2 bagets, patay sa aksidente

News @Balitang Probinsiya | April 17, 2024

Iloilo — Dalawang binatilyo ang namatay nang bumangga ang kinalululanan nilang motorsiklo sa concrete railings sa national highway ng bayan ng Calinog sa lalawigang ito.

Hindi na muna pinangalanan ang dalawang biktima habang hindi pa naipapabatid sa kanilang pamilya ang sinapit ng dalawang binatilyo na kapwa 17-anyos. 

Ayon sa ulat, nawalan umano ng kontrol ang rider na binatilyo sa pagmamaneho ng motorsiklo na kinalululanan din ng isa pang biktima kaya bumangga sila sa concrete railings.

Nabatid na sa lakas ng impact ay nagtamo ng malaking pinsala sa ulo at katawan ang mga biktima.

Dinala ng mga saksi ang mga biktima sa ospital, pero kapwa sila idineklarang dead-on-arrival.

Mga bilangguan, ‘di itatayo sa Masungi Georeserve — BuCor

ni Eli San Miguel - Trainee @News | April 16, 2024

Tiniyak ni Bureau of Corrections (BuCor) Director General Gregorio Catapang Jr. nitong Martes na walang bilangguan ang itatayo sa loob ng Masungi Georeserve sa Baras, Rizal.

“The bureau with proper coordination with the Department of Environment and Natural Resources will also conduct (a) delineation survey sometime next month but do not misconstrue this to anything because we only want to determine the metes and bounds of BuCor property that we need to secure,” pahayag ni Catapang.

Noong simula ng 2023, nagkaroon ng alitan ang BuCor at ang Masungi Georeserve Foundation hinggil sa protektadong lugar matapos sabihin ng BuCor na nais nitong itayo ang bagong headquarters sa lugar.

Sinabi ng BuCor na iginawad sa kanilang ahensiya ang 270-ektaryang ari-arian sa Masungi sa ilalim ng Proclamation No. 1158, na nilagdaan ni dating Pangulong Gloria Macapagal-Arroyo.

Samantala, sinabi ni Catapang na nananatiling nakabinbin ang ideya na magtayo ng bagong headquarters habang isinasagawa pa ang karagdagang pag-aaral.

2 bebot, timbog sa buy-bust

News @Balitang Probinsiya | April 15, 2024

Cavite — Dalawang babaeng drug pusher ang nadakip sa buy-bust operation ng mga otoridad kamakalawa sa Brgy. Habay 1, Bacoor City sa lalawigang ito.

Ang mga suspek ay kinilala ng pulisya sa mga alyas na “Jica,” nasa hustong gulang at “Princess,” menor-de-edad, kapwa residente sa nasabing lalawigan.

Ayon sa ulat, naaresto ang mga suspek nang pagbentahan nila ng umano’y shabu ang mga operatiba na nagpanggap na buyer.

Sa ngayon ay inaalam pa ng mga otoridad ang dami ng hinihinalang shabu na nakumpiska sa dalawang suspek. 

Nakapiit na si “Jica” sa detention cell, samantalang ang menor-de-edad na kasama nito ay nasa pangangalaga na ng Dept. of Social Welfare ang Development (DSWD).