Matapos ang NBA victory, Jokic at Murray sa FIBA Cup

ni Anthony E. Servinio @Sports | June 15, 2023

Patuloy pa rin ang selebrasyon ng Denver Nuggets ng kanilang unang kampeonato sa NBA at ngayon pa lang ay laman ng usapan ang pagtatag ng bagong dinastiya sa liga.

Ang kanilang kapalaran ay nakasalalay sa tambalan nina Finals MVP Nikola Jokic at Jamal Murray at mga kakamping wala pang 30-anyos.

Sinong mag-aakala na isang hindi kilalang manlalaro galing Serbia na pinili sa ika-41 puwesto sa 2014 Rookie Draft ay tuluyang magiging isa sa pinakamahusay ng kanyang henerasyon. Hindi naglaro agad sa NBA si Jokic at nagpahinog ng isa pang taon sa Europa bago pumirma ng kontrata noong 2015.

Inspirasyon ang pagbangon ni Murray mula sa malubhang pilay sa tuhod, dahilan ng kanyang pagkawala ng mahigit 18 buwan at bumalik lang noong nakaraang Oktubre. Parang walang nangyari at nagtala siya ng 20.0 puntos bawat laro kumpara sa 21.2 bago mapilay.

Sa edad na 28, lumalabas na kuya si Jokic sa mga kakamping sina Aaron Gordon (27), Bruce Brown (26), Murray (26) at Michael Porter Jr. (24). Sa kabilang banda, ang kampeonato ay nararapat na gantimpala para sa mga beteranong sina Jeff Green (36), Ish Smith (34) at DeAndre Jordan (34) na nasa takip-silim na ng kanilang mga karera.

Nasundan ni Coach Michael Malone ang yapak ng kanyang ama Coach Brendan Malone na assistant coach sa dalawang kampeonato ng Detroit Pistons noong 1989 at 1990.

Magpapahinga saglit ang mga bituin ng NBA bago katawanin ang kanilang mga bansa sa 2023 FIBA World Cup ngayong Agosto sa Pilipinas, Japan at Indonesia. Susubukan nina Jokic ng Serbia, Murray ng Canada, Vlatko Cancar ng Slovenia, Reggie Jackson ng Italya at Jack White ng Australia na dagdagan ng isa pang tropeo ang kanilang koleksiyon.

Jokic Finals MVP, Nuggets inangkin ang 1st NBA title

ni Anthony E. Servinio @Sports | June 14, 2023

World Champion na ang itawag sa Denver Nuggets. Nakamit ng koponan ang kanilang unang kampeonato matapos manaig sa bisitang Miami Heat, 94-89, sa Game 5 ng 2023 NBA Finals kahapon sa Ball Arena.

Hindi naging madali ang daan para sa Nuggets at kinailangan nilang magising sa second half matapos umarangkada ang Miami sa halftime, 51-44, sa likod ng 18 puntos at siyam na rebound ni Bam Adebayo. Sinikap ng Denver na ihatid ang maagang knockout at itinayo ang 86-79 agwat papasok sa huling apat na minuto subalit hindi sumuko ang Heat at naagaw pa ang lamang sa dalawang free throw ni Jimmy Butler kasabay ng last 2 minutes, 89-88.

Ibinalik agad ni Bruce Brown ang lamang sa Nuggets, 90-89, na sinundan ng malaking agaw ni Kentavious Caldwell-Pope kay Butler sabay kuha ng foul at dalawang free throw na may 24 segundo sa orasan, 92-89. Nagmintis ang 3-points ni Butler at napunta ang bola kay Brown na walang kabang sinelyuhan ang kampeonato sa dalawang free throw.

Nagtapos si Nikola Jokic na may 28 puntos at 16 rebound at walang duda na siya ang napili bilang Finals MVP. Matapos ang malamyang ipinakita sa unang apat na laro, nahanap ni Michael Porter Jr. ang shooting at sumunod na may 16 puntos at 13 rebound.

Naubusan ng lakas si Adebayo sa 2nd quarter subalit namuno pa rin sa Heat na may 20 puntos at 12 rebound habang ipinasok ni Butler ang 13 ng 21 puntos sa second half. Lalong hinigpitan ng Denver ang depensa at ang 89 ang pinakamababang puntos ng Heat sa buong serye.

Nagtiis ng kabuuang 56 taon ang mga tagahanga ng Nuggets bago natamasa ang inaasam na tropeo. Itinatag ang prangkisa bilang Denver Rockets ng American Basketball Association (ABA) noong 1967, nagpalit ng pangalan Nuggets noong 1974 at lumipat sa NBA noong 1976.

Nuggets, ibiningit na sa bangin ang Heat

ni Anthony E. Servinio @Sports | June 11, 2023

Laro ngayong Martes – Ball Arena

8:30 a.m. Miami vs. Denver

Isang panalo na lang ang kailangan ng bumibisitang Denver Nuggets at inulit ang pangingibabaw sa Miami Heat, 108-95, upang itayo ang 3-1 lamang sa 2023 NBA Finals kahapon sa Kaseya Center. Maaaring wakasan ng Nuggets ang seryeng best-of-seven ngayong Martes sa harap ng kanilang mga tagahanga sa Ball Arena.

Ang shoot ni Kyle Lowry sa simula ng second quarter, 23-20, ang naging huling halakhak ng Miami at mula roon ay umusok si Aaron Gordon para sa 15 puntos at lumamang ang Denver sa halftime, 55-51. Hindi na nakatikim ng lamang ang Heat at nagbuhos ng walong sunod-sunod na puntos sina Bruce Brown at Kentavious Caldwell-Pope para sa pinakamalaking agwat, 108-91, at 1:21 sa fourth quarter.

Nagtapos si Gordon na may 27 puntos, malaking angat mula sa pinagsamang 39 sa unang tatlong laro ng serye. Hindi naka-triple double si Nikola Jokic dahil napaupo ng matagal bunga ng problema sa foul subalit matindi pa rin ang kanyang 23 puntos at 12 rebound.

Hindi lang si Gordon ang umangat ang laro at gumawa ng 21 puntos si Brown kumpara sa kabuuang 26 sa huling tatlong laro. Si Jamal Murray na ang bahala sa pasahan at nagtala ng 15 puntos at 12 assist, ang ika-apat na sunod laro na may 10 o higit siyang assist.

Sumandal pa rin ang Miami kay Jimmy Butler na may 25 at Bam Adebayo na may 20 puntos at 11 rebound. Nalimitahan muli ng depensa ang Heat at hindi sila pinaabot ng 100 puntos gaya ng mga pagkabigo nila sa Game One at Three.

Kahit mabigat ang nakasampa sa balikat ng Miami, alam nila na hindi imposible ang bumangon mula sa 1-3 at nagawa na ng prangkisa ito noong 1997 East Semis laban sa New York Knicks.