Edwards ng T'wolves umaapoy ang mga tirada, Pacers pumosisyon

ni Anthony E. Servinio @Sports | Apr. 12, 2025

Photo: Anthony Edwards - Minnesota Timberwolves FB

Umapoy kung kailan pinaka-kailangan si Anthony Edwards upang ibigay ang 141-125 panalo sa bisitang Minnesota Timberwolves sa Memphis Grizzlies sa NBA sa FedExForum. Kasabay nito ang mga kasing halagang tagumpay ng Indiana Pacers, Milwaukee Bucks at Detroit Pistons para bumuti ang kanilang maging posisyon sa Playoffs sa susunod na linggo. 

Sinimulang kumilos ang Minnesota sa pangatlong quarter at bumuhos ng 17 walang-sagot na puntos upang mabura ang 75-69 lamang ng Memphis at bumaligtad, 86-75.  Hindi tumigil ang Timberwolves at lalong pinalaki ang agwat sa 122-99 matapos ang three-point play ni Naz Reid na nagbukas ng huling quarter. 

Nagtapos si Edwards na may 44 puntos buhat sa pitong tres. Pumasok ang Minnesota sa tabla kasama ang Grizzlies at Golden State Warriors sa 47-33 para ika-anim hanggang ika-walo sa Western Conference. 

Puntirya ng tatlong koponan na makamit ang ika-6 na puwesto para siguradong kalahok sa Playoffs at iwasan ang walang katiyakang Play-In Tournament. Ang sigurado pa lang sa West Play-In ang tapatan ng Sacramento Kings (39-41) at Dallas Mavericks (38-42) subalit tutukuyin pa kung kaninong tahanan ito gaganapin ayon sa nalalabi nilang dalawang laro. 

Pinabagsak ng Pacers ang siguradong numero uno ng East Cleveland Cavaliers, 114-112, at hindi na sila bababa ng pang-apat. Nanguna sa Pacers si Tyrese Haliburton na may 23 at 11 assist para umangat sa 49-31 at may pag-asa pa na maging pangatlo dahil tinalo ng Pistons ang New York Knicks, 115-106.

Hinigitan ni Cade Cunningham ang 35 laban sa Kings noong isang araw at gumawa ng 36 sa 34 minuto. Matibay ang Detroit (44-36) sa ika-anim pero kaya pa nila pantayan ang Milwaukee (46-34) na nanaig sa kulelat New Orleans Pelicans, 136-111. 

Double-double si Giannis Antetokounmpo na 28 at 11 rebound para humaba sa anim ang sunod nilang panalo.  

Naglalagablab ang bola nina Curry at Ja Morant

ni Anthony E. Servinio @Sports | Apr. 5, 2025

Photo: Stephen Curry at Ja Morant - FB / GSW / Memphis Grizzlies

Umapoy muli ang shooting ni Stephen Curry upang hatakin ang bisitang Golden State Warriors sa 123-116 tagumpay sa Los Angeles Lakers sa NBA sa Crypto.com Arena. Bumida din si Ja Morant sa importanteng 110-108 panalo ng Memphis Grizzlies sa Miami Heat. 

Matapos bumuhos ng 52 noong isang araw, 37 lang si Curry subalit higit sa sapat ito para makamit ang ika-45 panalo sa 76 laro at isang panalo na lang ang hahabulin sa 46-30 Lakers na bumaba sa pang-4 sa Western Conference. May pag-asa rin ang GSW na umangat hanggang pangalawa na hawak ng Houston Rockets (50-27). 

Nagsimula ang laro sa sagutan ng tres nina Brandin Podziemski at Austin Reaves at kinuha ng GSW ang unang quarter at hindi na sila lumingon, 26-22. Nalimitahan sa apat lang si Curry sa gitna ng husay ng mga kakampi subalit iyan ang hudyat para uminit at itayo ang kanilang pinakamalaking lamang, 55-39. 

Sinikap bumalik ng Lakers at naging lima na lang ang agwat sa huling 5 segundo sa 3-points ni Reaves, 116-121 at 35 segundo sa orasan. Binigyan ni Reaves si Curry ng foul at ipinasok ang dalawang paniguradong free throw. 

Galing sa timeout, ipinagpag ni Morant ang depensa ni 7’0” Kel’el Ware para sa nagpapanalong 2 puntos kasabay ng huling busina para tapusin ang 4 na sunod na talo. Bago niyan ay itinabla ni Tyler Herro ang laro sa 108-108 at may 14 segundong nalalabi. 

Gumana para sa 11 ng kanyang 30 si Morant sa huling quarter. Ito na rin ang unang panalo ni Coach Tuomas Iisalo matapos italaga kapalit ni Coach Taylor Jenkins. Bumuti rin ang pag-asa ng Minnesota Timberwolves sa 105-90 panalo sa Brooklyn Nets.  Pumutok para sa 28 si Anthony Edwards.  

Butler at Hield matatag, Bronny James, naka-17 pts.

ni Anthony E. Servinio @Sports | Mar. 22, 2025

Photo: Buddy Hield at Jimmy Butler III / IG Golden State Warriors / NBA

Nagtala ng triple-double si Jimmy Butler III at wagi ang Golden State Warriors sa Toronto Raptors, 117-114, sa NBA kahapon sa Chase Center. Binahiran ng Chicago Bulls ang gabi ng dati nilang manlalaro DeMar DeRozan at nanalo sa Sacramento Kings, 128-116. 

Lumabas at hindi na bumalik si Stephen Curry dahil nagkaroon ng pasa sa kanyang balakang at 3:24 sa pangatlong quarter. Lamang ang Raptors, 88-83, pero humabol ang GSW at naging matatag sina Butler at Buddy Hield sa mga free throw sa huling 16 segundo para mapigil ang mga banta ng Toronto.

Nagsumite si Butler ng 16 puntos, 11 rebound at 12 assist at tagumpay ang GSW ng siyam sa huling 10 laro. Nanguna si Draymond Green na may 21 habang 17 si Curry kahit maagang umupo. Nagtala ng 19 si DeRozan para maging ika-27 manlalaro na may 25,000 puntos at ginawa niya ito laban sa kanyang koponan mula 2021 hanggang 2024 kung saan ginawa niya ang 5,831 nito. Hawak ng Kings ang bentahe, 103-102, at humataw palayo ang Bulls sa huling walong minuto. 

Bumuhos ng 16 ng kanyang 35 sa huling quarter si Coby White. Tumulong sina Kevin Huerter na may 25 buhat sa limang three-points at Nikola Vucevic na may 24 at 14 rebound. 

Samantala, gumawa ng bagong personal na marka na 17 puntos si Bronny James pero hindi ito sapat at nanaig ang Milwaukee Bucks sa kanyang Los Angeles Lakers, 118-89.  Naglaro ang Lakers na wala ang  ama na si LeBron James, Rui Hachimura, Austin Reaves at Luka Doncic. 

 Bumanat ng 28 si Giannis Antetokounmpo habang 23 si Gary Trent Jr. at 20 kay dating Lakers Kyle Kuzma. Bunga ng talo ng Lakers, bumaba sila sa 43-26 at nakakasiguro na ang nagpapahingang Oklahoma City Thunder (57-12) na magtatapos na numero uno sa Western Conference.