4 arestado sa pekeng pera — NBI

ni Lolet Abania | February 1, 2022

Arestado ang apat na indibidwal ng National Bureau of Investigation (NBI) na mula sa Central Luzon matapos makuhanan ng counterfeit banknotes o pekeng pera.

Kinilala ni NBI officer-in-charge Eric Distor, ang mga inarestong suspek na sina Joeylyn Castro, Virgilio Yalung, Zenia Andres at Marilyn Lucero.

Sa report ng NBI, ikinasa ng mga law enforcers ang isang operasyon laban sa mga suspek matapos na makatanggap sila ng impormasyon hinggil sa palitan umano ng pekeng banknotes.

“A group of individuals were about to proceed to a money changer in Angeles City to exchange the counterfeit US dollars into Philippine pesos,” sabi ng NBI.

Ayon sa NBI, naaresto ng mga awtoridad sina Castro at Yalung sa Angeles City, makaraang tangkain ng mga ito na ipalit ang kanilang pekeng US dollars sa isang money changer.

Inginuso naman nina Castro at Yalung, ang source ng kanilang pekeng pera, kaya agad nagsagawa ang mga operatiba ng follow-up operation sa Bamban, Tarlac, kung saan nadakip sina Andres at Lucero, batay sa ulat ng bureau.

Nakumpiska kina Castro at Yalung ang 78 piraso ng pekeng US$100 bills, habang 78 piraso ng pekeng US dollar bills at 2 bundle ng pekeng P1,000 ang nakuha kina Andres at Lucero.

Nahaharap ang mga suspek sa kasong illegal possession and use of false bank notes, ayon sa NBI.

5 arestado sa BDO ‘hacking’ incident

ni Lolet Abania | January 21, 2022

Nadakip ng mga awtoridad ang limang indibidwal na sangkot umano sa “hacking” incident na nakapambiktima ng ilang may account sa BDO Unibank Inc. na naganap noong Disyembre 2021.

Ayon sa pahayag ng National Bureau of Investigation (NBI), ang mga naaresto ay bahagi ng “Mark Nagoyo Heist Group,” kung saan ang grupo ang nasa likod ng BDO hacking incidents na nakaapekto sa mahigit 700 customers.

Batay sa report ng ahensiya, dalawa sa naarestong suspek ay Nigerian nationals na nahuli sa entrapment operation na ikinasa ng NBI-Cybercrime Division sa Mabalacat, Pampanga noong Enero 18.

“Ang involvement nila is to synchronize ‘yung movement ng members ng group. Ino-open nila ang account, sila ang nagpapa-falsify ng mga dokumento tapos ‘yung mga downloaded amounts o downloaded cash, sila ang nagko-consolidate from different downloaders at sila rin ang nagbibigay ng payoff,” paliwanag ni National Bureau of Investigation (NBI) Cybercrime Division Chief Vic Lorenzo.

Isa pang suspek ang naaresto ng mga operatiba sa isang buy-bust operation naman sa Floridablanca, Pampanga na nagbebenta ng scampages o phishing websites na ayon sa NBI na base rin sa kanilang informant, ito ay “one of the masterminds behind Mark Nagoyo heist.”

Ani pa NBI, ang suspek ay sangkot umano sa phishing pages copying GCash wallet at phishing emails.

Naaresto naman ang dalawa pang suspek sa magkahiwalay na operasyon ng mga awtoridad sa Pasig City at Maynila.

Pinaniniwalaan na ang dalawang suspek ay sangkot sa hacking na nagsisilbing web developer at downloader, ayon sa NBI.

“The operation stemmed from an information provided by the informant who had transactions with the subjects,” base sa statement ng NBI.

“The informant voluntarily appeared before the NBI-CCD to give information regarding several individuals believed to be leaders, members, or affiliates of Mark Nagoyo group,” dagdag na pahayag ng ahensiya.

Nasa NBI na ang mga nakalap na mga ebidensiya laban sa apat na suspek, habang inihahanda na ang kasong isasampa sa kanila.

Sa ngayon, wala pang ibinigay na statement ang BDO tungkol dito.

Mga awtoridad, may payo sa mga nakatatanggap ng scam messages

ni Jasmin Joy Evangelista | November 24, 2021

Mayroong payo ang ilang awtoridad para hindi mabiktima ng text message mula sa job hiring o pautang na natatanggap ng mga mobile phone user kamakailan.

“Kapag nag-reply ka, intended target ka na. Pagka naka-receive ka ng ganyan, talagang dapat i-ignore lang," ani National Bureau of Investigation (NBI) anti-cybercrime chief Victor Lorenzo

"Pagka naka-receive ka na qualified ka sa trabaho na inaaplayan mo, hindi ka naman nag-aaplay ng trabaho, scam na ho 'yun. Or kapag may nag-text sa 'yo may napanalunan ka, hindi ka naman sumasali sa contest or any raffle, kaduda-duda po 'yun," dagdag niya.

Aniya pa, duda siya na nakuha ng scammers sa contact tracing forms ang numero ng mga nakatatanggap ng mga mensahe dahil walang pangalan ng receiver ang mga spam message.

Ayon kay Lorenzo, hirap ang mga scammer na kumuha ng personal na impormasyon sa taong nangalap ng datos.

Bukod dito, may data privacy act din para protektahan ang datos ng lahat.

May payo rin si PNP Anti-Cybercrime Group Director Police Brig. Gen. Robert Rodriguez at aniya, dapat maging maingat ang publiko at huwag agad magtitiwala sa natatanggap na spam messages.

"You should always be very careful sa online, sa mga text message, huwag agad magtiwala at huwag kaagad magbigay ng personal information lalo na 'yung bank accounts, mga OTP (one-time pin) numbers na binibigay ng banks sa atin, mga credit card po, kailangan huwag mag-online, kasi napakadelikado po," ani Rodriguez.

Ayon naman kay NPC Commissioner Raymund Liboro, posibleng sa organisadong global syndicate ito nangyari.

"Kung kayo ay nakatatanggap nito i-block niyo na. Huwag niyo nang tatangkilikin," ani Liboro.

Tiniyak naman ng Malacañang na ito ay iimbestigahan at inataasan ang NTC na gawin ang kanilang trabaho.