Knicks, nagwagi sa 2-OT, Suns, sinunog ang Mavs

ni Anthony E. Servinio @Sports | March 7, 2023

Dumaan sa dalawang overtime ang New York Knicks bago nila pinabagsak ang Boston Celtics, 131-129, sa tampok na laro sa NBA kahapon sa TD Garden. Nanaig din ang Phoenix Suns sa Dallas Mavericks, 130-126, sa unang pagtatagpo nina Kevin Durant at Kyrie Irving matapos nilang umalis sa Brooklyn Nets noong Pebrero.

Uminit si Immanuel Quickley para sa pito ng kanyang 38 puntos sa pangalawang overtime para itapal sa Celtics ang pangalawang sunod na talo. Sumuporta si Julius Randle sa kanyang 31 puntos at humaba sa siyam ang kanilang panalo para sa kartadang 39-27.

Naisahan ni Durant ang dating kakampi na si Irving at naka-shoot upang wasakin ang 126-126 tabla na may 12.4 segundo sa orasan, 128-126. Hindi pa siya tapos at nagdagdag ng dalawang free throw matapos ang mintis ni Luka Doncic upang masigurado ang panalo at magtapos na may 37 puntos.

Kinuha ng numero unong Milwaukee Bucks ang pagkakataon na lumayo sa Celtics at nagtrabaho para sa 117-111 panalo sa Washington Wizards. Triple double si Giannis Antetokounmpo na 23 puntos, 10 rebound at 13 assist para sa 46-18 panalo-talo kumpara sa 45-20 ng Boston.

Sumandal ang Los Angeles Lakers sa dominasyon sa ilalim ni Anthony Davis na nagsumite ng 39 puntos at makamit ang 113-105 tagumpay sa World Champion Golden State Warriors. Nasayang ang pagbalik ni Stephen Curry galing pilay matapos ang pagliban ng 11 laro at pumukol ng 27 puntos mula sa limang three-points.

Samantala, humataw para sa 31 puntos si kabayan Jalen Green at nasugpo sa ikalawang beses sa loob ng 24 oras ng Houston Rockets ang San Antonio Spurs, 142-110.

Durant, ipinanalo ang 1st game sa paglipat sa Phoenix

ni Anthony E. Servinio @Sports | March 3, 2023

Umakyat sa 16 ang magkasunod na panalo ng rumaragasang Milwaukee Bucks at idagdag na ang Orlando Magic sa mga biktima, 139-117, sa NBA kahapon sa Fiserv Forum. Patuloy din ang paghabol ng Boston Celtics upang mabawi ang liderato at nagwagi sa Cleveland Cavaliers, 117-114.

Hindi nagpreno ang Bucks at umabot ng 26 ang agwat sa 4th quarter, 134-108, papasok sa huling 4 na minuto. Huling natalo ang Bucks sa Cleveland Cavaliers, 114-102, noong Enero 21.

Nagtapos si Giannis Antetokounmpo na may 31 puntos sa 28 minuto lang. Sumunod si Brook Lopez na may 18 puntos. Kalahating laro ang hahabulin ng Celtics (45-18) sa Bucks (45-17). Nanaig si Jayson Tatum sa matinding palitan nila ng puntos ni kapwa All-Star Donovan Mitchell subalit napunta kay Tatum ang huling halakhak sa dalawang paniguradong free throw na may 17.4 segundong nalalabi, 117-110.

Nagtala si Tatum ng 41puntos at 11 rebound habang 23 puntos at 11 rebound si Al Horford. Nasayang ang 44 puntos ni Mitchell at bumaba ang Cavs sa 39-26.

Samantala, nakalaro na si Kevin Durant sa Phoenix Suns at sulit ang paghihintay ng mga tagahanga sa 105-91 na pagwagi sa Charlotte Hornets. Umapoy sa Phoenix si Devin Booker na may 37 puntos at sumuporta si Durant na may 23 puntos.

Sa ibang laro, bumida si Dennis Schroder sa kanyang 26 puntos at tagumpay ang Los Angeles Lakers sa Oklahoma City Thunder,123-117. Humataw para sa 39 puntos si Jalen Brunson at panalo sa ika-7 sunod ang New York Knicks sa kapitbahay na Brooklyn Nets, 142-118.

Tinakasan ng Chicago Bulls ang Detroit Pistons, 117-115. Panalo rin ang Philadelphia 76ers sa Miami Heat, 119-96, at New Orleans Pelicans kontra Portland Trail Blazers, 121-110.

Knicks, Heat at Hornets, umangat at nagpatumba

ni Anthony E. Servinio @Sports | March 1, 2023

Pinatumba ng New York Knicks ang Boston Celtics, 109-94, sa tampok na laro sa NBA kahapon sa Madison Square Garden. Dahil dito, anim na sunod ang tagumpay ng Knicks at may bagong numero unong koponan sa liga na Milwaukee Bucks.

Nakasabay lang ang Celtics sa unang dalawang minuto at buhat doon ay dominado ng New York ang laro hanggang umabot ng 47-27 ang lamang sa 2nd quarter. Namuno sa Knicks sina All-Star Julius Randle at reserba Immanuel Quickley na parehong nagsumite ng 23 puntos.

Kahit mas marami ang panalo ng Boston (44-18), lamang ang Bucks (43-17) sa porsiyento ng panalo. Hahanapin ng Milwaukee ang kanilang ika-15 sunod na tagumpay sa laro ngayong araw sa pagdalaw sa Brooklyn Nets.

Lalong humigpit ang karera sa Eastern Conference at hinila pababa ng Miami Heat ang Philadelphia 76ers, 101-99. Naka-shoot si Jimmy Butler na may 1:28 sa orasan at ibalik ang abante sa Heat, 100-99.

Nahirapan makapuntos ang dalawang panig hanggang napasok ni Butler ang free throw na may walong segundong nalalabi subalit minintis niya ang pangalawa at nakuha ni Joel Embiid ang bola sabay tawag ng timeout. May pagkakataon ang 76ers pero hindi pumasok ang tres ni James Harden sabay ubos ng oras.

Bumida si Butler sa kanyang 23 puntos at 11 rebound. Umangat ang Miami sa 33-29 at ika-pito sa East habang bumaba sa 39-21 at nanatiling pangatlo.

Sa isa pang laro, nagtrabaho ng todo ang mainit Charlotte Hornets upang masugpo ang Detroit Pistons, 117-106, ang kanilang ika-limang sunod. Bumuhay sa Hornets si Terry Rozier na may 22 puntos sa gitna ng maagang pagkawala kay LaMelo Ball matapos mabalian ng bukong-bukong sa third quarter.