Buhay pa ang Celtics, nanalo, Melo retired, Lebron balak din

ni Anthony E. Servinio / MC @Sports | May 25, 2023

Nagawa pang buhayin ng Boston Celtics ang kanilang kontensiyon sa Eastern Conference finals nang magwagi sa 116-99 laban sa Miami Heat kahapon upang maampat ang series deficit sa 3-1.

Sumigla ang dugo ni Jayson Tatum sa Celtics sa bisa ng nagawa niyang 33 points, 11 rebounds at assists, habang ang ibang 5 players ay nagtala ng dobleng pigura sa tikas ni Joe Mazzulla.

Matapos ang 128-102 win ng Miami Heat noong Linggo, nahaharap na sana ang Celtics sa posibilidad na matigbak na rin sa 4-0 pero dahil nanaig sila kahapon ay pag-iibayuhin pa nila ang susunod na pressure sa Miami sa pagbabalik nila sa Boston.

At dahil wala pang team sa NBA history ang nagawang makabalikwas sa 3-0 na pagkaiwan at ipanalo ang best-of-seven playoff series, nagpatuloy ang Boston sa kanilang tiwala na kaya nilang makabangon at abutin ang Finals habang nakaabang na ang Denver Nuggets.

Samantala, nagbabalak-balak na rin si LeBron James na magretiro sa pagba-basketball matapos na mawalis ang matigpas ang Los Angeles Lakers sa NBA playoffs ng matikas na Denver Nuggets noong Martes.

Iniuliat ng ESPN na nag-iisip-isip na ang 38-anyos na si LBJ na lisanin na ang sport na sinarhan na ng pintuan matapos ang 20th season niya sa liga.

Sa isang hiwalay na tweet ni Chris Haynes, ang reporter ng TNT broadcaster na "under consideration" na aniya ang pagreretiro ni James.

Pero nauna rito, nagpahayag na rin si Carmelo Anthony, isa sa premier scorers sa kasaysayan ng NBA at three-time Olympic gold medalist ng opisyal na pagreretiro sa basketball.

Naging emosyonal ang anunsiyo na ito ni Anthony sa kanyang social media accounts, at aniya, "the time has come for me to say goodbye" sa laro matapos ang 19 seasons sa NBA.

"I'm excited about what the future holds for me," dagdag ng 38-anyos na si Anthony, na siyang third overall pick sa pamosong 2003 NBA Rookie Draft ng Denver Nuggets.

Hawks dinagit ang Celtics, Knicks, 'di pinaporma ang Cavs

ni Anthony E. Servinio @Sports | April 23, 2023

Umiwas sa walis ang Atlanta Hawks at binigo ang bisitang Boston Celtics, 130-122, sa NBA Playoffs kahapon sa State Farm Arena. Tinambakan naman ng New York Knicks ang paboritong Cleveland Cavaliers, 99-79, para sa 2-1 lamang sa kanilang serye.

Sa oras ng kagipitan, kumapit ang Hawks sa kanilang bituin Trae Young na nagbagsak ng 32 puntos at siyam na assist at wakasan ang dalawang sunod na panalo ng Boston sa seryeng best-of-seven. Tumulong si Dejounte Murray sa kanyang 25 puntos.

Depensa ang susi ng Knicks na nag-resulta ng 21 puntos para kay Jalen Brunson. Nag-ambag ng 19 si RJ Barrett.

Samantala, sinisante ng Toronto Raptors si Coach Nick Nurse matapos ang limang taon.

Nagtala siya ng kartadang 390-227 at sa kanyang unang sabak sa koponan at ginabayan ang Raptors patungo sa 2019 NBA World Championship.

Kahit wala na sa NBA ay tuloy pa rin ang paghawak ni Coach Nurse sa Team Canada na lalahok sa 2023 FIBA World Cup sa Agosto. Ang Canada ay maaaring mabuo ng 12 manlalaro ng NBA subalit sa Indonesia sila maglalaro ng group stage at tutuloy lang sa Pilipinas kung papasok sila sa knockout playoffs.

Warriors binawian ang Kings, Suns naka-2 na vs. Clippers

ni Anthony E. Servinio @Sports | April 22, 2023

Hindi basta isusuko ng World Champion Golden State Warriors ang kanilang korona at pinabagsak ang bisitang Sacramento Kings, 114-97, sa NBA Playoffs kahapon sa Chase Center. Wagi rin ang Phoenix Suns at tinalo ang LA Clippers, 129-124, para lumamang ng 2-1 sa kanilang seryeng best-of-seven.

Kontrolado ng Warriors ang buong laro at tuluyang humataw palayo sa 15 puntos ni Stephen Curry sa second quarter para sa 55-41 na halftime. Umabot ng 23 ang agwat sa fourth quarter, 114-91, at nakaiwas ang Golden State na malugmok sa 0-3.

Pumukol ng anim na tres si Curry patungo sa 36 puntos habang dumagdag ng 20 si Andrew Wiggins. Sisikapin ng Warriors na itabla ang serye sa Game Four sa Lunes sa parehong palaruan.

Nabawi ng bisitang Suns ang homecourt matapos mapahiya noong Game One. Binuo ni Devin Booker ang three-point play na may 42 segundo sa orasan para sa 125-116 lamang at kinailangan ng Phoenix ang apat na free throw ni Kevin Durant sa huling 11 segundo upang masigurado ang resulta.

Umusok para sa 45 puntos si Booker at sinundan ni Durant na may 28. Hindi naglaro sa Clippers si Kawhi Leonard at inaasahan na bubuti ang kanyang tuhod para sa Game 4 sa Martes.

Sa Eastern Conference, 3-0 na ang Philadelphia 76ers laban sa Brooklyn Nets matapos maitakas ang 102-97 tagumpay. Inagaw ni De’Anthony Melton ang pasa ni Royce O’Neale at naka-shoot para tuldukan ang laro na may 5.4 segundong nalalabi. Namuno sa Philadelphia si Tyrese Maxey na ipinasok ang 10 ng kanyang 25 puntos sa fourth quarter. Hahanapin na ng 76ers ang walis para sa Game Four sa Linggo.

Samantala, iginawad kay Malcolm Brogdon ng Boston Celtics ang 2023 KIA Sixth Man of the Year.