Gin Kings itinabla sa 1-1 ang Game 2 Finals vs. TNT

ni Anthony E. Servinio @Sports | Mar. 17, 2025

Photo: Nagawang malusutan ni Ginebra San Miguel point guard Rj Abarrientos sa pag basket nito habang todo sa depensa ng katunggaling si Jp Erram ng Talk N Text Tropang Giga sa kasagsagan ng kanilang laro sa 2024-25 49th season Commissioner's cup second conference Championship game 2 best of seven series na ginanap sa Mall of Asia Arena, Pasay City. (Reymundo Nillama)

Isinalba ang Barangay Ginebra ng kanilang depensa sa huling mga segundo para magtagumpay sa TNT, 71-70, at iwasan ang higanteng pagguho sa Game Two ng 2024-25 PBA Commissioner’s Cup Finals kahapon sa MOA Arena.

Tabla na ang seryeng best-of-seven sa 1-1 matapos kunin ng Tropang Giga ang Game One noong Biyernes, 95-83.

Tumalon ang Gin Kings sa 7-0 simula at lumaki ito sa 34-19 sa buslo ni Scottie Thompson na nagbukas sa pangatlong quarter.

Unti-unting lumapit ang TNT at bumira ng apat na tres si Roger Pogoy para makatikim ng unang bentahe, 68-67, at 3:50 sa orasan. Dinagdagan ni RHJ ang agwat sa dalawang free throw, 70-67, at iyan ang hudyat para bumida muli si Justin Brownlee na gumawa ang apat na puntos para ibalik ang lamang sa Gin Kings, 71-70.

Tinawagan ang TNT ang shot clock violation subalit napigil nila ang Ginebra at nabawi ang bola pero hindi nila araw na nadulas si RHJ sa harap ng malagkit na bantay ni Stephen Holt sabay tunog ng busina. Walang duda na si Brownlee ang Best Player at naglaro siya na linalabanan ang trangkaso para magtapos na 35 puntos at 11 rebound. Sumuporta si Thompson na may 16 at Japeth Aguilar na may walo.

Walang pahinga sa 48 minuto si RHJ para magtala ng 25 at 15 rebound. Nag-ambag ang 14 si Nambatac at 11 kay Pogoy. Pinakamalupit ang depensa ng Gin Kings sa pangalawang quarter kung saan nalimitahan ang TNT sa apat na puntos lang – dalawang buslo ni Glenn Khobuntin.

Nagtapos ang unang dalawang quarter sa 32-19 pabor sa Ginebra. Gaganapin ang Game Three ngayong Miyerkules sa Philsports Arena.

Curry ika-26 na player na may pinakamaraming puntos

ni Anthony E. Servinio @Sports | Mar. 1, 2025

Photo: Stephen Curry / Golden State Warriors IG

Umapoy para sa 56 puntos mula 12 tres si Stephen Curry at wagi ang bisitang Golden State Warriors sa Orlando Magic, 121-115 sa NBA kahapon sa Kia Center. Dumaan sa peligro ang Los Angeles Lakers bago mabigo ang Minnesota Timberwolves, 111-102. 

Inabot ng Magic ang kanilang pinakamalaking lamang, 66-49, pero humabol ng tres si Curry mula 51 talampakan upang isara ang pangalawang quarter, 52-66, at senyales ng paparating. Bumira ng 9 si Curry sa simula ng pangatlong quarter upang maagaw ang bentahe, 74-73. 

Inalagaan nila ang agwat ng mabuti at ang ika-12 at huling tres ni Curry ay inakyat sa 114-109 ang talaan at tinapos ang laro mula sa free throw nina Curry, Draymond Green at Jimmy Butler III. Ang 56 ang pinakamarami ni Curry ngayong torneo at umakyat sa 24,852 puntos sa karera at lampasan si alamat Patrick Ewing (24,815) para maging ika-26 sa pinakamaraming puntos sa kasaysayan. 

Patungo na sa madaling panalo ang Lakers, 47-24 at may 16 na si LeBron James.  Humabol ang Minnesota at naging 91-95 na lang at 4 na minuto sa orasan pero bumanat ng 3-points si Luka Doncic upang makahinga ng maluwag, 98-91. 

Nagtapos na may 33 at 17 rebound si LBJ habang 22 si Austin Reaves. Double-double si Doncic na 21 at 13 rebound. 

Samantala, inihayag ni Coach Gregg Popovich na hindi na siya babalik ngayong taon sa San Antonio Spurs. Tinamaan ng stroke ang beteranong coach noong Nob. 2 at ibinigay kay assistant coach Mitch Johnson ang paggabay sa koponan habang nagpapagaling. 

Si Coach Popovich ang may pinakamaraming panalo sa kasaysayan ng NBA na 1,412 sa 2,266 laro simula 1996 at may kontrata hanggang 2028. Kasama rito ang 22-30 kartada ni Coach Johnson dahil hindi pa opisyal na nagpalit ng coach ang Spurs.

Lakers at mundo ng basketball, ginunita sina Kobe at Gianna Bryant

ni Jordan Santoyo-OJT @Sports News | Jan. 28, 2025

Photo: Kobe at Gianna Bryant - Lakers IG

Nagbigay-pugay ang mundo ng basketball sa ika-limang anibersayo ng pagpanaw ni Kobe Bryant at ng kanyang anak na si Gianna. Nasawi ang mag-ama kasama ang pito pang pasahero sa helicopter crash sa bulubundukin ng Calabasas, California noong Enero 26, 2020, habang papunta sa Mamba Academy para sa isang basketball tournament.

Sa social media post ng Lakers makikita ang litrato ni Kobe at Gianna na masayang nanonood ng laro, kalakip ang mensaheng “Always in our hearts”.

Ang simpleng pahayag na ito ay umantig sa puso ng maraming tagahanga at nagsilbing alaala sa hindi makakalimutang kontribusyon ni Kobe sa larangan ng basketball.

Sa iba’t ibang panig ng mundo patuloy ang pagpupugay habang sa Los Angeles, tampok ang estatwa ni Kobe at Gianna sa labas ng Crypto.com Ang alamat ni Kobe ay buhay na buhay din sa ibang atleta tulad ni Carmelo Anthony na nagbahagi ng litrato na kasama si Kobe na may caption na “Sometimes you never know the value of a moment until it becomes a memory”.

Ang Italian tennis star na si Jannik Sinner ay nagpakita ng parangal kay Bryant matapos manalo sa Australian open, habang suot ang sapatos ng NBA legend sa kanyang trophy ceremony. Ang alaala ni Kobe ay hindi rin nakalimutan ng dati niyang kakampi.

"Thinking of you today and EVERYDAY #GIGI #KOBE,” anang dating kakampi ni Kobe na si Byron Scott. Maging si Caron Butler na dati niyang kasamahan ay nagpahayag ng, “Forever missed… Never forgetten…”.

Sa bawat estatwa, at alaalang ibinahagi ay nanatiling buhay ang diwa ni Kobe at Gianna. Kahit limang taon na ang nakalipas ,ang alaala nila ay patuloy na nagbibigay inspirasyon at hindi malilimutang kontribusyon sa larangan ng basketball.