10 patay, 3 sugatan sa shooting incident sa Buffalo, New York

ni Lolet Abania | May 15, 2022

Todas ang 10 indibidwal habang tatlo ang nasugatan matapos na pagbabarilin sila ng isang 18-anyos na gunman sa isang grocery store sa Jefferson Avenue, Buffalo, New York nitong Sabado (New York Time).

Ayon kay Buffalo Police Department Commissioner Joseph Gramaglia, naganap ang pamamaril bandang alas-2:30 ng hapon, habang sumuko ang suspek sa pulisya matapos ang insidente. Iniimbestigahan na ng mga awtoridad ang insidente, kung saan pinaniniwalaan nila itong isang hate crime at akto ng “racially motivated violent extremism.”

Sinabi rin ng pulisya na armado ang suspek na isang puti o white American ng isang assault-style rifle at mag-isang dumating sa Buffalo mula sa New York county ilang oras umano ang layo sa target niyang grocery store na itinuturing na komunidad ng mga itim na Amerikano o Black community.

Sa salaysay naman ng mga nakasaksi, pumasok ang suspek sa grocery store na nakasuot ng military-type gear at body armor, at may dalang rifle.

Ayon pa sa mga opisyal ng pulisya, 11 mula sa 13 biktima na tinamaan ng bala ng baril ay mga Black habang dalawa naman ay puti.

Kaugnay nito, ayon sa Philippine Consulate General, wala namang Pilipino na nadamay sa panibagong shooting incident na naganap sa Buffalo, New York.

“Initial reports received by Philippine Consulate General in New York indicate no Filipino casualties in mass shooting incident in Buffalo New York that left 10 people dead,” pahayag ni Consul General Elmer Cato. Aniya pa, mayroong 540 Pinoy na nasa Buffalo, New York sa ngayon.

Tela na gawa sa saging bumida sa New York Fashion Week

ni Jasmin Joy Evangelista | March 15, 2022

Ibinida ng isang Filipino fashion designer na nakabase sa New York ang telang gawa sa saging.

Ipinanganak at lumaki sa Davao del Norte, si Joy Soo ay dating certified public accountant, na kamakailan lamang ay nagbalik upang ipagpatuloy ang first love na fashion designing. Nagsimula siya ng kanyang sariling brand na Musa Fabric, na nasa tatlong taon nang gumagawa ng mga damit at accessories.

Sa ginanap na New York Fashion Week, nagsagawa ng fashion show si Soo at doon ay featured ang kanyang designs na gawa sa 50% banana fabric.

“Iyong mga tao na nag-watch ng fashion show were so amazed. Alam ko amazed na amazed sila kasi iyong designs, in-incorporate ko doon iyong tribal designs and hindi nila nakikita iyong mga design na iyon doon,” pahayag ng designer sa isang TV show.

“Talagang fulfilling siya. Dito ko nakita ang fulfillment sa work ko. Nakapagbigay sa kanila ng new hope and new life and new inspiration itong pag-weave ng musa fabric,” dagdag ni Soo.

Maliban sa mga PDLs, ang indigenous people sa Davao tulad ng Ata Manabos at Dibabawon , ay mga benepisyaryo rin ng mga obra ni Soo.

Ipinaliwanag din ni Soo kung paano ginagawa ang banana fabric: “Ang process nito is iyong mga waist material na na-trunk ng banana, pinuputol at pino-proseso siya. Ang tawag doon ay decortication.”

Kung mayroong pangarap si Soo sa fashion industry ng Pilipinas, ito ay ang tangkilikin ng mga Pinoy ang ating local products at designs bago pa man ito kagiliwan sa iba’t ibang bansa.

"We have to be supportive of our own brand. Iba ang feeling if you are wearing your own product. Let's support local dahil sa totoo lang, one single purchase of local product will make a difference for so many people," ani Soo.

Kabilang ang 9 na bata… 19 katao patay sa sunog sa apartment building sa New York

ni Jasmin Joy Evangelista | January 10, 2022

Patay ang 19 na tao, kabilang ang siyam na bata, at dose-dosena ang nasugatan nang sumiklab ang sunog sa isang 19-floor building sa The Bronx borough ng New York City noong Linggo, ayon sa opisyal ng lungsod.

Ayon kay New York City Mayor Eric Adams, 19 katao ang nasawi sa sumiklab na sunog bandang 11 a.m. sa isang brown-brick building na mayroong murang housing units.

Nito ring Linggo ay sinabi ng mga opisyal na 32 katao ang dinala sa ospital na nagtamo ng malalang injuries habang mayroon pang 60 katao na nasugatan din sa insidente.

"It's a tragedy beyond measure," pahayag ni Adams sa Twitter. "Join me in praying for those we lost, especially the 9 innocent young lives that were cut short."

Kasalukuyan pang iniimbestigahan ang sanhi ng sunog ngunit posible umanong umani ng espekulasyon ang safety standards ng nasabing low-income city housing.

Ito na ang ikalawang matinding sunog sa residential complex sa US nitong linggo matapos na masawi ang 12 katao kabilang ang 8 bata sa sumiklab na sunog noong Miyerkules sa isang public housing apartment building sa Philadelphia.