Mababang taripa sa imported na karne ng baboy at bigas, aprub kay P-Duterte

ni Lolet Abania | May 16, 2021

Nag-isyu si Pangulong Rodrigo Duterte ng dalawang executive order para sa pagtatakda ng panibagong tariff rates upang masiguro ang sapat na suplay ng imported na karneng baboy at bigas, at para mapanatiling mababa ang presyo nito nang tinatayang isang taon, ayon sa Malacañang.

Batay sa Executive Order No. 135, pansamantalang ibinaba ni Pangulong Duterte ang tariff rates sa bigas ng most favored nation (MFN) ng 35 percent, mula sa 40 percent para sa in-quota imports at 50 percent para sa out-quota imports.

“This was intended to diversify the country’s market sources, augment rice supply, maintain prices affordable and reduce pressures on inflation,” ayon sa statement ng Palasyo.

Dagdag pa rito, binawasan ang taripa kasunod ng pagtaas ng global rice prices at dahil na rin sa kawalan ng katiyakan sa patuloy na suplay ng bigas sa bansa. Ito rin ang naging tugon ng Malacañang matapos ang rekomendasyon ng National Economic and Development Authority (NEDA) board hinggil sa pagpapababa ng tariff rates sa mga imported na karne ng baboy at bigas.

Gayundin, ang Executive Order No. 134 ay patungkol sa tariff rates ng mga imported na produkto ng karne ng baboy. Ang bagong taripa ng pork imports sa ilalim ng minimum access volume (MAV) ay nasa 10 percent sa unang tatlong buwan at 15 percent sa susunod na siyam na buwan.

Ang taripa naman para sa pork imports outside MAV ay mababawasan ng 20 percent para sa unang tatlong buwan at 25 percent naman sa mga susunod na buwan.

Online registration sa national ID, start na!

ni Lolet Abania | April 27, 2021

Maaari nang magparehistro online para sa national identification system ng bansa simula sa Biyernes, Abril 30, ayon kay National Economic and Development Authority (NEDA) Secretary Karl Chua.

Ayon kay Chua, maglulunsad ang NEDA ng isang online system kung saan kokolektahin ang mga demographic data ng mga mag-a-apply para sa national ID.

Gayunman, ipinaliwanag ni Chua na ang mga aplikante nito ay kailangan pa ring magpunta nang personal sa mga registration centers para sa kanilang biometrics kasabay ng pagbubukas ng sarili nilang bank account.

Sinabi rin ni Chua na ang pagkakaroon ng national ID system ng bansa ay makatutulong nang malaki para mapabilis ang isinasagawang vaccination program at ang distribusyon ng financial aid habang may lockdown.

Dagdag niya, makatutulong din ito sa mga low-income families para makapagbukas ng sariling bank accounts.

Matatandaang pinirmahan na ni Pangulong Rodrigo Duterte ang pagkakaroon ng national ID ng mga mamamayan, kung saan nakapaloob dito ang Philippine Identification System (PhilSys) Act number, buong pangalan, facial image, sex, petsa ng kapanganakan, blood type at address.

Noong 2018, pinagtibay at isinabatas na ni P-Duterte ang panukalang national identification system para pagsamahin at i-integrate na lamang ang marami at paulit-ulit na government IDs at itakda ang isang national ID system.

Inaprubahan din ng pamahalaan ang dagdag na P3.52-billion pondo upang mairehistro ang 20 milyong Pilipino sa national ID system ngayong taon.

Household lockdown kesa ECQ, mas oks

ni Mary Gutierrez Almirañez | April 6, 2021

Isinusulong ni Marikina 2nd District Representative Stella Luz Quimbo ang ‘household lockdown’ sapagkat mas epektibo umano ito kontra-COVID-19, sa halip na isarado ang ekonomiya sa ilalim ng enhanced community quarantine (ECQ).

Batay sa panayam sa kongresista ngayong araw, Abril 6, aniya, “'Pag sinabing ECQ, ibig sabihin nu’n, lahat po tayo. Napakamalawakan kahit sa mga lugar na wala namang COVID, magsasara lahat, kaya ang panukala ko po, piliin na lang po natin. ‘Yun na lang pong mga households na may COVID positive, ‘yun na lang po ang i-lockdown natin nang sa ganu'n, puwede pong ipagsabay ang ating layunin na pigilan ang pagkalat ng COVID at the same time, tuluy-tuloy pa rin ang ating ekonomiya.”

Paliwanag pa niya, “Ang estimate d’yan sa kada araw ng ECQ sa greater Metro Manila area, ang nawawala sa atin, P8-B kada araw. Napakabigat po nu’n, so naisip ko po, let’s make it targeted ‘yung lockdown.”

Giit naman ni Acting Socioeconomic Planning Secretary Karl Kendrick Chua ng National Economic and Development Authority (NEDA), “ECQ alone does not reduce the spike in the COVID-19 cases. The solution is to further enhance our implementation of the PDITR strategy with clear targets to achieve. This will help reduce the spike in COVID-19 cases given the new variants.”

Inirekomenda ni Chua ang Prevent, Detect, Isolate, Treat, and Recover (PDITR) strategy upang mabawasan ang paglobo ng COVID-19. Nilinaw din niyang bilyones ang halagang ikinalugi ng bansa simula noong nag-lockdown sa NCR Plus, kung saan tinatayang daang-libong indibidwal ang nawalan ng pagkakakitaan.

“On top of these, the more stringent quarantine in NCR Plus translates to a daily household income loss of P2.1 billion or almost P30 billion for the two-week period. All in all, the two-week ECQ may shave off 0.8 percentage points from the country’s full year economic growth in 2021,” dagdag pa ni Chua.