Guarte at Abahan, kampeon sa Spartan Race Montclair sa Porac

ni Nympha Miano-Ang @Sports | November 25, 2023

May halos 1,300 na mga Spartan racers ang lumahok sa makasabog-baga at makabaling-buto na Spartan Race Philippines Trifecta Weekend kung saan nagtagisan ang mga partisipante sa Beast Elite, Super at Sprint category na idinaos sa Montclair, Porac, Pampanga nitong nagdaang Nob. 18 hanggang 19.

Nagkampeon sa Elite 21k plus 30 obstacles si Mervin Guarte, segunda si Jeffrey Reginio at 3rd si Muhammad Sherwin Managil, habang nagreyna sa 3k Elite si Sandi Menchie Abahan, 2nd si Ailene Sabal at 3rd si Honoka Jinzai ng Japan. Hari rin sa 3k Elite si Guarte, 2nd si Ryoma Sugata ng Japan at 3rd si Jeffrey Reginio.

Nag-champ sa Super Elite si Melissa Campos, 2nd si Aubrey Marlette Lusanta at 3rd si Decilan Joy Egsan, habang sa Beast Elite si Ailene Sabal, 2nd si Wendel Enerio at 3rd si Meng Chiu Ho ng Taiwan. Naghari sa Beast Elite male si Mohammad Managil, 2nd si Jobert Carolino at 3rd si Andrico Mahilum.

Ang Spartan race ay binubuo ng Stadion, Sprint, Super, Beast,Ultra, Obstacles at Trifecta na may 21k, 10k, 5k Elite age group at open category. Kabilang sa mga obstacles ng karerang hindi lamang sa pabilisan ng takbuhan ang kompetisyon kundi ang pagsubok sa malakas na pangangatawan at endurance, pagtahak sa dunk walls, may basket carry, rope climb, Olympus, A-tram cargo, balance beam, slash line, atlas carry, armor, chain carry, double sandbag carry, farmers carry, log carry, bender, vertical cargo plus, the box, stairway to spartan, cliff climb, rolling mud, bridge, open throw, free jump, barbed wire crawl, sandbag carry, fire jump, memory test, monkey bars, multi-rig at marami pang ibang challenges bukod sa babad ang katawan sa initan ng araw.

Kabilang ang mag-asawang anak ng publisher ng Bulgar ito ang lumahok sa Sprint 5k + 20 obstacles na sina Michelle Sison-Tolentino at Sean Marlon Tolentino na tagumpay na nakatapak ng finish line.

Obiena naka-unang gold sa Asian Games

ni Nympha Miano-Ang @Sports | October 01, 2023

Sa wakas nasungkit ng Filipino pole vaulter na si EJ Obiena ang unang gold medal para sa bansa sa 19th Asian Games sa Hangzhou, China at nakagawa ng bagong record.

Naghari si Obiena sa pole vault finals nang malundag niya ang 5.75 meter mark matapos ang dalawang tangka. Makaraan noon ay sinikap din niyang malundag ang 6.02 meters pero nabigo siya.

Kasunod ng kanyang gold-clinching jump muling nalampasan ng pole vault world no. 2 ang 5.55 meters.

Sina Henry Bokai ng China at Hussain Asim Al Hizam ng Saudi Arabia ang tumapos na segunda at tersera sa.5.65 meters.

Ang lundag ni Obiena ang sumira sa.Asian Games record na dating hawak ni Seito.Yamamoto ng Japan sa 5.70 meters.

Sa ngayon hawak ng Filipino pole vaulter ang Asian record na 6.0 meters.

Una nang nakasungkit ng 1 silver at anim na bronze medal ang Pilipinas sa Asiad.

61-anyos na si Doneza sa 160-Km ay kakasa pa

ni Nympha Miano-Ang @Sports | August 18, 2023

Matinding preparasyon ngayon ang ginagawa ng tubong Batangas City na si Marlene Gomez Doneza ng Paharang East upang matupad ang susunod niyang target na matakbo ang Bataan Death March o BDM 102 km lalo at higit ang BDM 160 km.

Sa edad niyang 61, isinilang noong Enero 6, 1962, una niyang rason kung bakit siya tumatakbo ay para lalo pang lumakas, gumaan ang pakiramdam at manatiling parang bata ang pagkilos ng katawan upang hindi agad mapagod sa araw-araw na gawain, hindi rin tumataba at kasabay ng walang iniinom na maintenance na gamot.

Kahanga-hanga dahil hindi rin sagabal sa kanya ang mga paningin dahil kahit wala siyang salamin sa mata ay malinaw pa rin niyang nakikita ang lahat sa malayuan.

"Kapag may takbo akong darating siyempre excited at pinaghahandaan ko, kailangan kong mag-training para hindi ako ma-injury at matapos ang race ng safe. Excited na ma-meet ang ka-runners. Para kasi sa amin isa itong bonding at habang tumatakbo kami kuwentuhan sa daan, natutuwa kami sa mga kuwento ng bawat isa sa buhay. "

Nagpapasalamat din aniya si Doneza sa sporty niyang pamilya, "Pagkatapos ng race namin ay mag-iisip at hahanap na naman kami kung saan kami magpapa-register na next race. Napakapalad ko naman at ang pamilya ko ay sporty kaya naintindihan nila ako.

Positibo lang ako lagi na matatapos ko dahil taimtim akong manalangin na makakatapos ako nang ligtas."

Bilang senior sa ultra running, "taglay na namin ang lawak ng karanasan sa buhay, matiyaga kami, matiisin, may dedikasyon, malawak ang pang-unawa at pursigido."

Sa karakter ni Doneza bilang may edad nang atleta, ito marahil ang pundasyon niyang matatag kumpara sa mga kabataan na hindi pa gaano kabuo ng loob sa sport na kanyang minamahal.

Sa mga rutang kanyang dinaraanan, masarap sa kanyang pakiramdam na nakikita ang magagandang tanawin sa trail routes ng bundok, gubat at mga ilog, bagamat mas komportable siya sa road route.

'Kabaliwan' ba ang kanyang sport? Sagot niya, "sa mga natakbo at sa mga walang hilig sa pagtakbo, sa larangan na ito, magbabayad ka ng registration, mamamasahe, magdamag na 'di matutulog, tatakbo, mapapagod, mahihirapan, minsan mai-injury pa, maghapon bilad sa araw at minsan nabasa pa ng ulan kaya hindi maiwasang masabing ito'y isang kabaliwan nga haha. Pero du'n sa mga nakakaintindi at natakbo ng ultra isa itong napakaganda at masayang sports na kada takbong matatapos ay may matututunan na iba't ibang karanasan."

Pinakamagandang katangian ng isang ultra marathoner na tulad ko ay maganda ang kalusugan, may proper training, determinado, pokus, may pasensiya, positibo, palakaibigan, tapat at madasalin. "Kapag may ganyan kang mga katangian ay tiyak na tagumpay ang iyong ultra."

Sa kabuuan ng ultra run ni Doneza, may kabuuan nang 36 na beses na ang pinakamalayo, kasama ang 117 km, kasama pa ang 24 hrs endurance marathon, 24 hrs crazy run na 100 km at isa pa sa pinakamahirap ay ang 100 km Taal loop dahil first time niyang mag-100 km. Sa huling run niya ay binalisawsaw siya nang husto, sumakit ang puson at "kada ihi ko ay mapula at may kasamang dugo, 3 days akong mapula ang ihi.

Di ko pa kasi alam paano at ano ang gagawin pag nag-ultra marathon, akala ko sapat na nag mag-training sa pagtakbo, kailangan ang palagiang hydration, kaya ng mga sumunod na run ko alam ko na ang mga dapat gawin. Dito sa run na ito 1st time kong mag-100 km at 1st time na mag-champion sa ladies category."

Kaya naman may mahalagang payo siya sa mga nagsisimula pa lang sa ultra mary, "Dapat ay nasa magandang kondisyon ang katawan at kalusugan, sapat ang ensayo bago sumabak. May tamang training, may dedikasyon at handang mapagod, magtiis at masaktan. " Importante rin na pag-aralan ang ruta ng karera. Kung downhill, uphill ang ruta, mag-training ka."

"Magandang benepisyo ng running ay malakas na pangangatawan, walang maintenance at dumarami pa ang mga kaibigan," pagtatapos ni Doneza.