Dahil sa outage ng power plants.. Luzon grid, inilagay sa yellow alert — NGCP

ni Lolet Abania | July 5, 2022

Isinailalim ng National Grid Corporation of the Philippines (NGCP) ang Luzon power grid sa yellow alert ngayong Martes ng umaga at hapon dahil maraming power plants nito ang nag-offline.

Sa isang advisory, sinabi ng NGCP na inilagay ang yellow alert sa island mula alas-10:00 ng umaga hanggang alas-11:00 ng umaga at mula ala-1:00 ng hapon hanggang alas-4:00 ng hapon.

Inilalagay sa yellow alert kapag ang grid ay may manipis na power reserves, subalit hindi ibig sabihin nito na magkakaroon ng mga brownouts.

Ayon sa NGCP, nasa 1,439 megawatts (MW) ang nabawas o na-slashed mula sa Luzon grid dahil sa forced outage at nag- derate naman ang mga sumusunod na power plants:

• GNPD 1 – 668MW

• GMEC 2 – 316MW

• Calaca 2 – 240MW

• SLPGC 3 & 4 – 50M

• Masinloc 1 (derated by 165MW)

Sinabi naman ng NGCP na ang grid ay mayroong net operating margin ng 236MW, na may suplay ng 11,847MW at tinatayang operating requirement ng 11,177MW.

Brownout sa MM at iba pang lugar, start na

ni Lolet Abania | June 2, 2021

Nakatakdang magpatupad ang National Grid Corp. of the Philippines (NGCP) ngayong Miyerkules, Hunyo 2 ng rotational brownouts sa ilang bahagi ng Luzon at Metro Manila dahil sa patuloy na kakulangan ng power supply sa bansa.

Sa isang advisory ng NGCP, posibleng ipatupad nila ang manual load dropping (MLD) mula alas-9:00 ng umaga hanggang alas-10:00 umaga para anila, “maintain the integrity of the power system”, sa mga sumusunod na lugar:

• LUELCO (bahagi ng La Union at Pangasinan)

• QUEZELCO I (bahagi ng Quezon) • CASURECO II (bahagi ng Camarines Sur)

• MERALCO (bahagi ng Metro Manila)

Gayundin, ipapatupad ang MLD mula alas-10:00 ng umaga hanggang alas-11:00 ng umaga sa mga sumusunod na lugar:

• ISECO (bahagi ng Ilocos Sur)

• QUEZELCO I (bahagi ng Quezon)

• APEC (bahagi ng Albay)

• MERALCO (bahagi ng Metro Manila)

Ang rotational brownouts ay ipapatupad din mula alas-11:00 ng umaga hanggang alas-12:00 ng tanghali sa mga sumusunod na lugar:

• CAGELCO II (bahagi ng Cagayan)

• PELCO I (bahagi ng Pampanga)

• APEC (bahagi ng Albay)

• MERALCO (bahagi ng Metro Manila)

Ang MLD ay isang proseso ng pagpuputol ng kuryente sa mga lugar na sinusuplayan na may kaukulang oras lamang dahil ito sa kakulangan ng power supply. “Schedule may be cancelled if system condition improves, such as if actual demand falls below projections,” ayon sa NGCP.

Inilagay ng grid operator ang Luzon grid sa ilalim ng Yellow Alert, ito ay mula alas-8:00 ng umaga hanggang alas-9:00 ng umaga, mula alas-5:00 ng hapon hanggang alas-6:00 ng gabi at mula alas-11:00 ng gabi hanggang alas-12:00 ng hatinggabi; habang ang Red Alert naman ay mula alas-12:00 ng hatinggabi hanggang alas-5:00 ng hapon at alas-6:00 ng gabi hanggang alas-11:00 ng gabi, kung saan mayroong tinatawag na zero ancillary services o generation deficiency exists.

Ayon sa NGCP, mayroon lamang sa ngayon na available capacity na 11,260 megawatts habang ang operating requirement ay nasa 11,976MW, na nagreresulta sa operating margin deficiency na -716.

Hinimok naman NGCP ang publiko na magtipid sa pagkokonsumo ng kanilang kuryente. Una nang sinabi ng grid operator na asahan ang pagkakaroon ng rotational brownouts sa buong unang linggo ng Hunyo sa gitna ng thin power supply o mahinang suplay ng kuryente dahil mula anila sa ‘planned and unplanned outages’ ng maraming power plants.