (DepEd) na hiningi nito ang tulong ng National Bureau of Investigation (NBI) upang imbestigahan ang mga iregularidad sa Senior High School Voucher Program (SHS-VP), kabilang ang pagkakaroon ng mga ‘ghost students’ o mga mag-aaral na walang sapat na dokumentasyon bilang benepisyaryo ng programa. 

Matatandaang una nang inanunsyo ng kagawaran na 12 pribadong paaralan sa siyam na divisions ang kanilang sinisiyasat.

Ayon sa DepEd, maaaring itigil ang pakikilahok ng mga pribadong paaralan sa SHS-VP kung mapapatunayang sangkot ang mga ito sa mga iregularidad. Papanagutin din ang mga kawani at mga opisyal na mapapatunayang sangkot sa mga gawaing ito.

Bilang Chairman ng Senate Committee on Basic Education, sinusuportahan natin ang mga hakbang na ito upang mapanagot ang mga sangkot sa mga itinuturing na anomalya. Para sa inyong lingkod, kailangang mabilanggo ang mga mapapatunayang sangkot sa mga iregularidad na ito. Hindi natin dapat palagpasin ang ginawa nilang panlilinlang sa mga mamamayang Pilipino. 

Noong nakaraang taon, pinangunahan ng inyong lingkod ang mga pagdinig upang repasuhin ang pagpapatupad ng Government Assistance to Students and Teachers in Private Education Act or the E-GASTPE law (Republic Act No. 8545). Marami tayong natuklasan sa mga ginawa nating pagdinig.

Batay sa datos ng Private Education Assistance Committee (PEAC), may 11,825 na benepisyaryo ng SHS-VP na may problema pagdating sa dokumentasyon mula School Year (SY) 2020-2021 hanggang SY 2022-2023. Umabot sa P310.4 milyon ang inaasahang refund na matatanggap ng pamahalaan dahil sa mga benepisyaryong ito na kulang sa dokumentasyon. Sa halagang ito, P71.1 milyon ang natanggap na ng pamahalaan samantalang P239.3 milyon pa ang hindi natatanggap. 

Para sa SY 2022- 2023, ipinatigil ng PEAC ang pakikilahok ng 22 pribadong paaralan sa SHS-VP. Sa isang paaralang inirekomendang masuspinde, kulang sa dokumentasyon o hindi mapatunayang totoong mag-aaral ang 79% o 8 sa 10 mga benepisyaryo ng SHS-VP.

Patuloy naman nating hinihimok ang DepEd na ilabas ang mga bagong guideline o pamantayan para sa pagpapatupad ng SHS-VP. Kabilang sa mga iminumungkahi natin ang pagtiyak na mabibigyang prayoridad ang mga pinakanangangailangang mag-aaral.

Iminumungkahi rin natin ang pagsasaayos ng billing system ng DepEd upang mas madaling masuri ang dokumentasyon ng mga mag-aaral at maging mas maayos din ang pagbabayad sa mga pribadong paaralan. 

Patuloy nating susubaybayan ang imbestigasyon sa mga isyung ito hanggang sa mapanagot natin ang mga dapat managot. Patuloy din nating isusulong ang mga reporma sa SHS-VP upang makamit natin ang mga layunin nitong maghatid ng dekalidad na edukasyon sa mga nangangailangang mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pramis ni Abalos, pababain ang singil sa kuryente, baka matulad ‘yan kay Enrile, imbes bumaba, tumaas pa!

ni Pablo Hernandez @Prangkahan | Mar. 25, 2025

MMDA CHAIRMAN ARTES ‘TUTULUG-TULOG SA PANSITAN’, MAY TRANSPORT STRIKE NA, HINDI PA SINUSPINDE ANG COLOR CODING -- Tila tutulug-tulog sa pansitan si Metropolitan Manila Development Authority (MMDA) Chairman Don Artes.

Mantakin n’yo, inumpisahan na ng Manila transport group ang tatlong araw na tigil-pasada, hindi man lang naisipan ni Chairman Artes na isuspinde ang implementasyon ng number coding.

Ang ibang naging chairman ng MMDA sa panahon ng mga nagdaang administrasyon, kapag may tigil-pasada ang mga jeepney driver and operators, at dahil alam ng mga dating MMDA chairman na pahirapan ang pagsakay sa mga public transport ay sinususpinde nila ang number coding para may magamit na sasakyan ang mga papasok sa trabaho at eskwelahan, bukod-tangi itong appointee ni Pres. Bongbong Marcos (PBBM) na si Chairman Artes ang “nganga” kapag may transport strike, buset!

XXX

IMBES MAG-THANK YOU DAHIL IPINALIBING ANG TATAY NIYA SA LIBINGAN NG MGA BAYANI, ‘GANTI’ NI PBBM: HINAYAANG MAKULONG SA ICC JAIL ANG EX-PRESIDENT -- Sinabihan ni Davao City Mayor Baste Duterte si PBBM ng walang utang na loob.

May dahilan talaga si Baste na sabihan nang ganyan ang Pangulo dahil ang ama nito na si former Pres. Ferdinand Edralin Marcos, Sr. ay ipinalibing ng kanyang amang si dating Pangulong Rodrigo Duterte sa Libingan ng mga Bayani, tapos ang ginawa ni PBBM, kahit alam naman niyang matanda na, may sakit at mahina na ang pangangatawan ng dating presidente ay ipinahuli ito sa otoridad at hinayaang makulong sa International Criminal Court (ICC) jail sa The Hague sa The Netherlands, tsk!

XXX

TIYAK APRUB KAY CHINESE PRES. XI JIN PING KUNG HUMINGI SI EX-P-DUTERTE NG ASYLUM SA CHINA -- Ayon kay Atty. Silvestre Bello III ay fake news daw ang balitang humingi ng political asylum si ex-P-Duterte sa China.

Sa totoo lang, fake news talaga iyan kasi kapag humingi ng political asylum si ex-P-Duterte sa China ay tiyak aprub agad iyan dahil best friend niya si Chinese Pres. Xi Jinping, period!

XXX

SABI NI ABALOS, PABABABAIN DAW NIYA ANG SINGIL SA KURYENTE KAPAG NAGING SENADOR SIYA, GANYAN DIN ANG PROMISE NI ENRILE NOON PERO IMBES BUMABA, TUMAAS PA ANG KURYENTE -- Sinabi ni former DILG Sec. Benhur Abalos, kung sakaling siya raw ay palaring manalong senador ay isusulong daw niya na mapababa ang singil sa konsumo ng kuryente.

Naalala natin noong 2010 senatorial election, sa slogan ni dating Sen. Juan Ponce Enrile na “Gusto ko happy ka”, ang gagawin daw niya ay pabababain ang singil sa konsumo ng kuryente, pero nang manalo, sa halip na mapababa ay lalong lumaki ang bayarin ng mamamayan sa nakokonsumo nilang kuryente buwan-buwan, he-he-he.

Libreng kolehiyo sa isang kurso lang

ni Atty. Persida Rueda-Acosta @Magtanong Kay Attorney | Mar. 25, 2025

Dear Chief Acosta,

Noong taong 2023, nakapagtapos ako ng kolehiyo sa isang pampublikong paaralan. Kamakailan ay napag-isip-isip kong kumuha ng isa pang kurso dahil iyon diumano ang in-demand sa ibang bansa at mas tataas umano ang tsansa kong makahanap ng ibang trabaho roon. Maaari pa rin ba akong makapag-aral ng libre sa kolehiyo sa isang pampublikong paaralan kahit pangalawang kurso ko na ito? Nais ko sanang maliwanagan. Maraming salamat. -- Rei Christian

---

Dear Rei Christian,

Bilang pangunahing prayoridad ng ating pamahalaan, ang edukasyon ay patuloy na sinisikap pagtibayin, repormahin at gawing libre para sa lahat ng mahihirap na mamamayan. Kaya naman, ipinasa ng ating gobyerno ang Republic Act (R.A.) No. 10931 o mas kilala bilang “Universal Access to Quality Tertiary Education Act”, na naglalayong gawing libre ang pag-aaral sa kolehiyo sa lahat ng pampublikong higher education institution (HEI).

Ngunit, ang pagbibigay ng libreng pag-aaral sa kolehiyo sa mga pampublikong paaralan ay hindi para sa lahat. Itinakda ng batas ang ilang indibidwal na hindi maaaring maging kuwalipikado sa benepisyong ito. Ayon sa Seksyon 6 ng nasabing batas:

“Section 6. Exceptions to Free Tertiary Education. - The following students are ineligible to avail of the free tertiary education:

1. In state universities and colleges (SUCs) and local universities and colleges (LUCs);

1. Students who have already attained a bachelor’s degree or comparable undergraduate degree from any higher education institution (HEI), whether public or private; x x x

Students ineligible to avail of the free tertiary education shall be charged the tuition and other school fees, as determined by the respective boards of the SUCs and LUCs, and in the case of the state-run Technical-Vocational Institutions (TVIs), to be determined by the Technical Education and Skills Development Authority (TESDA).”

Ayon sa nasabing probisyon, ang sino mang nakapagtapos na ng kahit anong bachelor’s degree o kapareho nito sa kahit anong institusyong pang-edukasyon na pinahintulutan at kinikilala ng Commission on Higher Education (CHED) na maggawad nito, pampubliko man o pribado, ay hindi na maaaring maging benepisyaryo ng libreng kolehiyo ng pamahalaan.

Upang sagutin ang iyong katanungan, hindi na maaaring makapag-aral ng libre sa isang pampublikong kolehiyo ang mga nakapagtapos na ng isang kurso sa kung saan mang kolehiyo, pribado man o pampubliko, sa ilalim ng Republic Act (R.A.) No. 10931. Nasasaad din sa batas na ang mga estudyante na hindi na kuwalipikado, ngunit nais pa ring makapag-aral sa pampublikong kolehiyo ay pagbabayarin ng kaukulang tuition, matrikula, at iba pang mga bayarin. Kaya kung nais mong makapag-aral muli ng libre, maaari kang maghanap ng scholarship sa ilalim ng ibang programa ng ating gobyerno o ng mga pribadong organisasyon.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.