Isang taon na, pero wa’ pa rin? Alamin: Mga numerong dapat alagaan para makasapul ng jackpot

ni Maestro Honorio Ong @Kapalaran Ayon Sa Numero | Nov. 20, 2024

Dear Maestro, 

May inaalagaan akong mga numero. Ang kaso, isang taon ko na iyong tinatayaan, pero hindi pa rin ako tumatama. 

Maestro, dapat ko pa bang ipagpatuloy ang pagtaya sa mga numerong iyon, o dapat ko na itong palitan ng iba at bagong numero?

Kung magbabago naman ako ng numero, ano’ng numero ang suwerte para sa akin? 

Nu’ng kalagitnaan ng taong 2024, sinubukan ko ring mag-apply sa abroad, pero hanggang ngayon ay hindi pa rin ako tinatawagan. Kaya nais ko rin sanang itanong sa inyo kung kailan kaya ako matutuloy sa pangingibang-bansa bilang isang seafarer? 

Ang birthday ko ay May 14, 1994.  

Umaasa,

Lawrence ng Lambakin, Jaen, Nueva Ecija

---

Dear Lawrence, 

Ang birth date mong 14 o 5 (ang 14 ay 1+4=5) sa destiny number na 6, naging 6 ang destiny number mo, dahil ang May 14, 1994 ay kinokompyut ng ganito

5+14+1994=2013/ 20+13=33/ 3+3=6, habang ang zodiac sign mo namang Taurus ang nagsasabing mapalad ka sa lahat ng numerong may sumatotal na 5, 8, 3 at 6, sa mga grupong nabanggit ka dapat humugot ng numero para makatikim ka ng malaking panalo.

Halibawa, sa grupo ng 5, kabilang ang mga numerong 14, 23, 32, 41, at iba pa na may sumatotal na 5.

Sa grupo naman ng 8, kabilang dito ang mga numerong 17, 26, 35, 44, at iba pa na may sumatotal na 8.

Sa grupo naman ng 3, kabilang dito ang mga numerong 12, 21, 30, 39 at iba pa na may sumatotal na 3. 

Samantala, sa grupo ng 6, kabilang dito ang mga numerong 15, 24, 33, 42 at iba pa na may sumatotal na 6.

Ngayon, kung kabilang sa nasabing mga grupo ang inaalagaan mong numero, tiyak ang magaganap – sa takdang panahong inilaan ng kapalaran, hindi ka dapat mainip at hindi ka rin dapat magpalit ng mga numerong iyong inaalagaan, sapagkat tiyak ang magaganap, darating at darating din ang saktong panahon na masasapul mo rin ang jackpot.

Mapalad ka naman tuwing sasapit ang ika-23 ng Disyembre hanggang ika-27 ng Enero, mula ika-23 ng Abril hanggang ika-27 ng Mayo at mula ika-23 ng Agosto hanggang ika-27 ng Setyembre, higit lalo sa araw ng Miyerkules, Huwebes at Biyernes, sa mga petsang 5, 14, 23, 9, 18, 27, 6, 15 at 24.

Asul, gray, puti at pula naman ang mapalad at masuwerte mong kulay na dapat mong isuot sa tuwing may mahalaga kang lakad at sa iba pang gawaing na may kaugnayan sa pakikipagsapalaran. Samantala, ang violet at lilac ay maaari mo ring ipamalit sa kulay na pula, kapag sawa ka na sa nasabing kulay.

Ka-compatible mo naman ang mga taong isinilang sa zodiac sign na Virgo, Capricorn, Scorpio, Libra at kapwa mo Taurus. Sa kanila ka sumama at makipagkuwentuhan, dahil ang nasabing mga nilalang ay makakatulong sa iyo lalo na sa iyong career at aspetong pangkabuhayan.

Habang ayon naman sa iyong Travel Calendar, sa taong 2026, sa edad mong 32 pataas, may isang mabunga at mabiyayang pagbabarko ang itatala sa iyong karanasan.

Dalagang swak sa nobyo, matutupad pa ang pangarap

ni Maestro Honorio Ong @Kapalaran Ayon Sa Numero | Nov. 16, 2024

Dear Maestro, 

Magandang araw sa inyong lahat r’yan sa Bulgar!

Kasalukuyan akong nagtatrabaho sa isang mall. Kailan kaya ako magkakaroon ng isang maganda at regular na career?

Pagdating naman sa pag-ibig, compatible ba kami ng kasalukuyan kong nobyo at kami na rin ba ang magkakatuluyan? Bago pa lang kami at dati rin kaming magkaibigan. 

Sana ay mabigyang pansin ninyo ang katanungan kong ito at sana magabayan n’yo rin ako para umunlad at lumigaya naman ang buhay ko.

Ang birthday ng boyfriend ko ay March 25, 1995, habang November 21, 1993 naman ang birthday ko.

Umaasa,

Mara ng Bangkal, Norzagaray, Bulacan

Dear Mara,

Kung ikalawa o ikatlong nobyo mo siya, tunay nga na compatible talaga kayo. Malaki rin ang tsansa na kayo na rin  magkatuluyan at magsama sa pagbuo ng isang maligaya at panghabambuhay na pagpapamilya.

Samantala, ang birth date mong 21 o 3 (ang 21 ay 2+1=3), sa destiny number na 9 (11+21+1993=2025/ 20+25=45/ 4+5=9), sa zodiac sign na pumapagitna sa Scorpio at Sagittarius, may kalituhan munang mangyayari sa career mo, tulad na lang din ng iyong zodiac sign na hindi mo malaman kung Scorpio o Sagittarius, na tinatawag nating “cusp”. 

Ang “cusp” ay tulad din ng papaalis at paparating na planeta sa isang zodiac sign, alanganin kumbaga ang kanyang puwesto.

Tulad ng birth date mong November 21, medyo hindi pa ganap na Sagittarius ang nasabing petsa at ang petsa ring ‘yan ay halos papatapos na ang Scorpio, at dahil medyo nakakalito nga, ganundin ang mararanasan mo sa iyong career, tulad nang nasabi na, medyo malilito ka muna.

Subalit, dahil 21 o 3 (2+1=3) ang birth date mo na may ruling planet na Jupiter. Kung saan, si Jupiter ang pinakamapalad na planeta sa lahat ng planeta. Ibig sabihin, darating din ang panahon na makakatanggap ka ng maraming magandang kapalaran, lalo na pagdating sa career at propesyon.  

Basta ang mahalaga, mapanalo mo sa pang-araw-araw mong karanasan ang impluwensiya ng planetang Jupiter.

Una, dapat palagi kang magsuot ng kulay asul, violet, lilac, maroon at red, higit lalo tuwing sasapit ang petsang 3, 12, 21, 30, 6, 15, 24, 9, 18, at 27, lalo na kung ang nasabing mga petsa ay natapat sa araw ng Martes, Huwebes at Biyernes.

Pangalawa, mag-ambisyon ka ng mataas. Halimbawa, saleslady ka ngayon, ambisyunin mong maging supervisor, kapag naging supervisor ka na, ‘wag kang tumigil mangarap na maging isang manager at kapag naging manager ka na, ‘wag ka pa ring titigil at ambisyunin mo namang ikaw ang magmay-ari ng mall na pinagtatrabahuhan mo ngayon.

Kapag ikaw na ang may-ari ng mall, hindi ka pa rin dapat tumigil mangarap, kaya ambisyunin mo naman ang marami pang mall at kapag naparami mo na ang iyong mall, ‘wag ka pa ring titigil mangarap. 

Sa lahat ng pangarap at anumang gusto mong gawin sa buhay mo, tandaan mong ganyan dapat ang maging konsepto ng iyong isipan, dahil ito ang kahulugan ng planetang Jupiter na nag-iimpluwensiya sa iyong kapalaran at pagkatao. 

Matataas na mga pangarap at ambisyon sa buhay, sa bandang huli ay talaga namang mangyayari at kusang matutupad sa kapalaran mo. 

Pangatlo, dapat mo ring malaman na ang iyong mapalad na panahon ay mula sa ika-18 ng Oktubre hanggang sa ika-27 ng Disyembre, mula sa ika-18 ng Marso hanggang ika-27 ng Abril at mula sa ika-18 ng Hulyo hanggang sa ika-27 ng Agosto. Ang batong turquoise na singsing naman ang magsisilbi mong talisman, taga-higop ng suwerte at pantaboy ng negatibong kapalaran, ganundin ang lahat ng uri ng bato o hiyas na may kulay violet ang isa ring puwedeng isaalang-alang.

Sa sandaling nasunod mo ang mga simpleng rekomendasyon nabanggit, tiyak ang magaganap sa susunod na taong 2025, anuman ang maluho at mataas mong ambisyon sa buhay, sa edad mong 27 pataas, kusa at isa-isa mo na rin itong matutupad.

]

Mga dapat gawin ng mag-asawang excited lumipat ng bahay

ni Maestro Honorio Ong @Kapalaran Ayon Sa Numero | Nov. 13, 2024

Dear Maestro,

May nabili kaming bagong bahay. Pina-renovate agad namin ito at malapit na rin itong matapos, pintura at kaunting dekorasyon na lang ang kulang. 

Maestro, ano bang magandang kulay ang bagay sa bahay namin at ano’ng pandispley ang dapat naming ilagay? 

Meron din itong bakanteng lote, pero hindi pa namin alam kung ano ang ilalagay namin du’n. 

Once na matapos na ito, balak na sana naming lumipat ngayong Nobyembre. Favorable ba sa amin ang buwan na ito? Kung sakaling hindi, ano’ng petsa at buwan dapat kami lumipat? 

Ang birthday ko ay April 20, 1974, habang September 16, 1969 naman ang mister ko.

Umaasa,

Liezel ng San Roque, Antipolo City, Rizal 

---

Dear Liezel,

Ayon sa Chinese Astrology at sa taon ng iyong kapanganakan, nasasakupan ka ng elementong wood o kahoy, habang ang taong 1969 naman ng iyong mister ay under ng elementong earth.

Kung saan, ang prinsipyo sa Chinese or Oriental Astrology ay kailangan palaging nakabalanse.

Kaya ang pangkaraniwang tinatanong ay, “Ano’ng elemento pa ba ang kulang sa iyo?”

Kapag nalaman mo na ang elementong kulang sa iyong buhay, ‘yun ang idagdag mo para magkaroon ka ng harmony. Kapag meron nito ang isang tao, tiyak na liligaya at uunlad ang kanilang tahanan.  

Sa kaso n’yo, dahil ikaw ay isang “wood-tiger,” habang ang mister mo naman ay “earth-rooster” ang kailangan n’yong elemento para makumpleto ang inyong pagsasama ay ang “water, fire o kaya’y metal”.

Kaya ang pupuwede n’yong ipandispley sa harapan ng inyong bakuran na laging natatanaw tuwing dadaan kayo ay ang mga bagay na metal. Kaya naman, maghanap ka ng dalawang metal na nakatayo o pigura ng mag-asawa na magkayakap at waring naghahalikan. 

Sa ganyang paraan, unconsciously sa tuwing matatanaw n’yo ang nasabing pigura, lalong titibay ang inyong pagmamahalan.

Kung fire naman ang elementong maisip n’yo, puwede naman kayo mag-display ng isang pigura na nakatayong nilalang na walang damit at may pakpak sa paa, ‘yun bang pigura ni Mercury na may hawak na sulo. ‘Yung tipong Olympic torch na sinisindihan tuwing may Olympic games. Ang kaibahan nga lang ng pandispley na nabanggit na maaari n’yong ilagay sa inyong bakuran ay yari sa metal o bato. Sa ganyang paraan, mananatiling mainit ang inyong pagmamahalan habambuhay at magiging mabilis din ang pagdating ng dagdag-salapi at kayamanan sa inyong pamilya.

Kung ang mapipili n’yo namang elemento ay tubig. Maghanap kayo ng pigura ng dalawang batang lalaki na nakahubad, umiihi, at dapat tumatama ang ihi sa mga berdeng halaman sa harap ng inyong bahay. Sa ganyang paraan, ang maalab at maligayang pagmamahalan ay hindi mawawaglit sa bawat miyembro ng inyong pamilya.

Kung ang zodiac sign mo namang nasa pagitan ng Aries at Taurus at zodiac sign na Virgo ng mister mo ang tatanungin, kapwa kayo earth type sign. Kaya naman tama ang buwan ng Nobyembre para lumipat ng bahay, sapagkat ang Nobyembre ay nasasakop ng zodiac sign na “water” na siya ring elementong kailangan ng zodiac sign n’yo para tuluy-tuloy na umunlad at sumagana ang inyong samahan. 

Gayunman, isaalang-alang n’yo rin ang petsang November 11 to 20, 2024 upang higit na makumpleto at mas maging maligaya ang inyong pamilya sa paglipat n’yo ng bahay.

Dapat bago kayo lumipat, ituon n’yo ito sa panahon ng first quarter, new moon o full moon ang buwan, upang tulad ng liwanag at sinag ng buwan, para patuloy din ang pagbuhos ng mga biyaya at pagpapala sa inyong pamilya at sa bago n’yong lilipatang bahay.

Mapalad n’yo namang kulay ang lahat ng hibo o shade ng green para sa labas at loob ng bahay, habang pula at pink naman ang masuwerteng kulay para sa inyong bubong.

Huwag n’yo ring kalilimutang ipa-blessing muna sa isang pari ang bagong bahay na inyong lilipatan, upang mapanatili ang positibong magdadala sa inyo ng suwerte at kaligayahan habambuhay.