Big-time price hike sa gas, bukas

ni Lolet Abania | December 13, 2021

Matapos ang limang magkakasunod na linggong rollback, isang matinding pagsirit naman sa presyo ng mga produktong petrolyo simula bukas, Disyembre 14, ayon sa mga taga-industriya.

Sa magkahiwalay na advisories, ayon sa Chevron Philippines Inc. (Caltex) at Pilipinas Shell Petroleum Corp., at Seaoil Philippines Inc., magtataas sila ng presyo ng kada litro ng gasoline ng P1.60, diesel ng P1.35, at kerosene ng P1.20.

Ang Cleanfuel at Petro Gazz ay magpapatupad din ng katulad na taas-presyo sa gas, maliban sa kerosene.

Epektibo ang big-time price hike sa mga produktong petrolyo ng alas-6:00 ng umaga ng Martes, Disyembre 14, sa lahat ng kumpanya ng langis, maliban sa Caltex na ipapatupad ang taas-presyo ng alas-12:01 ng madaling-araw at Cleanfuel ng alas-4:01 ng hapon sa parehong araw.

Ang iba pang kumpanya ng langis ay maglalabas naman ng katulad ding anunsiyo ngayong linggo.

Price freeze inihihirit sa gitna ng sunod-sunod na oil price hike

ni Jasmin Joy Evangelista | October 27, 2021

Ramdam ng ibang industriya ang patuloy na pagtaas ng presyo ng petrolyo kaya nanawagan ang ilang mambabatas na magpatupad na ng price freeze.

Marami na umano sa mga miyembro ng Confederation of Truckers Association of the Philippines ang tumigil mag-operate dahil sa patuloy na pagtaas ng presyo ng produktong petrolyo.

"Ang mga trucks kasi normally na kinukuha 'yan ng mga operator only on utang basis sa mga financing, sa bangko, at nagbabayad kami on a monthly amortization so sa hirap ng biyahe sa port at sa hirap ng operations at sa taas ng expenses na na-incur namin along the way hindi na ma-sustain 'yung amortization," ayon kay Maria Zapata, direktor ng grupo.

Samantala, naghain na ang Makabayan bloc sa Kamara ng panukalang patawan ng price freeze ang mga pangunahing produkto na kasali sa Price Act kagaya ng bigas, tinapay, mga de-lata, karneng baboy, baka at manok, at maging mga sabong panlaba.

Patuloy na oil price hike pinaaaksiyunan sa gobyerno

ni Jasmin Joy Evangelista | October 21, 2021

Dagdag-pasakit ang dulot ng patuloy na oil price hike kaya nanawagan ang Akbayan Party-list sa pamahalaan na aksiyunan ito.

Ngayon ay walong sunud-sunod na linggo na itong tumataas.

Sinabi ni Akbayan Frist Nominee Perci Cendaña na kailangan na itong remedyuhan sa pamamagitan ng subsidiya gaya ng muling pagpapatupad ng Pantawid Pasada Program.

“Kailangan nating tapakan ang preno at pigilan ang pag-arangkada ng presyo ng gasolina. Kailangan ng mamamayan ng ayuda at proteksyon sa pamamagitan ng fuel subsidy,” pahayag ni Cendaña.

Ang Pantawid Pasada ay ipinatupad noong 2011 bilang pantulong sa mga motoristang apektado ng taas-presyo ng gasolina.