‘Pinas, nasa “very low risk” na ng COVID-19 — OCTA

ni Lolet Abania | March 20, 2022

Binigyan na ang Pilipinas ng rate na “very low risk” sa COVID-19 sa kabila na ang mga kalapit na bansa gaya ng Vietnam, Malaysia, Singapore, at Brunei ay nakararanas ng pagtaas ng impeksyon, ayon sa independent monitoring group na OCTA Research ngayong Linggo.

Sa isang tweet, ipinaliwanag ni OCTA Research fellow Dr. Guido David na ang Pilipinas ay nakapag-record ng average daily attack rate (ADAR) ng 0.47 noong Marso 18, na mayroong seven-day average na 527 cases.

Ang ADAR ay patungkol sa insidente na nagpapakita ng average na bilang ng mga bagong kaso batay sa isang period bawat 100,000 katao. Ang growth rate naman ng bansa sa mga bagong kaso mula sa naunang linggo kumpara sa kasalukuyang linggo ay nasa -22%. Nitong Martes, inianunsiyo ng Department of Health (DOH) na lahat ng lugar sa Pilipinas sa ngayon ay kinokonsidera nang low risk sa COVID-19.

Ini-report din ng OCTA na ang Timor Leste, Taiwan, Cambodia, at China ay nasa “very low risk” na rin sa viral disease na may ADAR na nagre-range mula 0.13 hanggang 0.86.

Gayunman, ang South Korea, Vietnam, Hong Kong, Malaysia, Singapore, at Brunei, silang lahat ay isinailalim sa “severe” category, kung saan ang South Korea ang nakapag-record ng may pinakamataas na ADAR sa mga bansa sa East Asia na nasa 788.15.

Ang Japan at Thailand naman ay isinailalim sa “very high” category na may ADAR ng 39.68 at 34.18, batay sa pagkakasunod.

Ini-report pa ng OCTA na ang Indonesia at Laos ay kapwa isinailalim sa “moderate” risk sa COVID-19, habang ang Myanmar ay isinailalim naman sa “low” risk na mayroong 1.08 ADAR. Samantala, nasa Alert Level 1 pa rin ang National Capital Region (NCR) at 47 ibang lugar sa bansa hanggang Marso 31.

Nakapagtala naman ang Pilipinas nitong Sabado ng 525 bagong COVID-19 infections, na umabot na sa 3,673,717 ang nationwide tally.

Sinabi rin ng DOH na wala pang nade-detect na hybrid coronavirus mutation na “Deltacron” sa bansa, habang patuloy ang kanilang pagbabantay at pagtutok sa mga surveillance systems sa gitna ng nadiskubreng bagong COVID-19 variant sa Israel.

OCTA: Virus outbreak sa Benguet at Baguio, mataas pa rin

ni Jasmin Joy Evangelista | January 26, 2022

Nanatiling nasa severe outbreak ang COVID-19 risk level ng probinsiya ng Benguet simula Jan. 21 dahil sa patuloy na pagtaas ng kaso ng COVID-19, ayon sa OCTA research.

Muling nanguna ang Benguet sa listahan ng OCTA ng mga probinsiya sa labas ng National Capital Region (NCR) na may pinakamataas na daily attack rate (Adar) na may 101.48 kada 100,000 na populasyon. Ang Adar ay ang bilang ng mga indibidwal na na-infect ng virus sa kada 100,000 katao.

Nakapagtala ang probinsiya ng 1,290 bagong kaso noong Linggo lamang at nakapag-register ng weeklong growth na 86 percent, ayon sa OCTA.

Ang Mountain Province, Ifugao at Kalinga naman ay nagkaroon din ng mataas na outbreak basa sa Adar na naitala sa mga nasabing lugar. Ang tatlong probinsiyang ito ay isinailalim sa alert level 4 mula Jan. 21 hanggang Jan. 31.

Samantala, nagtayo ng 8 checkpoint sa Kalinga noong Linggo upang ma-regulate ang galaw ng mga tao at ng mga hindi bakunado, ayon sa provincial Inter-Agency Task Force.

Walang senyales na huhupa ang bilang ng Covid cases — OCTA

ni Jasmin Joy Evangelista | September 6, 2021

Lumalabas sa trajectory ng OCTA na posibleng maabot ang 25,000 na mga bagong kaso sa susunod na linggo at tinatayang aabot sa 30,000 sa katapusan ng Setyembre.

Dahil dito, sinabi nila na wala pa rin silang nakikitang senyales na huhupa ang bilang ng kaso ng COVID-19 sa bansa.

“Ang problema is mabagal din ‘yung… Medyo bumabagal din ‘yung pagtaas ng kaso, [pero] mas tumatagal ‘yung surge natin ngayon kaysa noong nakaraan na surge noong Abril," ani OCTA Research Fellow Guido David.

Naniniwala ang grupo na kung magtutulungan ang lahat ay bababa ang surge sa ikalawang linggo ng Setyembre.

Pero ayon pa sa OCTA, hindi tugma ang mga nangyayari sa ospital sa ulat ng DOH.

“Doon sa data nila, nakalagay okay pa ‘yung kalagayan, hindi pa ganoon kataas ‘yung occupancy. Pero ‘yung mga naririnig rin namin sa mga doctors na kakilala namin at sa mga kasamahan namin sa OCTA… punuan na ‘yung mga hospitals, matagal ‘yung waiting time – mga three to four days," ani David.

Samantala, nakikipag-ugnayan na raw ang DOH sa mga ospital para mas maging tugma ang kanilang datos.