Kapalpakan sa National ID, huwag palampasin

by Info @Editorial | September 2, 2024

Sa kabila ng samu’t saring kontrobersiya at ingay sa pulitika, hindi dapat makalusot ang iba pang usapin sa bansa na mahalaga at ginastusan ng pera ng bayan.  

Tulad ng isyu sa National ID, kung saan tinapos na ng Bangko Sentral ng Pilipinas (BSP) ang kontrata nito sa kumpanyang kinuha para sa pag-iimprenta, sa ilalim ng programang Philippine Identification System (PhilSys). 

Sa pahayag ng isang opisyal ng BSP, ito ay dahil umano sa kapalpakan ng kumpanya na tugunan ang bilang ng mga ID na dapat nitong iimprenta sa nakaraang apat na taon.

Ayon sa ulat ng BSP, nasa 51.6 milyong ID pa lamang ang naimprenta at naipamahagi noong katapusan ng Mayo. Kulang ito ng 86.7 milyong ID, alinsunod sa bilang ng mga Pilipinong nagparehistro sa PhilSys, ayon sa Philippine Statistics Authority (PSA). 

Ang PSA ang inatasang maglikom ng datos ng mga Pilipino habang ang BSP ang pumasok sa kontrata para sa pag-imprenta ng mga ID.

Hanggang ngayon ay kabi-kabilang reklamo pa rin ang lumalabas dahil sa tagal at bagal ng pamamahagi ng mga ID. Kahit pa naglabas ng digital copy ng ID, palpak pa rin umano dahil sa mali-maling impormasyon. 

Ang masaklap, hindi pa tinatanggap bilang valid ID sa maraming establisimyento tulad ng mga bangko. 

Sadyang masalimuot at hindi sapat na kanselahin lang ang kontrata sa kumpanya, sa dami ng sablay at hindi pagtupad sa kasunduan, kailangan itong managot. Marapat lang na patawan ng parusa.

Kailangan ding imbestigahan ang naturang usapin kasabay ang pagkilos para maipagpatuloy ang paggawa ng mga ID at tiyaking naipapatupad ang silbi nito sa mamamayan.

Para tipid — Bato.. National ID, i-save na lang sa phone

ni Mylene Alfonso @News | September 26, 2023

Inirekomenda ni Sen. Ronald “Bato” Dela Rosa ang pagpapatigil sa pag-imprenta ng national ID o Philippine Identification (PhilID) card.

Sa pagdinig ng budget ng National Economic and Development Authority, iminungkahi ni Finance Committee Vice Chairman Dela Rosa na ihinto na ng Philippine Statistics Authority ang pag-imprenta upang makatipid.

"Siguro puwede natin i-stop ‘yun then we’ll go digital. Maka-save pa ng pera ang gobyerno. Lahat naman ng Pilipino, may cellphone. Maka-save pa tayo ng pera kung hindi natin i-print ang remaining," diin ni Dela Rosa.

Bagama't tinitignan din ng PSA ang paglilipat sa mga digital ID, ipinunto ni National Statistician Undersecretary Claire Dennis Mapa na mas gusto pa rin ng mga Pilipino na magkaroon ng nahahawakang ID card.

Sa panukalang 2024 National Expenditure Program ng NEDA, P8.94 bilyon o 73% ng budget ng NEDA ang inilalaan sa PSA bilang attached agency nito. Nasa P1.61 bilyon ang nakalaan sa Philippine Identification System dahil layunin ng PSA na mairehistro sa kanilang system ang kabuuang 101M Pilipino sa susunod na taon.

Nabatid na target ng PSA na makapag-imprenta ng 92 milyong PhilID sa Setyembre 2024.

P-BBM, walang ultimatum sa National ID

ni Mylene Alfonso @News | September 14, 2023

Tila naubos na ang pasensya ni Pangulong Ferdinand Marcos, Jr., dahil sa pagkaantala sa pag-iisyu ng mga national ID.

"So, a lot of delays have already happened and there are many of our countrymen who have been complaining that up to this date, they have not yet received their national ID. And so, the President has expressed his impatience because a lot of things needed to be done and it’s all dependent on the deployment of a national ID," pahayag ni Information and Communications Technology Secretary Ivan John Uy sa press briefing sa Palasyo.

Gayunman, inihayag ni Uy na hindi nagbigay ng anumang ultimatum ang Pangulo sa kanila hinggil sa pagkumpleto ng pamamahagi ng mga national IDs.

"Well, wala naman pong ultimatum. Kami na po ang nagbigay ng basically ng goal namin.

Mga I think, we were only be able to be given access to the database just a month or two months ago. So, medyo ambitious po ang ating goal na last July lang tayo nabigyan ng access, eh we're hoping that by year end makaka-deploy tayo [ng mga national IDs]," sabi ni Uy.

"Kung ang PSA [Philippine Statistics Authority] po, inabot ng apat na taon, eh hindi pa ho nila matapos-tapos 'yung deployment. We're very optimistic, I believe in the capabilities of our people in order to that," banggit pa ng kalihim.

Tiwala naman si Uy na bago matapos ang kasalukuyang taon ay makapagpapalabas sila ng malaking bilang ng digital IDs.

Matatandaang Agosto nang ianunsyo ni Socioeconomic Planning Secretary Arsenio Balisacan na ang DICT ang mamamahala sa paggawa ng mga e-PhilID.