Bading, sure na makararanas ng maligayang love life

ni Maestro Honorio Ong @Kapalaran Ayon Sa Numero | Oct. 4, 2024

Dear Maestro, 

Isa akong bading, at marami na rin akong karanasan sa mga lalaki. 

Ang kaso nga lang, wala namang lalaking nananatili sa buhay ko. Kung tutuusin, pera lang ang habol nila sa akin. 

Sa edad kong 45, nararamdaman ko na ‘yung pagtandang binata. Kaya naman, kailangan ko na rin magplano para sa future ko.

Sa katunayan, nangangarap din naman ako na may makasama sa aking pagtanda. 

Kaya nais ko sanang malaman kung may darating pa kayang lalaki na seseryoso sa akin, at makakasama ko habambuhay?

Ang birthday ko ay October 30, 1978.

Umaasa,

Nonie ng Ambiong, Baguio City   

---

Dear Nonie,   

Para mahigop mo ang suwerte sa larangan ng pag-ibig, at pakikipagrelasyon, magsuot ka ng kulay na pula, dilaw at berde. Kahit pa sabihing isa kang bakla o bading, may lalaki pa ring seseryoso sa iyo upang makakasama mo habambuhay.

Mas maganda kung babaguhin mo rin ang iyong lagda. Alisin mo ang malaking bilog na nagkukulong sa iyong pirma. Hindi mo na dapat ibalikwas pakaliwa ang dulong bahagi ng letrang “A” sa iyong last name. Sa halip, ang dapat na maging “last stroke” ng letrang “A” ay ‘yung tuwid patungo sa diresyong pakanan.

Sa ganyang lagda, ‘yun bang walang malaking bilog, at magulong burloloy, unti-unti na ring aayos ang buhay mo. 

Nonie, ‘wag ka mag-alala dahil may magkakagusto na rin sa iyo na seseryosohin ka, hanggang sa tuluy-tuloy na kayong magsama habambuhay upang bumuo ng isang maligayang pamilya. 

Dagdag dito, mapalad ka mula sa ika-18 ng Hunyo hanggang sa ika-27 ng Hulyo, mula sa ika-18 ng Oktubre hanggang sa ika-27 ng Nobyembre at mula sa ika-18 ng Pebrero hanggang sa ika-27 ng Marso, higit lalo sa mga petsang 3, 12, 21, 30, 9, 18, 27, 6, 15, 24, 2, 11, 20, 29, 7, 16 at 25.   

Sa sandaling nasunod mo ang mga simpleng rekomendasyong inilahad sa itaas – tiyak ang magaganap kahit sabihin pang bading o bakla ka, sa taong 2025, sa edad mong 47 pataas, sa buwan ng Oktubre hanggang Nobyembre, makakatagpo ka na rin ng isang lalaking makakasama mo habambuhay, ang lalaking tinutukoy ko ay nagtataglay ng zodiac sign na Sagittarius, na may birth date na 9, 18 o kaya’y 27.

Mag-aswang baon sa utang giginhawa 'pag nagtrabaho abroad

ni Maestro Honorio Ong @Kapalaran Ayon Sa Numero | Oct. 2, 2024

Dear Maestro,

Isa akong ilaw ng tahanan. Akala ko magiging okey na ang kalagayan namin dahil may trabaho naman ang mister ko. 

Pero sa kasamaang palad, bigla siyang nawala ng trabaho. Kaya naman ngayon, hirap na hirap kami. Apat ang mga anak namin, at unti-unti na rin kaming nababaon sa pagkakautang. 

Maestro, makakahanap pa kaya muli ng trabaho ang mister ko? Tama rin ba ang iniisip ko na maghanap na rin ng trabaho? Sa tingin ko kasi kailangan na talaga namin magtrabaho para naman lumuwag-lumuwag na rin ang buhay namin, at makapagbayad na rin kami sa mga pinagkakautangan namin. 

Isa pa, nahihiya at ayaw na rin naming umasa pa sa kani-kanyang magulang namin. 

Ang birthday ko ay February 5, 198, habang December 10, 1981 naman ang birthday ng mister ko.

Umaasa,

Glo ng  San Vicente, Jaen, Nueva Ecija

---

Dear Glo, 

Ayon sa birth date mong 5, sa zodiac sign na Aquarius, at sa destiny number na 8 (2+5+1981=1988/ 19+88=107/ 10+7=17/ 1+7=8), tama ang iniisip mo na tulungan ang iyong asawa sa pagtatrabaho upang mas madali kayong makaahon sa kahirapan, makapagbayad sa mga pagkakautang upang tuluyang umasenso ang inyong pamilya.

Kung saan, dahil ikaw ay may birth date na 5, mas mainam kung mag-a-apply ka sa abroad ngayong taon o sa susunod na taon, kapag ginawa mo ‘yan, mararamdaman mo agad ang suwerte, isang mabunga, at mabiyayang pangingibang-bansa na itatala sa iyong karanasan na siyang magiging daan, o simula upang unti-unti na kayong makaahon sa kahirapan, at sa mga pagkakautang, hanggang sa tuluyan na ring umunlad, at sumagana ang inyong pamilya sa aspetong pangkabuhayan.

Dagdag dito, ang birth date na 10 o 1 (ang 10 ay 1+0=1) ng mister mo ay nagsasabing suwerte rin ang asawa mo sa pangingibang-bansa, gayundin sa pagnenegosyo na may kaugnayan sa apoy, sa mga nilulutong bagay o pagkain, sa mga produktong ginagamitan ng init at elektrisidad, at sa iba pang mga produktong kauri nito.

Ayon sa Decadens ng iyong Kapalaran, sa sandaling sinunod n’yo ang mga simpleng rekomendasyon na inilahad sa itaas, tiyak ang magaganap, tulad ng nasabi na, sa taong 2024 o kaya’y sa susunod na taong 2025, sa nasabing panahon – kusang uunlad ang inyong kabuhayan hanggang sa tuluyan na rin kayong yumaman, na siyang nakatakda sa kapalaran ng mga taong naiimpluwensiyahan ng numerong singko at otso na tulad n’yo.

Kahit super lab pa ang no. 2… Babae, sa legal BF pa rin babagsak

ni Maestro Honorio Ong @Kapalaran Ayon Sa Numero | Sep. 30, 2024

Dear Maestro,

May dalawa akong boyfriend ngayon. Kaya sana matulungan n’yo ako kung sino ang dapat kong piliin sa kanila. 

‘Yung isa kong boyfriend ay legal, habang ‘yung isa naman ay illegal. Legal ang tawag ko kay Mr. Gemini, dahil siya ang ipinakilala kong boyfriend sa mga kaibigan at kamag-anak ko, samantalang si Mr. Virgo naman ay illegal, dahil lihim lang ang relasyon namin, kumbaga walang nakakaalam, kundi kaming dalawa lang. 

Pareho ko silang mahal, subalit mas matimbang ng kaunti si Mr. Virgo, dahil kahit alam niyang may boyfriend ako, hindi siya nagalit sa akin, at inunawa niya pa ang kalagayan ko. 

Kahit na ganu’n ang ginagawa ko, nagi-guilty din ako. Kaya nagbabalak na kong mamili sa kanilang dalawa. 

Maestro, sino kaya sa kanilang dalawa ang dapat kong piliin na maging asawa? 

Ang birthday ko ay September 28, 1995, habang si Mr. Gemini naman ay June 13, 1994, at September 13, 1994 naman si Mr. Virgo.  

Umaasa, 

Danicca ng San Isidro, Taytay, Rizal   

---

Dear Danicca,

Tumpak ang binabalak mong mamili ng isa sa dalawa mong boyfriend. Kung saan, ayon sa zodiac sign mong Libra, na may elementong air o hangin, at birth date na 1, ang 28 ay 2+8=10/ 1+0=1, sa destiny number na 7 (9+28+1995=2032/ 20+32=52/ 5+2=7), mas angkop sa iyo si Mr. Gemini na may birth date na 13 o 4 dahil ang 13 ay 1+3=4, habang sa zodiac sign naman niya ay may elemento ring air o hangin, at may destiny number na 6 (6+13+1994=2013/ 20+13=33/ 3+3=6). Kung saan, ang numerong 6 ay siya ring numero ng zodiac sign mong Libra na may ruling planet na Venus, kaya naman suwetung-suweto talaga kayo sa isa’t isa.

Mas ka-compatible mo talaga si Mr. Gemini, kung ikukumpara kay Mr. Virgo, kaya tama lang ang iniisip mo na mamili na lang ng isa sa dalawa mong boyfriend. Kaya naman, Danicca, si Mr. Gemini ang dapat mong piliin at makipag-break ka na agad kay Mr. Virgo, para mapalaya mo na rin siya sa kasalukuyang kahangalang ginagawa n’yo. 

Kapag naging tapat ka na sa iyong boyfriend at sa iyong sarili, tiyak ang magaganap, sa panahon ng iyong pag-aasawa, may pangako ng isang maligaya, maunlad at panghabambuhay na pagpapamilya ang nakatakdang mangyari at maganap sa susunod na taong 2025, sa edad mong 30 pataas.