Bahay-bahay na pagbabakuna sa senior citizens

ni Mary Gutierrez Almirañez | April 23, 2021

Isinagawa ang house-to-house na pagbabakuna kontra-COVID-19 sa mga senior citizens na nahihirapang pumunta sa vaccination site sa ilang lungsod sa Metro Manila at Cavite.

Ayon sa panayam kay Dr. Nina Castillo-Carandang ng National Immunization Technical Advisory Group (NITAG) ngayong umaga, paraan aniya iyon upang hindi ma-expose sa virus ang mga vulnerable na senior citizens.

Dagdag pa niya, "Itong ginagawang pagbabahay-bahay ay para hindi mawalan ng pagkakataon ang mga mamamayang Pilipino na hindi na po kayang magbiyahe, hindi na kayang lumabas ng bahay. Kailangang gawin ito ng higit pang pag-iingat. Kailangan 'yung mga taong dadalaw kay lolo, kay lola, kay tito at kay tita sa bahay ay nasa maayos din na kalagayan.”

Base sa huling tala ng Department of Health (DOH), tinatayang 1,612,420 indibidwal na ang mga nabakunahan kontra-COVID-19, kung saan 214,792 ang mga nakakumpleto sa dalawang dose at 1,397,628 naman para sa unang dose.

Sa kabuuang bilang ay 3,525,600 doses ng bakuna na ang dumating sa bansa, kabilang ang 3 milyong doses ng Sinovac at 525,600 doses mula sa AstraZeneca.

Mayor at governor, uunahin na ring bakunahan kontra COVID-19

ni Mary Gutierrez Almirañez | April 4, 2021

Puwede nang bakunahan kontra COVID-19 ang bawat mayor at governor mula sa mga lugar na itinuturing na high risk sa virus, batay sa kumpirmasyon ni National Task Force (NTF) Deputy Chief Implementer Vince Dizon ngayong Linggo, Abril 4.

Aniya, inaprubahan ng Inter-Agency Task Force (IATF) for the Management of Emerging Infectious Diseases ang hiling ng League of Provinces of the Philippines para maisama sa A1 priority list ang mga governor at mayor.

Dagdag pa niya, “This request was endorsed by the President to the IATF and the IATF yesterday decided to initially allow Mayors and Governors in high risk and critical areas.”

Paliwanag pa niya, mahalaga umanong mabakunahan din ang local officials sapagkat sila aniya ang commander sa mga frontliner.

Sa huling tala ay mahigit 400 na governor at mayor mula sa Metro Manila at mga karatig-lalawigan nito ang nasa high risk at critical na kondisyon. Kaugnay nito, makikipag-usap ang NTF sa National Immunization Technical Advisory Group (NITAG) sa mga susunod na araw upang planuhin ang sabay-sabay na pagbabakuna sa A1 hanggang A4 priority groups.

“Dapat wala pong bakuna na natetengga o naiiwan lang sa ating mga stock rooms. Kailangan talaga, we vaccinate as many Filipinos as possible. Kailangan sabay-sabay, simultaneous. Hindi na kailangang maghintayan para ang mga bakuna ay hindi nasasayang,” sabi pa ni Dizon.