Senior Agila at mga opisyal ng SBSI, arestado

ni Angela Fernando - Trainee @News | November 7, 2023

Inaresto ng National Bureau of Investigation (NBI) ang leader ng Socorro Bayanihan Services Inc. (SBSI) na si Jey Rence Quilario a.k.a. Senior Agila, kasama ang iba pang mga opisyal ng grupo dahil sa alegasyon ng human trafficking.

Naganap ang pag-aresto sa labas ng gusali ng Senado matapos ang pagdinig ng mga Komite sa Public Order and Dangerous Drugs at Women, Children, Family Relations, at Gender Equality.

Matatandaang kinumpirma ni Senador Ronald "Bato" dela Rosa na pinadalhan ng warrant of arrest si Senior Agila ng isang regional trial court sa Dapa, Surigao del Norte, gayundin ang iba pang mga opisyal ng SBSI.

Ayon sa Department of Justice (DOJ), ang mga prosecutor ay naghain ng mga kasong kriminal laban kay Quilario at 12 iba pang kaso sa isang Regional Trial Court (RTC) sa Surigao del Norte.

Dagdag ng DOJ, ang mga kasong kinakaharap nina Agila ay trafficking in persons, facilitation of child marriage, solemnization of child marriage, at child abuse.

Ito ay matapos mabigyang-linaw sa Senate hearing nu'ng Setyembre sa pangunguna ni Senador Risa Hontiveros ang mga katiwaliang nangyayari sa loob ng sinasabing kulto ng SBSI.

Pagpatay sa brodkaster, iniimbestigahan ng NBI

ni Angela Fernando - Trainee @News | November 6, 2023

Iniimbestigahan na ng National Bureau of Investigation (NBI) ang nangyaring pamamaril sa isang radio anchor na si Juan Jumalon o mas kilala bilang Johnny Walker habang ito ay nagla-live broadcast kahapon, ayon sa Department of Justice nitong Lunes, Nobyembre 6.

Ayon sa DOJ spokesperson na si Mico Clavano, nasa proseso na sila ng paghahanap at agad namang nakuha ng NBI ang impormasyon tungkol sa kaso.

Patuloy pa ang pagtukoy kung sino ang gunman at nasa likuran ng karumal-dumal na pagpatay.

Matatandaang binaril si Jumalon sa kanyang sariling tahanan sa Brgy. Don Bernardo A. Neri nu'ng Linggo, Nobyembre 5.

Sa kabilang banda, nakikipag-ugnayan naman ang NBI sa Presidential Task Force para sa seguridad ng mga taga-media.

Raid sa bodega at shopping malls.. P206M pekeng LV, nakumpiska

ni Mylene Alfonso @News | August 13, 2023

Nasamsam ng mga ahente ng National Bureau of Investigation-Intellectual Property Rights Division, ang nasa P206 milyong halaga ng pekeng Louis Vuitton sa isinagawang pagsalakay nitong Agosto 9 sa Bulacan, Pasay at Parañaque.

Kabilang sa sinalakay ang isang bodega sa Bgy. Tabe, Guiguinto, Bulacan, apat na stalls sa LRT Shopping Mall sa Pasay City at isang stall sa Micar Shopping Center sa Parañaque City.

Ayon sa NBI, nagresulta ang operasyon sa pagkakakumpiska sa 1,588 piraso ng pekeng Louis Vuitton products.

Nabatid na nagreklamo sa NBI ang kinatawan ng LV dahil sa umano'y laganap na bentahan ng mga pekeng sa mga nabanggit na lugar.

Nagsagawa muna ng test buy ang NBI at nang makumpirma ay isinagawa ang pagsalakay.

Sasampahan ng kasong paglabag sa R.A. 8293 (Intellectual Property Code of the Philippines) ang mga may-ari ng establisimyento.