Tinuluyan ng NBI sa Degamo killing.. Patung-patong na kaso vs. Teves

ni Madel Moratillo | May 18, 2023

Nahaharap na ngayon sa patung-patong na reklamo sa Department of Justice si suspended Cong. Arnolfo Teves, Jr., kaugnay ng pamamaslang kay Negros Oriental Governor Roel Degamo.

Ang reklamo ay inihain ng National Bureau of Investigation sa pangunguna mismo ni Director Medardo De Lemos.

Ayon kay Justice Secretary Jesus Crispin Remulla, bukod sa murder ay sinampahan din ng mga reklamong attempted murder at frustrated murder si Teves.

Dahil naisampa na ang reklamo laban kay Teves, puwede na siyang ipa-subpoena ng DOJ na nagsasagawa ng preliminary investigation sa mga reklamo kaugnay ng pagpatay kay Degamo.

Ayon kay Remulla, kinakailangan na personal na panumpaan ni Teves ang kanyng kontra salaysay.

Kung hindi aniya ito uuwi, isasampa sa korte ang kaso laban sa kanya.

Una rito, sinabi ni Remulla na uuwi sa bansa si Teves kahapon, pero sa panayam kay Teves sa radyo sinabi niyang fake news ito.

Hangin 'pag sininghot, sa utak ang tama.. Lobong pampa-high, nakamamatay

ni V. Reyes | May 14, 2023

Nabisto ang isang bar sa Pasay City na pinaniniwalaang nagbebenta ng lobo na naglalaman ng mapanganib na kemikal na nagdudulot ng panandaliang pagka-"high" ng makasisinghot nito.

Pinasok ng mga tauhan ng National Bureau of Investigation (NBI) ang bar makaraang matukoy sa surveillance ang paggamit ng lobo na naglalaman ng nitrous oxide.

Ayon sa NBI, ang nitrous oxide ay nagdudulot ng panandaliang saya kung lubhang delikado para sa mga sisinghot nito.

Ito na umano ngayon ang bagong modus ng mga sindikato ng ilegal na droga na pinagagamit bilang party drug.

Natagpuan sa stock room ng bar ang ilang tangke ng nitrous oxide at mga lobo na sinamsam na ng mga awtoridad.

Plano na ng NBI na irekomenda sa Dangerous Drugs Board (DDB) na ihanay bilang dangerous drug ang nitrous oxide sa ilalim ng Republic Act 9165 para mapigilan ang pagkalat ng paggamit nito.

"Ang nitrous oxide ay dapat lang sa mga medical facility lang, hindi sa ganitong club," saad ni Atty. Jerome Bomediano ng NBI.

"Kapag nasobrahan ang gamit mo nito, naaapektuhan ang utak mo rito. May tendency pa na makamatay ito," dagdag nito.

Ipaghaharap ng NBI ng kaso ang may-ari ng establisimyento, manager ng club gayundin ang mga nagbenta.

NBI sa DFA: Passport ni Teves, kanselahin

ni Mylene Alfonso | May 11, 2023

Plano ng National Bureau of Investigation (NBI) na ipakansela sa Department of Foreign Affairs (DFA) ang pasaporte ng suspendidong si Negros Oriental Representative Arnolfo “Arnie” Teves, Jr., na patuloy na nagtatago.

Sinabi ni Justice Secretary Jesus Crispin Remulla na maghahain ang NBI ng kanselasyon ng passport sa DFA, ang NBI sa sandaling maisampa na ang kasong murder kay Teves bilang mastermind sa pagkamatay ni Negros Oriental Governor Roel Degamo at siyam na iba pa.

“When the other charges are filed, we will file for the cancellation of his passport,” sabi ni Remulla.

Nabatid na si Teves ay may pasaporte na iba ang nationalities.

Posibleng sa Lunes ay maisampa na ang kaso laban kay Teves.

“We can cancel the passport. Pero may hawak na ibang passport 'yan. May hawak pa 'yan na ibang passport… may hawak pa, ibang nationality, may hawak 'yan,” dagdag pa ni Remulla.

Matatandaang noong Martes, inihayag ni Remulla na pumasok si Teves sa Timor-Leste upang humingi ng political asylum.

Nabatid na palipat-lipat umano si Teves ng lugar at posibleng pumasok din sa South Korea.