270 katao, tiniketan dahil sa mass gathering sa isang online sabong event

ni Jasmin Joy Evangelista | September 20, 2021

Naaktuhan ng mga pulis ang daan-daang tao sa loob ng isang cockpit arena sa Barangay Tambo, Parañaque noong Sabado.

Ito ay matapos makatanggap ng impormasyon ang Parañaque City police na mayroong mass gathering sa Roligon Mega Cockpit Arena sa Quirino Avenue.

Nang puntahan daw ito ng pulisya, tumambad sa kanila ang napakaraming tao na nagsasagawa ng isang online sabong event.

Hindi pinaalis ang nasa 270 katao na naabutan sa loob at naghihintay makapasok dahil sa paglabag ng mga ito sa physical distancing guidelines.

Kabilang dito ang ilang negosyante at mga observer ng operasyon.

Ayon sa mga pulis, walang naipakitang kaukulang permit ang may-ari ng kompanyang nagpapatakbo ng online sabong kaya ipinahinto ito.

Ayon naman sa may-ari, dry run lang umano ang aktibidad at may permit sila mula sa PAGCOR.

Ipinagbabawal ang sabong at iba pang pagsusugal sa ilalim ng Alert Level 4, pwera lang kung awtorisado ito ng IATF o ng Office of the President.

Inisyuhan ng official violation receipts ang mga nahuli roon at pinauwi rin.

25 katao, arestado sa online sabong sa Cubao

ni Thea Janica Teh | January 4, 2021

Arestado ang 25 katao sa Cubao, Quezon City matapos makatanggap ang mga pulis ng reklamo sa pagsasagawa ng ilegal na pasugalan at online sabong. Agad na pinuntahan ng mga pulis ang isang compound sa Barangay San Roque.

Naabutan ng mga otoridad sa isang kuwarto ang mga lalaki na karamihan ay walang suot na face mask. Nakita rin na may menor de edad na tumatanggap pa ng taya. Ayon kay Police Major Jowilouie Balaro, hepe ng Cubao Police Station, nakapailalim sa community quarantine rules na bawal ang anumang uri ng electronic gaming activity.

Aniya, "Very blatant talaga 'yung violation du'n sa quarantine protocols natin kasi po ay nagkaroon na sila ng social gathering at nag-iinuman pa sila and marami ang hindi the naka-face mask at face shield."

Bukod pa rito, napag-alaman din na expired na ang permit ng nasabing lugar. Pahayag ng operator ng online sabong na isa rin sa mga nahuli, kinakailangan na umano nila ng mapagkakakitaan dahil wala na silang pambayad sa puwesto. Samantala, itinanggi naman ng iba pang naaresto na tumataya sila.