70M target na fully vaxxed Pinoy, nakamit ng gobyerno — NTF

ni Lolet Abania | June 19, 2022

Nakamit ng gobyerno ang kanilang target na 70 milyong Pilipino na mabakunahan kontra COVID-19, dalawang linggo bago bumaba sa puwesto si Pangulong Rodrigo Duterte, ayon sa National Task Force (NTF) Against COVID-19.

Hanggang noong Hunyo 17, nasa kabuuang 70,005,247 indibidwal ang fully vaccinated o 77.8% ng target population, base sa latest report ng National Vaccination Operations Center (NVOC).

Ayon kay NTF chief implementer Carlito Galvez Jr., ang pinakabagong record na ito ay isang patunay sa naging pangako o commitment ng gobyerno na mabakunahan ang mas marami pang mga Pilipino laban sa viral disease.

“This is our parting gift to the next administration. We hope that our new leaders will also prioritize our vaccination program and continue to build an immunity wall among our people,” ani Galvez sa isang statement.

Nasa kabuuang 153,013,072 COVID-19 vaccine doses na ang na-administer ng gobyerno, na mayroong 74,813,407 indibidwal na nakatanggap ng first dose hanggang nitong Hunyo 17.

Una nang sinabi ng pamahalaan na target nilang makapagbakuna ng tinatayang 77 milyong indibidwal, o 85% ng eligible population sa pagtatapos ng Hunyo, bago ang termino ni Pangulo Duterte na magtapos sa Hunyo 30.

Giit ni Galvez ang pagkakaroon ng mataas na vaccination rate at patuloy na pagsunod sa minimum health protocols ay maaaring makaiwas sa isa pang surge ng COVID-19 cases.

“We have had many superspreader events in the past months, including the national elections, but we still managed to keep our new COVID-19 cases low because of our high vaccination rate,” sabi ni Galvez, na siya ring vaccine czar ng bansa.

“But vaccination alone is not enough. We still have to follow our public health protocols, including frequent washing of hands and wearing of best fitted face masks,” dagdag ni Galvez.

Nai-report din ng NVOC na mayroon nang 14,704,514 indibidwal na nabigyan ng kanilang unang booster shots, habang nasa 648,555 ang nakatanggap ng ikalawang booster dose.

Para sa pediatric vaccination, may kabuuang 3,217,367 kabataan edad 5 hanggang 11 ang mga fully vaccinated na, habang may kabuuang 9,487,745 minors naman na edad 12 hanggang 17 ang natanggap na rin ang kanilang full doses.

Muling hinimok ni Galvez ang publiko na tanggapin na ang kanilang booster shots upang madagdagan ang proteksyon na naibibigay ng primary doses.

“Napakahalaga pong makakuha ng booster shot para mapalakas ang proteksyon na dulot ng bakuna. Para sa mga pwede na ring kumuha ng second booster shot, magpabakuna na agad,” saad pa ni Galvez.

Matatandaang unang inilunsad ng Pilipinas ang COVID-19 vaccination program noong Marso 2021.

Dahil sa bad weather.. Vaxx drive, isususpinde — NTF

ni Lolet Abania | December 11, 2021

Pansamantalang maantala ang vaccination drive ng pamahalaan sa mga lugar na apektado ng masamang panahon, ayon sa National Task Force (NTF) Against COVID-19 official.

Sa isang radio interview kay NTF adviser Ted Herbosa ngayong Sabado, sinabi nitong mino-monitor nila ang weather disturbance na tatama sa Mindanao at makakaapekto sa ilang lugar sa bansa dahil sa gaganaping second round ng mass vaccination drive mula Disyembre 15 hanggang 17.

Alas-3:00 ng madaling-araw ngayong Sabado, namataan ang low pressure area (LPA) na matatagpuan sa layong 2,340 kilometro silangan ng Mindanao, kung saan nasa labas pa ng Philippine Area of Responsibility (PAR), batay sa ulat ng PAGASA.

Ayon sa PAGASA, ang LPA ay maaaring ma-develop na maging isang tropical cyclone sa loob ng 48 oras at posibleng pumasok sa PAR sa Martes. Bibigyan ito ng pangalang “Odette” kapag pumasok na sa bansa.

“In fact, may binabantayan kaming bagyo na baka pumasok sa PAR na sasabay doon sa ‘Bayanihan, Bakunahan’ so siyempre inaalagaan namin ‘yung supply ng mga bakuna at kung mawalan ng kuryente roon eh maging problema pa ‘yung cold storage,” paliwanag ni Herbosa.

“Baka i-hold namin para magprepara muna tayo para maprotektahan ‘yung mga bakuna.

Pangalawa, siyempre ‘yung safety ng mga gustong magpabakuna, kung baha ‘yan or malakas ang ulan eh, siyempre dapat ihinto ‘yung pagpapabakuna sa mga lugar na tatamaan at dadaanan nu’ng bagyo,” dagdag ni Herbosa.

Sinabi ni Herbosa na importante na ma-fully vaccinate ang pitong milyong indibidwal sa ikalawang round ng pagbabakuna kontra-COVID-19 sa gitna ng banta ng bagong Omicron COVID-19 variant.

Kaugnay nito, nakapagtala ang bansa ng 10.2 milyong indibidwal sa unang round ng vaccination drive mula Nobyembre 29 hanggang Disyembre 3.

Pinakamarami mula nang mag-umpisa… 375K doses ng bakuna, naiturok sa isang araw lang

ni Lolet Abania | July 14, 2021

Nakapagtala ng pinakamataas na daily output ang bansa sa pag-administer ng mahigit sa 375,000 doses ng COVID-19 vaccines kahapon.

Sa isang tweet, ayon sa National Task Force Against COVID-19, umabot sa 375,059 doses ng COVID-19 vaccines ang naiturok sa mga mamamayan nitong July 13. “We are starting to get closer to our goal of 500,000 jabs a day and if we are able to do that, we will be able to reach our 70% target population. That’s around 70 million Filipinos to have their first dose in about 130 days,” ani Department of Health Secretary Francisco Duque III sa isang pre-SONA forum.

“Hopefully, another two, three months to complete the second dose for the same population of 70 million Filipinos and by then, hopefully, we shall have reached our herd immunity,” dagdag ng kalihim.

Sinabi pa ni Duque na sa ngayon, nasa kabuuang 14 milyong doses ng bakuna ang na-administer ng pamahalaan. Tinatayang 10 milyon indibidwal ang nakatanggap ng unang dose ng COVID-19 vaccine habang nasa 4 milyon ang nakakumpleto ng dalawang shots.

Samantala, dumating ang dagdag na 1 milyong doses ng Sinovac COVID-19 vaccine na gawa ng Chinese firm ngayong umaga. Ang iba pang vaccine brands na inaasahang dumating ngayong buwan ay Sputnik V, AstraZeneca, Pfizer, Moderna, at Johnson & Johnson.