Lalaking bumili ng 8 buwan gulang na sanggol sa halagang P45,000, wanted sa NBI

ni Jasmin Joy Evangelista | March 17, 2022

Pinaghahanap na ng National Bureau of Immigration (NBI) ang lalaking nagbayad ng P45,000.00 kapalit ng isang 8-buwan na sanggol.

Ayon sa report sa 24 Oras, siniguro ng ina ng sanggol na ibabalik niya ang perang ibinayad ng lalaki kapalit ng kanyang anak.

Sinabi ni NBI Director Eric Distor sa buyer na ibalik ang bata sa lalong madaling panahon.

"Ibalik mo yan. Ibabalik rin 'yung nagastos mo. Kung hindi hahanapin ka namin," ani Distor.

“Nandito ang tunay na ina, umiiyak. Agents hanapin ninyo,” dagdag niya.

Dumulog ang ina ng sanggol sa NBI matapos niyang ibenta ang kanyang eight-month-old baby sa halagang P45,000 upang mabayaran ang kanyang mga pagkakautang sa e-sabong.

“Sana po makipag-tulungan na po siyang ibalik ang anak namin. Ibabalik naman po ang pera. Hindi ko na po gagawin ang ginawa ko po,” pahayag ng ina.

Gerald Anderson nabiktima ng ‘basag-kotse’ gang sa Quezon City

ni Jasmin Joy Evangelista | February 14, 2022

Hindi nakaligtas sa mga miyembro ng ‘basag-kotse’ gang ang sasakyan ng aktor na si Gerald Anderson matapos pagnakawan ang kanyang sports utility vehicle (SUV) sa Quezon City, kahapon.

Naganap ang krimen sa Roces Avenue, ayon sa National Bureau of Investigation(NBI).

Batay sa footage ng CCTV, makikitang may dalawang motorsiklo na dumating malapit sa SUV na naka-park sa harap ng isang establisimyento lampas alas-singko ng hapon.

Sinilip nito ang bintana ng itim na SUV saka binasag ang kaliwang bintana at kinuha ang isang bag.

Matapos nito ay sumakay na ang suspek sa motor, ngunit bumalik pa ito at kinuha pa ang isang bag sa unahang upuan ng sasakyan.

Kaagad na tumakas ang dalawa na sinusundan ng isa ring lalaking lulan ng motorsiklo.

Sa pag-iimbestiga ng National Bureau of Investigation-Special Action Unit (NBI SAU), natunton ang isa sa mga suspek.

"Sa aming pag-iimbestiga, naka-receive kami ng information na 'yung mga motor na ginamit ay na-identify sa isang Tondo-based na basag kotse group. Nagkaroon kami ng surveillance and casing operations hanggang natunton namin 'yung bahay ng isa sa mga napuntahan ng gamit ni Gerald Anderson," ani NBI SAU Executive Officer Attorney Kristine dela Cruz.

Sumuko sa NBI SAU ang suspek na si John Allen Dancel alias Elong na umaming siya ang bumasag sa salamin ng SUV at tumangay sa mga gamit ng aktor.

Narekober ng mga awtoridad sa suspek ang isang mamahaling bag, dalawang relos at mga gadgets ngunit hindi pa narerekober ang isang wallet, mga ID, at pasaporte.

Hindi umano sinadya ng mga suspek na sasakyan ni Anderson ang kanilang pupuntiryahin.

"Naghahanap po kami ng madidiskartehan ng pera. Hindi po namin sadya na makita 'yung sasakyan ni sir Gerald Anderson po. Ta's noong sinilip ko po, may laman po 'yon. Kinuha ko po," kuwento ng suspek sa isang panayam.

Ayon naman sa NBI SAU, dati nang sangkot sa robbery ang grupo ng suspek.

"Itong mga taong ito ay may mga previous cases. Nakulong na rin sila dati at may mga pending cases for the same modus, robbery," ani dela Cruz.

Nagpasalamat naman si Anderson sa mga awtoridad.

"Gusto ko pong gamitin ang pagkakataon na ito para magpasalamat po sa NBI lalo na po Special Action Unit. Sobrang salamat po sa dedication, sa perseverance at patience para ho mahanap natin po 'yung mga gumawa ng krimen na ito sa basag kotse na ginawa po sa aking sasakyan," aniya.

Nasa kustodiya na ng NBI si Dancel at nahaharap sa kaukulang kaso habang patuloy namang hinahanap ng mga awtoridad ang dalawa pang suspek.

TikTok user na nag-post umano ng death threat vs. BBM, sumuko sa mga awtoridad

ni Jasmin Joy Evangelista | February 9, 2022

Sumuko na sa mga awtoridad ang TikTok user na nag-post umano ng death threat laban kay presidential candidate Bongbong Marcos, ayon kay Marcos spokesperson Atty. Vic Rodriguez ngayong Miyerkules.

“As we speak, I was just on the phone this morning with Deputy Director [Vicente] De Guzman of the NBI, (National Bureau of Investigation) sumuko na sa kanila yung taong nagpost ng death threat na yan kahapon,” ani Rodriguez sa isang panayam.

“Ngayon aasikasuhin din namin at nang makilala yung taong yan at gaano kalalım at yung extent ng kanilang pananakot,” dagdag ni Rodriguez.

Kinumpirma naman ni NBI spokesperson Ferdinand Lavin ang pagsuko ng naturang TikTok user.

Ayon kay Lavin, sumuko ang nasabing indibidwal noong Martes pero pinayagan ding umalis dahil walang legal na basehan ang nga awtoridad para ito ay i-hold sa kanilang kustodiya. “Babalik siya mamaya”, ani Lavin.

Matatandaang inihayag ng Marcos camp na mayroon umanong banta sa buhay ni BBM sa video app na TikTok.

Sa mensahe sa naturang TikTok post, nakasaad na: “WE ARE meeting everyday to plan for BBM’s assassination. Get ready.”