Bigtime oil price hike.. P3.50 sa diesel, P3.20 kerosene, P2.10 gasoline

ni Mai Ancheta @News | July 30, 2023

Panibagong kalbaryo ang magiging pasalubong ng unang araw ng Agosto sa publiko at sa mga motorista dahil sa nakaambang na panibagong pagtaas sa presyo ng diesel at kerosene.

Batay sa pagtaya ng mga nasa sektor ng enerhiya, aabot ng mula P3.20 hanggang P3.50 ang idadagdag sa presyo ng kada litro ng diesel habang P2.90 hanggang P3.20 naman sa kada litro ng kerosene.

Mas mababa naman ang dagdag-presyo sa kada litro ng gasolina na mula P1.90 hanggang P2.10

Ang panibagong oil price hike ay bunsod umano sa pagtapyas sa produksyon ng langis ng Saudi Arabia at Russia na malaking pinagkukunan ng supply ng maraming bansa sa mundo.

Ayon sa forecast ng Unioil Petroleum Philippines Inc., ang price adjustment sa presyo ng produktong petrolyo ay magsisimula sa Agosto 1 hanggang 7.

Ito na ang ikatlong linggo ng sunud-sunod na pagtaas sa presyo ng oil products sa bansa.

P2 dagdag-presyo sa diesel, P1.70 sa gasoline

ni Mai Ancheta @News | July 16, 2023

Matapos ang kakarampot na rollback sa presyo ng produktong petrolyo noong nakalipas na linggo, babawi ang mga kumpanya ng langis ng malakihang dagdag sa darating na linggo.

Batay sa pagtaya ng mga nasa industriya ng langis, posibleng tataas ng mula P1.80 hanggang P2.00 kada litro ang ipapataw sa presyo ng diesel.

Tinatayang P1.50 hanggang P1.70 kada litro naman ang posibleng maidagdag sa presyo ng gasolina.

Ayon naman kay Department of Energy Oil Industry Management Bureau Assistant Director Rodela Romero, mahigit piso kada litro ang posibleng itaas sa presyo ng

gasolina, diesel at kerosene.

Batay aniya sa resulta ng kanilang monitoring sa kalakalan sa world market nitong July 10-13, 2023 posibleng magkaroon ng oil hike sa susunod na linggo dahil sa planong pagbawas ng supply ng malalaking oil exporters kaya aasahang tataas ang demand sa mga papaunlad na bansa.

Matatandaang nitong July 11 ay nagpatupad ng rollback ang mga kumpanya ng langis sa kanilang mga produkto — bente sentimos kada litro sa gasolina at singkuwenta sentimos sa kerosene.

P.80 dagdag-presyo sa diesel at kerosene

ni Mai Ancheta @News | July 9, 2023

Magpapatupad ng taas-presyo sa diesel at kerosene ngayong Linggo.

Batay sa pagtaya, 50 hanggang 80 sentimos ang itataas sa presyo ng kada litro ng diesel at kerosene.

Hindi naman gagalaw ang presyo ng gasolina at posible pang magkaroon ng rollback.

Ayon kay Oil Industry Management Bureau Assistant Director Rodela Romero, lumabas sa kanilang apat na araw na trading monitoring mula July 3 hanggang 6, magkakaroon ng paggalaw sa presyo ng petroleum products sa susunod na linggo.

Ang bahagyang pagtaas aniya sa presyo ng diesel at kerosene ay dahil sa output cut ng Kingdom of Saudi Arabia sa supply ng langis ngayong Hulyo, habang ang rollback ay alinsunod sa polisiya ng malalaking bansa para maibsan ang epekto ng inflation.

Madalas nag-aanunsiyo ang mga kumpanya ng langis ng price adjustments tuwing Lunes na magiging epektibo naman kinabukasan, araw ng Martes.