Gatchalian pinuri ang desisyon ng Ombudsman hinggil sa Chevron-UC Malampaya Deal

by Info @Brand Zone | Dec. 12, 2024

Pinuri ni Senador Win Gatchalian ang Office of the Ombudsman sa agarang aksyon nito kaugnay ng reklamong isinampa niya hinggil sa kontrobersyal na pagbili ng UC Malampaya sa 45% stake ng Chevron sa Malampaya gas project.

Sa desisyon nito noong Nobyembre 29, 2024, sinabi ng Ombudsman na may probable cause upang kasuhan si dating Department of Energy Secretary Alfonso Cusi at iba pang opisyal ng DOE dahil sa paglabag sa Section 3(e) ng RA 3019 o ang Anti-Graft and Corrupt Practices Act. Iniutos din ang pagsasampa ng kaukulang kaso sa korte.

“Ang desisyon ay isang malinaw na pagpapatibay ng aming matagal nang sinasabi – na ang Chevron-UC Malampaya deal ay puno ng iregularidad at hindi naprotektahan ang interes ng publiko,” ani Gatchalian.

“Ang hakbang na papanagutin ang mga opisyal na ito ay isang hakbang patungo sa hustisya at paalala na ang mga lingkod-bayan ay dapat laging kumilos para sa kapakanan ng sambayanang Pilipino,” dagdag niya.

Ang Chevron-UC Malampaya deal, na naisakatuparan sa pamamagitan ng isang Share Sale and Purchase Agreement (SPA) noong Oktubre 2019, ay nagbigay-daan sa UC Malampaya na makuha ang 45% stake ng Chevron sa gas field sa kabila ng kakulangan nito sa teknikal at pinansyal na kapasidad upang tugunan ang mga obligasyon nito sa ilalim ng Malampaya Service Contract. Sinabi ng Ombudsman na minadali ng mga naturang opisyal ang proseso ng pagsusuri at ang mga ito ay “kumilos nang may hayagang masamang hangarin, malinaw na pagkiling, o matinding kapabayaan.”

Muling iginiit ni Gatchalian ang kanyang matagal nang panawagan para sa pananagutan sa usaping ito, binibigyang-diin na maging ang Senado ay nagpahayag ng posisyon hinggil dito. “Noong Pebrero 2022, nagpatibay ang Senado ng isang resolusyon na humihimok sa pagsasampa ng nararapat na kasong kriminal at administratibo laban kina Cusi at iba pang opisyal ng DOE na nag-evaluate at nagrekomenda ng pag-apruba sa kwestyonableng kasunduang ito,” aniya.

Ang Malampaya gas project ay isang mahalagang mapagkukunan ng enerhiya para sa Pilipinas, na nagsusuplay ng malaking bahagi ng kuryente ng bansa. “Hindi lang ito tungkol sa mga direktang sangkot – ito ay tungkol sa pangangalaga sa seguridad ng enerhiya ng bansa at pagtiyak na ang tiwala ng mga Pilipino sa mga pampublikong institusyon ay mapanatili,” pagtatapos niya.

Higit 39K residente, inilikas dahil sa aktibidad ng Bulkang Kanlaon

ni Eli San Miguel @News | Dec. 11, 2024

Photo: XSR Adventures

Kabuuang 39,258 katao o 9,942 pamilya ang nailikas na sa gitna ng aktibidad ng Bulkang Kanlaon, ayon sa Office of Civil Defense (OCD) ngayong Miyerkules.

Sa isang press conference, sinabi ni OCD Assistant Secretary Bernardo Rafaelito Alejandro IV na target ng mga otoridad na ilikas ang 84,549 katao o humigit-kumulang 17,000 pamilya mula sa anim na kilometrong danger zone.

Noong Lunes, sumabog ang Bulkang Kanlaon, na nagresulta sa makapal na usok na mabilis na umakyat sa taas na 4,000 metro.

Naiulat ang pag-ulan ng abo, at bumaba ang pyroclastic density currents (PDCs) sa bulkan.

Itinaas ang Alert Level 3, na nangangahulugang “intensified or magmatic unrest,” sa Bulkang Kanlaon.

Opisina ni Pres. Yoon ng SK, sinalakay ng pulisya dahil sa martial law

ni Angela Fernando @Overseas News | Dec. 11, 2024

Photo: Hawak ng mga nag-protesta ang larawan nina South Korean President Yoon Suk-yeol at dating Defence Minister Kim Yong-hyun, Dec. 5, 2024 - Disyembre 5, 2024. ( Ahn Young-Joon / AP Photo )

Sinalakay ng South Korean police ang opisina ni Pres. Yoon Suk Yeol, ayon sa isang opisyal ng presidential security ngayong Miyerkules, bilang bahagi ng pinalawak na imbestigasyon kaugnay ng nabigong plano nito na magpatupad ng martial law.

Samantala, si Kim Yong-hyun, dating defense minister at malapit na kaalyado ni Yoon, ay nagtangkang magpakamatay sa detention center kung saan siya nakakulong matapos maaresto.

Ayon sa isang opisyal ng Justice Ministry sa pagdinig ng parliyamento, patuloy na binabantayan ang kanyang kalagayan.

Ang pagsalakay sa opisina ni Yoon ay hakbang sa pinalawak na imbestigasyon laban kay Yoon at mga mataas na opisyal ng pulisya at militar kaugnay ng hindi inaasahang deklarasyon ng martial law nu'ng Disyembre 3.

Nagdulot din ang nasabing insidente ng constitutional crisis sa ika-apat na pinakamalaking ekonomiya sa Asya at isa sa mga mahahalagang kaalyado ng United States.