Dahil sa bad weather.. Vaxx drive, isususpinde — NTF

ni Lolet Abania | December 11, 2021

Pansamantalang maantala ang vaccination drive ng pamahalaan sa mga lugar na apektado ng masamang panahon, ayon sa National Task Force (NTF) Against COVID-19 official.

Sa isang radio interview kay NTF adviser Ted Herbosa ngayong Sabado, sinabi nitong mino-monitor nila ang weather disturbance na tatama sa Mindanao at makakaapekto sa ilang lugar sa bansa dahil sa gaganaping second round ng mass vaccination drive mula Disyembre 15 hanggang 17.

Alas-3:00 ng madaling-araw ngayong Sabado, namataan ang low pressure area (LPA) na matatagpuan sa layong 2,340 kilometro silangan ng Mindanao, kung saan nasa labas pa ng Philippine Area of Responsibility (PAR), batay sa ulat ng PAGASA.

Ayon sa PAGASA, ang LPA ay maaaring ma-develop na maging isang tropical cyclone sa loob ng 48 oras at posibleng pumasok sa PAR sa Martes. Bibigyan ito ng pangalang “Odette” kapag pumasok na sa bansa.

“In fact, may binabantayan kaming bagyo na baka pumasok sa PAR na sasabay doon sa ‘Bayanihan, Bakunahan’ so siyempre inaalagaan namin ‘yung supply ng mga bakuna at kung mawalan ng kuryente roon eh maging problema pa ‘yung cold storage,” paliwanag ni Herbosa.

“Baka i-hold namin para magprepara muna tayo para maprotektahan ‘yung mga bakuna.

Pangalawa, siyempre ‘yung safety ng mga gustong magpabakuna, kung baha ‘yan or malakas ang ulan eh, siyempre dapat ihinto ‘yung pagpapabakuna sa mga lugar na tatamaan at dadaanan nu’ng bagyo,” dagdag ni Herbosa.

Sinabi ni Herbosa na importante na ma-fully vaccinate ang pitong milyong indibidwal sa ikalawang round ng pagbabakuna kontra-COVID-19 sa gitna ng banta ng bagong Omicron COVID-19 variant.

Kaugnay nito, nakapagtala ang bansa ng 10.2 milyong indibidwal sa unang round ng vaccination drive mula Nobyembre 29 hanggang Disyembre 3.

LGUs na nanguna sa 3-araw na vaxx drive, ginawaran— NTF

ni Lolet Abania | December 9, 2021

Ginawaran ng pamahalaan ang lalawigan ng Laguna na nakapagtala ng may pinakamataas na bilang na na-administer na doses ng COVID-19 vaccine sa isinagawang three-day vaccination drive sa buong bansa ngayong Huwebes.

Ayon sa National Task Force Against COVID-19, ang Laguna ay nakapagbakuna kontra-COVID-19 ng kabuuang 271,989 doses mula Nobyembre 29 hanggang Disyembre 1.

Habang ang Cebu City ang naiulat na lungsod na may pinakamataas na bilang na na-administer na bakuna na 103,828 doses.

Kabilang naman sa top three na munisipalidad ay Rodriguez, Tanza, at Arayat na nakapagtala ng 39,383; 25,277; at 20,955 doses na na-administer, batay sa pagkakasunod.

Ang Bangsamoro Autonomous Region in Muslim Mindanao (BARMM) ay ginawaran naman bilang rehiyon na highest improvement sa kanilang average jab rate na 785 doses.

Sa pahayag ni vaccine czar Carlito Galvez, Jr. sa Bayanihan, Bakunahan awarding event, sinabi nitong ang BARMM ay nagawang madagdagan ang kanilang output ng 10 beses.

“Actually, kausap ko po ang executive secretary ng BARMM kahapon at kinongratulate ko po siya dahil first time po na nangyari na ang kanilang vaccination ay lumagpas ng 100,000 a day,” sabi ni Galvez.

“Kaya tuwang-tuwa po siya… pagpapatuloy po nila ang kanilang vaccination. Pero napakahirap, sadyang hirap kasi mga tinatawag nating mga geographically challenged ang mga areas nila,” wika pa ni Galvez.

Samantala, ang Tawi-Tawi, ang lalawigan na itinuturing na highest improvement na may 2,668 jabs habang ang General Santos City ay ginawaran ng most improved city na may 673 jabs.

Bawat local o provincial government ay binigyan ng award ng P25,000 halaga ng SM gift certificates.

Gayunman, kahit hindi nakatanggap ng reward, ang Calabarzon ay kinikilala bilang rehiyon na may pinakamataas na bilang ng doses na na-administer na 1,147,392.

Sa 2 araw na national vaxx drive... 5 M Pinoy nabakunahan kontra-COVID-19

ni Lolet Abania | December 1, 2021

Umabot sa 2.3 milyon indibidwal ang nabakunahan kontra-COVID-19 nitong Martes, ang ikalawang araw ng three-day national vaccination drive ng gobyerno, ayon kay testing czar Vince Dizon.

“For the numbers for November 30, yesterday, we’re roughly at 2.3 million but we expect this to go up even more in the coming hours as we get more reports especially from rural areas,” ani Dizon sa isang interview ngayong Miyerkules.

Ayon kay Dizon, kasunod ito ng 2.708 milyon doses na kanilang na-administer na nai-record sa unang araw ng vaccination drive nitong Lunes, Nobyembre 29.

Kaya nakapagbakuna na ang bansa ng tinatayang 5 milyon indibidwal sa unang dalawang araw ng “Bayanihan, Bakunahan” ng pamahalaan.

“Vaccinating 2.7 million doses in a day is not a joke. It's very, very difficult, that's why not a lot of countries can do it. Based on the number we’re seeing, I think for a single-day vaccination rate, the Philippines is probably in the top five in the world,” sabi ni Dizon.

Ayon naman kay Department of Health (DOH) Undersecretary Myrna Cabotaje, ang mga bansa na may mataas na daily vaccination output ay China na may 22 milyon doses; India na may 10 milyon; at ang United States na may 3.48 milyon.

“Everybody said that vaccine hesitancy is so high, that people don’t want to get jabbed, but I think our bayanihan spirit has really shown us that if we work together especially under the leadership of President Duterte, that him egging on everyone to get vaccinated has proven that we can get things done,” pahayag ni Dizon.

Matatandaang binawasan ng task force ang kanilang target vaccination output para sa three-day vaccination drive na mula sa 15 milyon ay ginawang 9 milyon na lamang dahil sa kakulangan ng mga ancillary supplies, partikular na ang syringes o hiringgilya.

“While it’s true that we haven’t reached the 3 million target, like you said 2.7 million on the first day, is not bad and it just really motivates us more to get things working and just working together shows that we can get this done,” paliwanag pa ni Dizon.

Samantala, magkakaroon ng isa pang national vaccination drive sa Disyembre 15 hanggang 17 para makatulong na makamit ang target ng gobyerno na 54 milyong Pilipino na maging fully vaccinated hanggang sa katapusan ng taon.