"Walang bakuna, walang trabaho," bawal! — DOH

ni Lolet Abania | August 5, 2021

Ipinaalala ng Department of Health (DOH) sa mga employers na ang pag-require ng COVID-19 vaccination sa kanilang mga empleyado ay hindi pinahihintulutan. Batay sa DOH sa ilalim ng Department of Labor and Employment (DOLE) Advisory No. 1 series of 2021, lahat ng employers ay maaaring himukin lamang ang kanilang mga empleyado na tumanggap ng COVID-19 vaccine subalit hindi dapat i-require o pilitin na magpabakuna.

“However, any employee who chooses not to get vaccinated or fails to get vaccinated shall not be discriminated against in terms of employment,” saad ng DOH sa isang statement. Sa ilalim ng Republic Act No. 11525 o COVID-19 Vaccination Program Act of 2021, ang mga vaccine cards ay hindi kinokonsiderang dagdag na requirement para matanggap sa trabaho.

Una nang binalaan ng Department of the Interior and Local Government (DILG) ang publiko hinggil sa kumalat na fake reports ukol sa COVID-19 cash assistance at pagbabakuna.

Gayundin, hiniling ng Metropolitan Manila Development Authority (MMDA) sa National Bureau of Investigation (NBI) na imbestigahan ang maling impormasyong ito na nagdulot ng pagpa-panic ng mga residente na maaapektuhan ng pagsasailalim sa enhanced community quarantine (ECQ) ng Metro Manila.

Employer na hihirit ng 'No vaccine, no work', kakasuhan

ni Ronalyn Seminiano Reonico | March 6, 2021

Pinalagan ng Department of Labor and Employment ang diumano'y “no vaccine, no work” policy ng ilang establisimyento. Pahayag ni Labor Secretary Silvestre Bello III, "‘Yung no vaccine, no work, illegal 'yan, bawal ‘yan."

Hindi umano maaaring pilitin ang mga manggagawa na magpabakuna laban sa COVID-19 kung ayaw nila. Saad ni Bello, "Kaya wala pong ganyang patakaran. Kung sino man 'yung employer na gumagawa niyan, alam niya na mali ang ginagawa niya."

Ipinagbigay-alam ng Associated Labor Union (ALU) sa DOLE ang natanggap nilang hinaing ng mga manggagawa lalo na ang mga hotel, restaurant at BPO workers na diumano'y inoobliga silang magpabakuna.

Pahayag ni Alan Tanjusay, spokesperson ng ALU-Trade Union Congress of the Philippines, "Meron tayong tinatawag na Anti-Discrimination Law.

‘Yung discrimination ay iba-ibang klase na porma at uri ngunit sa aming paningin, isa itong uri ng discrimination. "So, kung mayroong magrereklamong manggagawa, tutulungan naming magsampa ng kaso."