Taas-presyo, non-stop.. Motorista, maging wais sa pagpapa-gas — DOE

ni BRT @News | September 17, 2023

Pinayuhan ng isang opisyal ng Department of Energy (DOE)ang mga motorista na gamitin ang kanilang "power of choice" sa pagbili ng produktong petrolyo sa harap ng panibagong price hike na ikinakasa ng mga kumpanya ng langis ngayong Linggo.

Ayon kay Oil Industry Management Bureau Assistant Director Rodela Romero, may mga gasolinahan na nagbibigay ng diskwento kada litro kaya malaking bagay ito para makatipid sa gastos.

"Maging wise tayo. Gamitin natin 'yung power of choice. Kasi mas makikita doon sa monitoring ng Department of Energy, may mga gasolinahan na nagbibigay ng hanggang P4 discount per liter," ani Romero.

Sinabi ng opisyal na mas mura sa mga maliliit na gasoline station at independent oil players kaya nasa mga motorista na ang pagpapasya.

Karamihan aniya ay makikita ang mga ito sa Commonwealth, Quezon City.

"Ibig sabihin, mayroong ganu'ng nagbibigay kamura so ang mga mamamayan o mga motorista kung sakaling kaya pang umabot doon ang kanilang mga gasolina, susulitin natin 'yun," dagdag ni Romero.

Tiniyak ng opisyal na tuluy-tuloy ang kanilang gagawing monitoring sa iba't ibang gasolinahan upang masigurong sumusunod ang mga ito sa kalidad ng kanilang mga produkto at patas sa kanilang customers.

Inaasahang tataas sa ika-11 pagkakataon ang presyo ng produktong petrolyo ngayong linggo.

Maaari umanong magpatuloy hanggang Disyembre ang taas-presyo sa petrolyo.

Bigtime taas-presyo.. P2 sa diesel, P1.35 gasoline P1.90 kerosene

ni Mai Ancheta @News | September 16, 2023

Nakaamba na naman ang panibagong kalbaryo ng mga motorista at transport groups dahil sa napipintong pagtaas sa presyo ng produktong petrolyo.

Batay sa pagtaya ng Department of Energy (DOE) Oil Industry Management Bureau, posibleng madagdagan ng P1.15-1.35 per liter ang dagdag sa presyo ng gasoline, P1.80-P2.00 per liter sa diesel at P1.70- P1.90 sa kerosene.

Ayon kay Rodela Romero, assistant director ng ahensya, ang napipintong oil increase ay dahil sa extension ng Saudi Arabia at Russia sa kanilang supply cut, gayundin sa supply ng Libya dahil sa matinding pagbaha sa nabanggit na bansa.

Kapag aniya tumaas ang presyo ng langis sa world market, walang magagawa dahil hindi kontrolado ng gobyerno ang presyuhan sa langis.

Kapag natuloy, ito na ang ika-11 straight week na pagtaas ng produktong petrolyo ngayong taon.

Oil price hike, non-stop.. Dagdag-pasahe, oks sa LTFRB

ni Mai Ancheta @News | September 14, 2023

May nasisinag na pag-asa ang mga tsuper ng pampasaherong jeep sa kanilang hirit na taas-singil sa pasahe.

Ito ay matapos ipahiwatig ni Land Transportation Franchising and Regulatory Board (LTFRB) Chairman Teofilo Guadiz III na posibleng pagbigyan ang kahilingan ng transport sector na dagdag-pasahe bago matapos ang taon.

Ayon sa opisyal, naging sunud-sunod ang oil hike sa loob ng 10 linggo na aniya ay hindi na ordinaryong kaganapan.

Batid aniya nito ang importansya para sa fare increase kaya binabalanse ng kanyang ahensya ang pangangailangan ng bansa upang hindi makompromiso ang ekonomiya at magtaasan ang lahat ng presyo ng mga bilihin.

Sinabi ni Guadiz na ikukonsidera nila ang taas-singil sa pamasahe kasabay ang paghingi ng sapat na panahon upang madetermina kung kailan dapat na ipatupad ang dagdag-singil sa pamasahe sa mga jeep.

Nakatakdang dinggin sa September 26 ng LTFRB Board ang petisyon para sa pisong provisional fare hike, gayundin ang hiwalay na petisyon ng iba pang transport group para sa P2 base fare.

"We will consider the fare hike. However, give us a little time to determine how much and when will be the appropriate time to impose the fare hike," ani Guadiz.