Nuclear power, posibleng magpababa sa singil sa kuryente — ERC

ni Lolet Abania | June 26, 2022

Iminungkahi ng Energy Regulatory Commission (ERC) ngayong Linggo sa papasok na administrasyon ni President-elect Ferdinand “Bongbong” Marcos na ang pagdaragdag ng nuclear energy sa power mix ng bansa ay maaaring makapagpababa sa gastusin ng kuryente o electricity sa bansa.

Ito ang sinabi ni ERC chairperson Agnes Devanadera sa isang interview nang tanungin siya kung ano ang kanyang irerekomenda sa susunod na administrasyon upang i-address ang kasalukuyang problema sa power supply ng bansa.

“Kailangan ma-determine ng pamahalaan ano talaga ang energy mix. Anong percent ang renewable energy, anong percent ang coal, anong percent ang biomass? Isama na ang nuclear kasi ang hinahanap natin ay reliable and reasonably priced source of energy,” paliwanag ni Devanadera.

“Ang nuclear, isa ‘yan sa posibleng makapagpababa ng ating cost ng kuryente at ‘yan naman, iba ang technology sa nuclear. Hindi naman kailangan katulad ng Bataan Nuclear Power Plant na pagkalaki-laki. Meron na tayong modular na mas madaling itayo,” dagdag pa niya.

Ito rin ayon kay Devanadera kaya inalagay ng National Grid Corporation of the Philippines (NGCP) ang Luzon Grid sa ilalim ng yellow alert status noong nakaraang linggo.

Ang yellow alert status ay indikasyon na ang grid ay mayroong thin reserves, base sa pagkakaiba sa pagitan ng supply at demand, kung saan may 11,959 megawatts ng available capacity laban sa 11,350 megawatts peak demand.

Subalit, paalala ni Devanadera sa administrasyong Marcos na ang paglalagay ng mga bagong sources ng energy gaya ng nuclear power ay maaaring tumagal ng mahabang panahon, kaya kinakailangan ng tinatawag na demand-side management para rito.

Una nang sinabi ni Department of Energy (DOE) Undersecretary Gerardo Erguiza Jr., “[they would] ramp up the regulatory framework of the inclusion of nuclear energy in the country’s power mix which it hopes the next administration will adopt.”

Ayon kay Erquiza, pinag-aaralan na ito ng DOE para i-assess ang kaligtasan at seguridad ng nuclear power sa bansa na nakahanay sa international standards.

Luzon Grid, inilagay sa yellow alert ng NGCP

ni Lolet Abania | June 21, 2022

Inilagay ng National Grid Corporation of the Philippines (NGCP) ang Luzon Grid sa ilalim ng yellow alert ngayong Martes, matapos ang tinatawag na forced outage ng maraming planta sa buong bansa.

Sa isang advisory, ipinahayag ng NGCP na ang Luzon Grid ay nasa yellow alert mula ala-1:00 ng hapon hanggang alas-4:00 ng hapon ngayong Martes, kung saan anila, “the grid has thin reserves based on the difference between supply and demand.”

Ayon sa NGCP, ang operating requirement ay dapat mayroong 11,385 megawatts, na may available capacity ng 12,251 megawatts at isang net operating margin ng 412 megawatts.

Sinabi pa ng NGCP, “a total unplanned unavailable energy of 1,592 megawatts due to the forced outage of QPPL, SLPGC 1, SLPGC3, SLPGC 4, GMEC 1, GMEC 2, and Calaca.”

Luzon grid, inilagay sa red alert.. 1M kostumer, nawalan ng kuryente — Meralco

ni Lolet Abania | June 18, 2022

Pinutol pansamantala ng Manila Electric Company (Meralco) ang suplay ng kuryente sa mahigit isang milyong customers nito ngayong Sabado, habang ang Luzon power grid ay inilagay sa red alert.

Sa isang advisory, ayon sa Department of Energy (DOE), alas-2:45 ng hapon ay isinailalim ng National Grid Corporation of the Philippines (NGCP) ang Luzon grid sa red alert, na ang ibig sabihin ay nakaranas ng kakulangan sa power supply na maaaring humantong sa pagkakaroon ng power interruptions dahil sa tinatawag na “generation deficiency.”

Ito ang nag-trigger ayon sa DOE, para makaranas ng power interruption sa mga franchise areas ng Meralco at iba pang distribution utilities sa Luzon.

Sa hiwalay na advisory, sinabi ng Meralco na nagpatupad sila ng automatic load dropping (ALD), isang safety procedure kung saan ang kuryente o power ay kanilang pinutol sa mga certain areas dahil sa napakababang suplay nito nang mas maaga pa ng alas-1:53 ng hapon.

“This was due to the decrease of an approximate 1,200 megawatts in Meralco’s load affecting around 1.6 million customers in portions of Caloocan, Valenzuela, Malabon, Manila, Makati, Muntinlupa, Las Piñas, in Metro Manila; as well as parts of Bulacan, Rizal, Laguna and Cavite,” saad ng Meralco. Gayunman sinabi ng Meralco, “the power was fully restored by 2:11 p.m.”

Ayon naman sa DOE, “a report by the NGCP stated that the Hermosa-BCCP 230 kilovolt lines 1 and 2 tripped and isolated the Bataan Plants, resulting in ALD at Meralco and NGCP feeders at 1:53 p.m.” Ani pa ng ahensiya na ang mga apektadong ALD feeders mula sa Meralco at ang NGCP ay nai-restore ng alas-2:11 ng hapon at alas-2:30 ng hapon, ayon sa pagkakasunod.

“This prompted the DOE to instruct the NGCP to immediately resolve the transmission line issues, submit to the DOE the list of affected customers that experienced power interruption, and explain the details of the incident,” pahayag ng DOE.

“The DOE has also initiated its coordination with the Energy Regulatory Commission in addressing this matter,” dagdag ng ahensiya.