Oks kay P-BBM.. American students, mag-aaral ng nursing sa 'Pinas

ni Mylene Alfonso @News | August 9, 2023

Posibleng magpadala ng mga estudyante ang Estados Unidos sa Pilipinas para mag-aral ng nursing courses sa bansa.

Sa courtesy call ni U.S. Senator Tammy Duckworth kay Pangulong Ferdinand Marcos, Jr., sa Palasyo, sinabi niya na kinakausap na niya ang embahada ng Amerika para sa posibilidad na magpadala ng kanilang mga estudyante sa Pilipinas.

Binanggit din ni Duckworth na makatutulong ang pag-aaral ng American students sa nursing schools sa Pilipinas para matugunan ang kakapusan sa nursing programs at residency slots sa Amerika.

Bukas naman si Marcos sa partnerships sa U.S. government kasabay ng pasasalamat kay Duckworth sa patuloy na suporta sa bansa.

Libreng nursing review, oks na

ni Madel Moratillo @News | July 20, 2023

Puwede na ngayong makakuha ng libreng review classes para sa kanilang licensure exam ang mga nursing student.

Ito ay matapos na lumagda sa isang joint agreement order ang Department of Health (DOH), Commission on Higher Education (CHED) at Private Sector Advisory Council.

Layon nitong maresolba ang kakulangan ng mga nurse sa bansa.

Ayon kay Health Sec. Ted Herbosa, maraming nursing students at graduates ang hindi nakakakuha ng review classes dahil sa mataas na presyo na umaabot sa P20K hanggang P25K.

Ayon naman kay CHED Chairperson Prospero de Vera III, nais nitong makapag-produce ng mas maraming nurse sa bansa.

Medical at nursing studs, puwede nang COVID-19 vaccinators — CHED

ni Lolet Abania | November 14, 2021

Maaari nang maging bahagi ng programa ng pagbabakuna laban sa COVID-19 ang mga post-graduate o undergraduate interns, clinical clerks, 4-year medicine at nursing na mga estudyante, ayon sa Commission on Higher Education (CHED).

Sa ilalim ng Joint Memorandum Circular No. 2021-003 na inisyu ng CHED at ng Department of Health (DOH), ang mga naturang estudyante ay maaari nang mag-volunteer bilang health screeners, vaccinators, pre o post vaccination monitors sa superbisyon ng mga licensed physicians at nurses.

“The government is now fast tracking the vaccination rollout as more COVID-19 vaccines arrive in the country. As we increase the number of vaccination sites and increase daily targets, these additional vaccinators and support staff are critical to achieve herd immunity in the next two months,” ani CHED Chairperson Prospero De Vera III sa isang statement.

Una nang inanunsiyo ng gobyerno na ang National Vaccination Days ay isasagawa mula Nobyembre 29 hanggang Disyembre 1, na layong makapag-administer ng 15 milyong indibidwal.

Ayon sa CHED, itinutulak na nila ang isang school-based vaccination sa lahat ng malalaking pribado at pampublikong higher education institutions (HEIs) simula pa noong Oktubre na sa kasalukuyan ay mayroon nang 61 HEIs na nag-o-operate bilang vaccination centers.

“While more than one million college students have already been vaccinated, this is only about 30% of the target number. We need to rapidly vaccinate more students,” sabi ni De Vera.

Tiniyak naman ng commission sa mga estudyante na ang kanilang naging volunteer work at nakumpletong bilang ng oras ay naka-credit sa kanilang internship, at ito ay sertipikado ng head ng vaccination team sa partikular na vaccination site kung saan sila nagbigay ng serbisyo.

Ang boluntaryong partisipasyon ng mga naturang estudyante sa mga vaccination sites ay ipapatupad anumang risk classification ng lugar o alert level na itinakda ng Inter-Agency Task Force for the Management of Emerging Infectious Diseases (IATF).

Inatasan na rin ang lahat ng CHED regional offices na makipagtulungan sa HEIs na mayroong medicine and nursing programs para makapangalap ng mga student-volunteer vaccinators at makipag-ugnayan sa DOH at lokal na gobyerno upang mai-assign ang mga student volunteers sa iba’t ibang vaccination sites.