Mga residente, nagsumbong... Mga NPA na nagtangkang manggulo sa eleksiyon sa Albay, napigilan

ni Zel Fernandez | May 10, 2022

Nasawata ang tangkang panggugulo umano ng New People’s Army (NPA) ng mga tropa ng 49th Infantry Battalion (IB) ng Philippine Army sa ginanap na eleksiyon sa Albay, kahapon.

Bandang alas:5:00 ng umaga kahapon, isinumbong umano ng mga residente sa Sitio Lilibdon, Brgy. Maogog, Jovellar, Albay ang limang armadong teroristang komunista.

Kasunod nito, agad na nakaengkuwentro ng mga tropa ng Philippine Army ang mga tinukoy na NPA.

Pahayag ni Major General Alex Luna, Commander ng 9th Infantry (SPEAR) Division at ng Joint Task Force Bicolandia (JTFB), sa tulong ng mahigpit na seguridad na ipinatupad ng pamahalaan ngayong 2022 National and Local Elections ay naging matagumpay ang operasyon ng kasundaluhan kontra NPA.

Narekober umano sa encounter site ang isang M16 rifle, isang Cal. 45, mga gamit pangkomunikasyon at mga personal na gamit ng mga kaaway, makalipas umano ang walong minutong palitan ng putok sa pagitan ng mga rumespondeng sundalo at ng mga NPA.

Fully furnished, kongkreto at may 2 bedrooms... Brand new house, tinanggap ng 10 NPA

ni Zel Fernandez | April 24, 2022

Sampung dating miyembro ng New People's Army (NPA) kasama ang kani-kanilang mga pamilya ang opisyal na tumanggap ng kanilang brand new house sa Sultan Kudarat.

Araw ng Huwebes, Abril 21, tinanggap ng mga dating NPA ang kanilang bagong bahay mula sa national government sa pamamagitan ng National Housing Authority (NHA), sa pakikipagtulungan ng Municipal Government ng Senator Ninoy Aquino, Provincial Government ng Sultan Kudarat, Philippine Army at iba pang mga partners nito.

Sa pahayag ni NHA XII Regional Manager Engr. Zenaida Cabiles, fully furnished, kongkreto at may dalawang silid-tulugan ang bawat bahay na ipinagkaloob sa mga nagbalik-loob na rebelde.

Ang mga pabahay ay itinayo sa bagong housing village na nakatalaga para sa mga former rebels (FRs) sa bansa sa ilalim ng Enhanced Comprehensive Local Integration Program (ECLIP).

Ayon kay Cabiles, aabot sa P450,000 ang inilaan ng pamahalaan upang maitayo ang bawat bahay para sa bawat benepisyaryo.

Handog naman umano ng mga tropa ng 549th Engineer "Kapayapaan" Battalion ng 54th Engineer Brigade ng Philippine Army ang labor para sa konstruksiyon ng mga bahay kung saan ang NHA funding ay idinaan sa 7th Infantry Battalion.

Buwan ng Setyembre taong 2021 nang simulan ang konstruksiyon ng mga bahay na matatagpuan sa Sitio Lemangga, Brgy. Midtungok, Senator Ninoy Aquino, Sultan Kudarat.

Tropa ng Phil. Army, inambus ng NPA... 2 minors sapul, patay

ni Lolet Abania | February 10, 2022

Patay ang dalawang menor-de-edad habang isa pang sibilyan ang nasugatan matapos na tambangan noong Martes ng rebeldeng New People’s Army (NPA) ang tropa ng Philippine Army sa Catubig, Northern Samar.

Sa ulat ng Joint Task Force Storm at 8th Infantry Division ngayong Huwebes, ang 12-anyos na biktima ay idineklarang dead-on-arrival sa Catubig Hospital, habang ang isa pang 13-anyos na biktima ay nasawi ng umaga kinabukasan sa Northern Samar Hospital.

“Before he died, the 13-year-old boy was able to narrate to the barangay officials that they were hit by NPA gunfires,” ani 8ID commander Major General Edgardo de Leon sa isang statement.

“The 26-year-old survivor revealed that they were behind the soldiers when the NPAs opened fire, prompting them to run away but unfortunately they were hit,” dagdag ni De Leon.

Ayon kay 803rd Brigade commander Colonel Perfecto Peñaredondo, patungo ang tropa ng militar sa Barangay Roxas para alamin ang nakuhang report hinggil sa presensiya ng mga rebeldeng NPA nang atakehin at pagbabarilin sila ng mga ito.

Sinabi ni Peñaredondo, nakuha naman ng grupo ng Army na makakober at makadapa sa lupa, subalit ang mga sibilyan na nasa likuran nila ay tinamaan ng mga bala ng baril.

Isa pang menor-de-edad ang nakaligtas naman at ini-report ang insidente sa mga opisyal ng barangay. Agad na rumesponde ang mga kawani ng barangay at dinala ang mga biktima sa ospital.

Ayon pa sa militar, ang Catubig government at Northern Samar government ay agad ding nagbigay ng assistance sa mga kaanak ng namatay na mga biktima at sa sibilyang nasugatan.