Pagbabakuna sa edad 5-11 kontra-COVID-19, start na sa Pebrero 1 – NTF

ni Lolet Abania | January 25, 2022

Nakatakdang simulan ang pagbabakuna kontra-COVID-19 sa mga kabataan na nasa edad 5 hanggang 11 sa Pebrero 1, na inisyal na isasagawa sa National Capital Region (NCR), ayon sa National Task Force Against COVID-19 (NTF).

Sa Laging Handa public briefing ngayong Martes, sinabi ni NTF medical adviser Dr. Ted Herbosa na ang unang batch ng Pfizer COVID-19 vaccines na may formulation para sa naturang age group ay darating sa bansa sa Enero 31.

“Mag-uumpisa tayo sa NCR starting February 1, ang unang linggo ng February 1.

Darating dito ng January 31 ang unang delivery ng 50 million doses na ating in-order,” sabi ni Herbosa.

Ayon kay Herbosa, tinatayang 780,000 doses ng COVID-19 vaccines na nakalaan sa mga kabataan ay inaasahang darating sa Enero 31, habang kasunod nito ang marami pang deliveries sa mga susunod na araw.

Palalawigin naman ng gobyerno aniya, sa buong bansa ang pagbabakuna ng mga edad 5 hanggang 11 sa kalagitnaan ng Pebrero.

Sinabi pa ni Herbosa na nasa tinatayang 7 milyong kabataan, ang bilang ng naturang age group.

Sunog sa health office ng Zamboanga del Sur... 148,678 doses ng COVID-19 vaccines, natupok — NTF

ni Lolet Abania | November 2, 2021

Nasa tinatayang 148,678 doses ng COVID-19 vaccines ang nawasak matapos ang naganap na sunog sa Provincial Health Office (PHO) ng Zamboanga del Sur nitong Linggo, ayon sa National Task Force (NTF) Against COVID-19 ngayong Martes.

Sa isang joint statement ng kanilang top officials, sinabi ng NTF na tinupok ng apoy ang 9,176 doses ng AstraZeneca; 14,400 ng Moderna; 88,938 ng Pfizer-BioNTech; at 36,164 doses ng Sinovac vaccines.

Gayundin, ilang routine immunization vaccines na alokasyon ng probinsiya ang na-damage rin.

Ayon sa NTF, ang mga AstraZeneca vaccines ay alokasyon bilang second doses at nakaiskedyul na ibakuna sa mga indibidwal sa Nobyembre 3.

Sinabi rin ng ahensiya na ang Moderna vaccines ay nakatakda namang ibakuna sa mga kabataan na nasa edad 12 hanggang 17, na nakaiskedyul din sa Nobyembre 3.

Ang quarter ng Pfizer vaccines naman ay alokasyon sa Pagadian City at pansamantalang na-stored sa naturang provincial cold storage dahil nasa full capacity na ang ultra-low freezer (ULF) ng siyudad.

Binanggit din ng NTF na ang kalahati ng Pfizer doses ay para sa vaccination rollout ng probinsiya habang ang isa pang quarter ng suplay ng nasabing vaccine ay nakalaan sa ibang local government units (LGUs).

Ayon sa NTF, ang Sinovac vaccines naman ay agad na idineliber sa nabanggit na cold storage dahil sa ilang LGUs ay tumangging tanggapin ang nasabing brand sanhi ng pagpili ng mga recipients ng bakuna.

Nagsisilbi ang three-storey building bilang cold chain storage facility para sa COVID-19 vaccines sa 26 munisipalidad at isang component city sa Zamboanga del Sur.

Sa kabila ng pagkasira ng mga COVID-19 vaccines, tiniyak naman ng NTF na mapapalitan nila ito ng bagong alokasyon bakuna.

Agad na naglabas ng direktiba si NTF vice chairman at Department of Interior and Local Government (DILG) Secretary Eduardo Año sa DILG at Department of Health (DOH) na alamin ang naganap na insidente.

Iniutos na rin ng DILG sa Philippine National Police (PNP) at Bureau of Fire Protection (BFP) at kanilang regional offices na magsagawa ng mabilisang imbestigasyon sa nangyari.

Ayon pa sa NTF, nakatakda na ring mag-isyu ng isang show cause order sa provincial government ng Zamboanga del Sur dahil sa pagkabigo nitong mai-deliver ang mga vaccines tatlong araw matapos matanggap ang receipt ng supplies.

“May this unfortunate incident be a reminder to all local government units to ensure the safety and security of these life-saving vaccines,” sabi ng NTF.

“To avoid similar incidents happening in the future, the DILG and DOH are reiterating to all LGUs at the municipal, city, and provincial levels to ensure that safety officers are reporting 24/7 in all COVID-19 cold chain facilities and warehouses,” dagdag ng ahensiya.

Kahit umuulan, tuloy… Higit 5.5 M Pinoy, fully vaccinated na vs. COVID-19

ni Ronalyn Seminiano Reonico | July 24, 2021

May 5,560,029 Pinoy na ang fully vaccinated laban sa COVID-19, ayon sa National Task Force (NTF) Against COVID-19, habang umabot naman sa 10,866,238 ang nakatanggap na ng unang dose ng COVID-19 vaccine.

Pahayag ni NTF Against Covid-19 Chief Implementer and Vaccine Czar Secretary Carlito G. Galvez, Jr., “We are now past the crawl and walk stages, as we gradually run towards our goal of inoculating half a million Filipinos per day this quarter. This is a preview of better things to come in the remaining six months of 2021.

“Despite the inclement weather, our implementing units have remained resilient and are committed to inoculating more Filipinos. We are grateful to all frontliners in the government and the private sector who continue to serve the public despite the many challenges we continue to face.”

Samantala, patuloy na nananawagan si Galvez sa publiko na sumunod sa mga ipinatutupad na health protocols dahil sa banta ng COVID-19 Delta variant.

Saad ni Galvez, “The best way to stop and limit the spread of the Delta variant, along with getting the vaccine, is diligently complying with minimum public health standards – mask, hugas, iwas. If possible, put on double masks. We need to be more conscious because the virus continues to mutate. Kailangang mas paigtingin pa natin ang ating pagprotekta sa ating mga sarili.”