Embiid, Giannis at Jokic, mga NBA MVP finalists

ni Anthony E. Servinio - @Sports | April 19, 2022

Itinanghal na 2021-22 NBA MVP finalists ng liga sina reigning NBA Most Valuable Player Nikola Jokic ng Denver, Joel Embiid ng Philadelphia 76ers at Giannis Antetokounmpo ng reigning champion Milwaukee Bucks, kahapon.

Ang trio ng global superstar big men ang nag-angat sa kontensiyon ng kani-kanilang team at naghahabulan din para sa NBA crown ngayong playoffs.

Samantala, bumangon ang #2 Boston Celtics at inagaw ang panalo sa #7 Brooklyn Nets, 115-114, sa 2nd day ng NBA Playoffs, kahapon sa TD Garden. Pinatunayan din ng Miami Heat at Phoenix Suns bakit sila ang mga numero-unong koponan sa Eastern at Western Conference, matapos tambakan ang hiwalay na katunggali sa Game One ng seryeng best-of-seven.

Nasayang ang 39 puntos ni Kyrie Irving, kasama ang tres na nagbigay sa Nets ng 114-111 lamang at 45 segundo ang nalalabi. Sinagot ito ng shoot ni Brown upang lumapit, 113-114, at nagmintis ng tres si Kevin Durant kaya itinakbo agad ng Boston ang bola para ipanalo ang laban at makauna sa seryeng best-of-seven.

Bumanat ng walong 3-points ang reserbang si Duncan Robinson at nagtapos na may 27 puntos sa 23 minuto upang itulak ang Miami sa 115-91 tagumpay sa bisitang #8 Atlanta Hawks. Gumawa ng 13 puntos si Robinson sa 4th quarter kung saan umabot ng 32 ang lamang, 110-78, at 3:30 sa orasan.

Nalimitahan si Trae Young sa 8 puntos lang, lahat sa first half at hindi na siya naglaro sa 4th quarter. Malaking bagay din ang pagliban ni Clint Capela na napilay ang tuhod sa Play-In noong Sabado kung saan nanalo ang Hawks sa Cleveland Cavaliers, 107-101, para sa karapatang harapin ang Heat.

Hawak ng Phoenix ang lamang sa buong 48 minuto upang makamit ang 110-99 tagumpay sa bisitang #8 New Orleans Pelicans. Kumuha ng lakas ang Suns kay Chris Paul na may 30 puntos at 10 assist at Devin Booker na may 25 puntos.

Sinimulan ng #3 Milwaukee Bucks ang pormal na depensa ng korona sa 93-86 pagwagi sa bisitang #6 Chicago Bulls. Namuno sa Bucks si Giannis Antetokounmpo sa 27 puntos at 16 rebound kahit hindi siya pumuntos sa 4th quarter.

Dobleng dagok dinanas ng Rockets vs. Raptors

ni Anthony E. Servinio - @Sports | August 14, 2021

Nagwagi ang Toronto Raptors sa Houston Rockets, 92-76, sa pagpapatuloy ng 2021 NBA Summer League kahapon sa Thomas & Mack Center ng Las Vegas, Nevada. Ito ang unang talo ng Rockets at tumanggap pa ng dobleng dagok matapos mapilay sa hita ang Fil-Am gwardiya Jalen Green ng pangalawang napili sa nakaraang NBA Draft.

Nadulas at inilabas si Green na may 2:28 na nalalabi sa second quarter at lamang ang Raptors, 43-33. Bago siya napilay, nakapagtala na siya ng 13 puntos sa 12 minuto ng aksyon at humahabol ang Houston matapos lumamang ang Toronto, 41-19.

Dahil sa talo, lumabo ang pag-asa ng Rockets na maglaro para sa kampeonato ng torneo. Ang dalawang may pinakamataas na kartada matapos ang apat na laro ang maghaharap sa Agosto 18 at may limang koponan na walang pang talo.

Nanguna para sa Toronto si Ish Wainwright na may 20 points buhat sa apat na tres. Sinundan siya ni Precious Achiuwa na may 19 puntos. Sinubukan buhatin ni Josh Christopher ang Rockets sa kanyang 14 puntos habang nag-ambag ng 11 si Marcus Foster. Haharapin ng Houston ang Orlando Magic sa kanilang huling laro sa Lunes at tututukan ang paghilom agad ni Green na gumawa ng pinagsamang 48 puntos sa kanilang mga panalo sa Cleveland Cavaliers at Detroit Pistons.

Ang Boston Celtics ang unang umakyat sa 3-0 sa bisa ng kanilang 108-71 tagumpay laban sa Orlando Magic sa malapit na Cox Pavilion. Nasa 2-0 ang New Orleans Pelicans, Miami Heat, Minnesota Timberwolves, Utah Jazz at ang Sacramento Kings tampok si assistant coach Jimmy Alapag.

Samantala, tinambakan ng Seattle Storm ang Connecticut Sun, 79-57, upang maging kampeon ng pinakaunang WNBA Commissioner’s Cup sa Footprint Center na bagong pangalan ng Phoenix Suns Arena. Ang Commissioner’s Cup ay bagong pakulo ng WNBA bilang bahagi ng pagdiriwang ng ika-25 taon ng liga.

Dating Utah Jazz star na si Mark Eaton, pumanaw na sa edad na 64

ni Ronalyn Seminiano Reonico | May 30, 2021

Pumanaw na ang dating manlalaro ng Utah Jazz na si Mark Eaton sa edad na 64 noong Sabado. Pahayag ng Utah Jazz, “We are heartbroken by the passing of Utah Jazz legend Mark Eaton.

“Our thoughts are with his family as we all mourn the loss of a great man, mentor, athlete and staple of the community.” Samantala, ayon sa ulat, umalis ng bahay si Eaton noong Biyernes nang gabi upang magbisikleta sa Summit County, Utah.

Ilang sandali lamang ang nakalilipas ay may tumawag sa 911 at iniulat na nakahandusay na si Eaton sa roadway na unconscious.

Naisugod pa sa ospital si Eaton ngunit kalaunan ay binawian ng buhay. Ayon naman sa imbestigasyon ng awtoridad, walang motor vehicle na involved sa insidente.

Samantala, si Eaton ay nagtrabaho bilang auto mechanic sa Arizona noong 1977 kung saan isang basketball coach ang nakakita sa kanya at hinikayat siyang pumasok sa Cypress College.

Matapos nito ay nag-transfer siya sa University of California at Los Angeles (UCLA) kung saan hinawakan siya ng legendary coach na si John Wooden.

Nang maging miyembro ng Jazz si Eaton, nanguna siya sa blocked shots nu’ng 1984, 1985, 1987 at 1988 seasons at nakapagtala siya ng NBA record na 456 blocks sa 184-85 campaign.

Binansagan ding NBA Defensive Player of the Year si Eaton noong 1985 at 1989.