Para sa mga residente ng pabahay.. PAO at NHA, may libreng legal assistance

ni BRT | June 26, 2023

Nagkaroon ng kasunduan ang National Housing Authority (NHA) at Public Attorney’s Office (PAO) para makapaghatid ng libreng legal assistance sa mga benepisyaryo ng pabahay ng gobyerno.

Mismong sina NHA General Manager Joeben Tai at PAO Chief Public Attorney Dr. Persida V. Rueda-Acosta ang nagkasundo sa naturang programa.

Nagsagawa ng People’s Caravan ang NHA, kung saan ang PAO ay naimbitahan na makapagbigay ng libreng konsultasyon sa usaping batas.

Ang People’s Caravan ay ang pinakabagong inisyatibo ni Tai upang tuluyang mapalapit sa mga benepisyaryo ang mga serbisyo ng gobyerno.

Isasakatuparan ang People’s Caravan sa pamamagitan ng pakikipagtulungan ng iba’t ibang tanggapan ng gobyerno at nakatakdang ganapin sa mga proyektong pabahay ng NHA sa buong bansa.

Ito ay kabilang sa 10-Point Agenda for Improvement na inilatag ng pamunuan ni Tai at NHA Assistant General Manager Alvin Feliciano.

Layunin ng naturang proyekto na matugunan ang pangangailangan ng mga benepisyaryo ng ahensya tungo sa isang progresibong komunidad.

Samantala, tiniyak naman ni Atty. Acosta ang suporta ng PAO sa NHA at siniguro na sila ay dadalaw din sa iba’t ibang proyektong pabahay ng NHA sa bansa para sa mas malawak na pagbibigay ng libreng konsultasyon sa mga residente.

4K Pinoy, nabenepisyuhan sa ‘Balik Probinsiya’ program — NHA

ni Lolet Abania | June 14, 2022

Mahigit sa 4,000 Pilipino na ang nakinabang mula sa “Balik Probinsya, Bagong Pag-asa” (BP2) na programa ng gobyerno, ayon sa National Housing Authority (NHA) ngayong Martes.

“Sa ngayon sa kabuuan may 4,214 principals. Kung isasama natin ang miyembro ng kani-kanilang pamilya, we have a total of 15,215 individuals,” sabi ni NHA B2 head Joy Bala sa Laging Handa public briefing.

“Ito po ay kombinasyon ng regular na pagpapauwi ng NHA at pagpapauwi ng DSWD [Department of Social Welfare and Development],” saad ni Bala. Matatandaan na sinimulan ng administrayong Duterte ang BP2 program sa gitna ng COVID-19 pandemic upang makatulong sa mga naninirahan sa Metro Manila na makabalik na sa kanilang mga pinagmulang lalawigan.

Ayon kay Bala, nasasakop ng serbisyo nito ang mga benepisyaryo mula sa halos lahat ng probinsiya sa bansa na ilan sa mga nagnais na makauwi ay sa La Union, Ilocos Sur, Isabela, Masbate, Sorsogon, Albay, at Camarines Norte. Kabilang sa iba pang lugar ay sa lahat ng lalawigan ng Region 5, Sultan Kudarat, Cotabato, Lanao del Norte, Zamboanga del Norte, at Agusan.

Tiniyak naman ng NHA sa publiko na lahat ng nag-avail ng programa ay makatatanggap ng assistance mula sa mga government agencies at sa kani-kanilang local government units (LGUs).

“As soon as they arrive in their destination mayroong ibinibigay ang mga probinsya,” pahayag ni Bala. “Aside from that, the member-agencies of the BP2 program… may ibinibigay pa rin po. Ang kailangan lang ay certificate of eligibility na binibigay ng NHA bilang patunay na beneficiary ng BP2 program,” paliwanag ni Bala.

Hindi naman masabi ng opisyal ang eksaktong figures kung ilang housing projects ang nai-turned over sa mga benepisyaryo. Gayunman, ayon kay Bala, ang NHA ay kasalukuyang nagko-construct ng dalawa pang major housing projects sa Zamboanga del Norte at Lanao.

“Patuloy ang pagpapagawa ng mga bahay doon at patuloy ang qualification process ng mga BP2 beneficiaries na nagnanais na mag-avail ng housing benefits mula sa NHA,” sabi pa ni Bala.

Nag-abiso rin si Bala sa mga interesado na mag-avail ng housing program na bisitahin lamang ang kanilang website. Maaari rin silang bumisita sa NHA main office sa Quezon City o mag-inquire sa pinakamalapit na opisina ng DSWD.

Para sa OFWs at gov't employees... Housing program, alok ng NHA

ni Zel Fernandez | May 14, 2022

Hinikayat ng National Housing Authority (NHA)-Region 11 na mag-apply sa Government Employees Housing Program ang mga overseas Filipino workers (OFWs) at government employees sa bansa.

Makapagbigay ng disente at murang bahay, ito ang layunin ng nasabing programa para sa mga uniformed personnel ng gobyerno na kinabibilangan ng Armed Forces of the Philippines (AFP), Philippine National Police (PNP), Bureau of Jail Management and Penology (BJMP), Bureau of Fire Protection (BFP), Bureau of Corrections (BOC), at iba pang mga empleyado ng pamahalaan.

Ayon sa pahayag ng NHA, kabilang umano sa mga bahay na iniaalok sa naturang housing program ay mga two-storey duplex units na mayroon anilang sukat na 60 square meters ang floor area at 80 square meters ang lot size.

Pagbabahagi pa ng asosasyon, para sa mga kuwalipikadong aplikante ng kanilang programa ay nasa ₱5,000 ang pinakamababang monthly amortization at wala na umanong down payment.

Habang nasa ₱20,000 naman ang reservation fee kung saan ang unit ay handa na rin anilang tirahan.

Samantala, maaaring bisitahin ang NHA Facebook page upang malaman ang iba pang mga detalye ukol sa Government Employees Housing Program.