Piso taas-presyo sa petrolyo

ni Mai Ancheta @News | September 2, 2023

May nakaambang na panibagong pagtataas sa presyo ng produktong petrolyo sa susunod na linggo.

Batay sa pagtaya ng Department of Energy-Oil Industry Management Bureau, posibleng tumaas ng 20 sentimos hanggang 40 sentimos kada litro ang kasalukuyang presyo ng gasolina; 80 sentimos hanggang piso kada litro naman sa diesel; at 90 sentimos hanggang P1.10 kada litro ang dagdag sa presyo ng kerosene.

Sinabi ni DOE-OIMB Assistant Director Rodela Romero na posibleng mabago pa ang projected oil increase depende sa magiging resulta ng huling araw ng trading sa linggong ito.

Ang napipintong oil price hike ayon sa opisyal ay dahil sa aksyon ng China na pagaanin ang demand ng petrolyo sa kanilang bansa, gayundin sa epekto ng hurricane Idalia na tumama sa oil production at power generation facilities sa Amerika at Gulf of Mexico na nagbunsod para higpitan ng Estados Unidos ang kanilang supply ng krudo.

Batay sa monitoring ng DOE sa retail price sa Metro Manila, ang presyo ng gasolina ay nasa pagitan ng P60 at P81.05 per liter; diesel nasa pagitan ng P58.95 at P72.20/liter; at kerosene sa pagitan ng P86.65 at P89.30 per liter.

Oil price hike na naman

ni Mai Ancheta @News | August 27, 2023

Panibagong kalbaryo ang sasalubong sa publiko sa susunod na linggo partikular ang mga motorista dahil sa aasahang pang-walong pagtataas sa presyo ng produktong petrolyo.

Tataas ng mula 40 sentimos hanggang 70 sentimos kada litro ang presyo ng diesel habang P0.10 hanggang P.30 per liter ang gasolina, at P0.50-P0.80 per liter naman sa kerosene.

Posible ring tumaas ng mula dalawang piso hanggang apat na piso per kilogram ang liquefied petroleum gas (LPG) ngayong Setyembre.

Ang panibagong oil price hike sa susunod na linggo ay dahil sa plano umano ng Saudi Arabia na palawigin ang pagbabawas ng kanilang production sa Oktubre.

Naunang inihayag ng Saudi na hanggang Setyembre lamang ang kanilang production cut subalit pinag-iisipan at pinag-aaralan umano nila na palawigin pa ito hanggang Oktubre na mangangahulugang lilimitahan ang kanilang ipinapalabas na supply ng langis.

Dahil sa linggu-linggong pagtataas sa presyo ng produktong petrolyo ay humirit na ng dagdag-singil sa pamasahe ang iba’t ibang transport group at sumabay na rin ang taxi operators para sa P70 flag down rate dahil sa mataas na presyo ng langis

P1 sa gasoline, P.20 diesel.. Oil price hike na naman

ni Mai Ancheta @News | August 20, 2023

Panibagong kalbaryo ang sasalubong sa mga motorista at transport groups sa susunod na linggo dahil sa nakaambang pagtaas sa presyo ng produktong petrolyo.

Ito ang ika-7 pagkakataon na sunud-sunod na pagtataas ng produktong petrolyo sakaling ilarga ang panibagong oil hike sa darating na Martes.

Ayon sa kumpanyang Unioil, aasahan ang 80 sentimos hanggang piso kada litro na oil hike sa gasolina habang sa diesel ay tataas ng 10 hanggang 20 sentimos kada litro.

Hindi pa nakapagpalabas ng abiso ang ibang oil companies kung magkano ang inaasahang itataas sa presyo kada litro sa kanilang mga produkto sa susunod na linggo